વેસ્ટર્ન ડિસ્ટર્બન્સનો હાહાકાર, ઉત્તર મધ્ય ભારતમાં વાવાઝોડા સાથે ભારે વરસાદ

દેશના ઉત્તરીય રાજ્યોમાં અચાનક પડેલા વરસાદથી લોકોને ગરમીથી મોટી રાહત મળી છે. હવામાન વિભાગના જણાવ્યા અનુસાર, આજે દેશના 22 રાજ્યોમાં વરસાદ અને તોફાનની ચેતવણી આપવામાં આવી છે, જેમાં ઉત્તર પ્રદેશ અને મધ્યપ્રદેશનો પણ સમાવેશ થાય છે. જોકે, આજે કોઈપણ રાજ્યમાં હીટવેવ અંગે કોઈ ચેતવણી જારી કરવામાં આવી નથી.

ગુજરાતની વાત કરીએ તો ઉત્તર સૌરાષ્ટ્રના ભાગો, કચ્છના ભાગો, ઉત્તર ગુજરાત, પંચમહાલ, મહીસાગરના ભાગોમાં સાંજ સુધી હવામાનમાં મોટો પલટો આવશે. મધ્ય ગુજરાત, અમદાવાદ, ગાંધીનગર, કલોલ, વડોદરા, ધોળકા, વિરમગામ, કડી, મહેસાણા, બનાસકાંઠામાં પણ આજથી પલટો આવશે. કચ્છ, બનાસકાંઠાના ભાગો, રાજસ્થાન સહિતના ભાગોમાં આજથી હવામાનમાં મોટો પલટો આવશે. ધૂળની ડમરીઓ સાથે કેટલાક ભાગોમાં ગાજવીજ સાથે છાંટા પડવાની શક્યતા રહેશે. 

રાજસ્થાનમાં હવામાન અચાનક બદલાઈ ગયું છે. આજે રાજ્યમાં ધૂળના તોફાનની ચેતવણી આપવામાં આવી છે. હવામાન વિભાગના જણાવ્યા અનુસાર, રાજ્યમાં એક નવો વેસ્ટર્ન ડિસ્ટર્બન્સ સક્રિય થયો છે. તેની અસર આગામી બે દિવસ સુધી રહેશે. જયપુર સહિત ઘણા જિલ્લાઓમાં વાવાઝોડા સાથે વરસાદની ચેતવણી આપવામાં આવી છે. 15 એપ્રિલ સુધી મધ્યપ્રદેશમાં ગરમીની કોઈ ચેતવણી નથી. આજે રાજ્યના 31 જિલ્લાઓમાં વરસાદની શક્યતા છે. આગામી 4 દિવસ સુધી આવી જ સ્થિતિ રહેશે. 3 જિલ્લામાં કરા પડવાની શક્યતા છે. રાજ્યમાં આગામી ત્રણ દિવસ સુધી ગરમીનું મોજું યથાવત રહી શકે છે.

રાજધાની દિલ્હીમાં શુક્રવારે સાંજે ફરી એકવાર હવામાન બદલાયું. સાંજે જોરદાર વાવાઝોડું આવ્યું હતું જેમાં ઘણી જગ્યાએ વૃક્ષો પડી ગયા. ખરાબ હવામાનને કારણે શુક્રવારે 15 થી વધુ ફ્લાઇટ્સ ડાયવર્ટ કરવામાં આવી હતી. વાવાઝોડા પછી, રાજધાની દિલ્હી ઉપરાંત, નોઈડામાં પણ વરસાદ પડ્યો હતો. આનાથી હવામાન ખુશનુમા બન્યું. આગામી બે દિવસ સુધી દિલ્હી-એનસીઆરમાં તાપમાન 36 થી 40 ડિગ્રીની વચ્ચે રહેશે. ગરમી અને ભેજની અસરો પણ રહેશે.

વેસ્ટર્ન ડિસ્ટર્બન્સના કારણે હરિયાણામાં તોફાન અને વરસાદનો સમયગાળો શરૂ થયો છે. આજે રાજ્યના 18 જિલ્લાઓમાં તોફાન અને વરસાદની ચેતવણી જારી કરવામાં આવી છે. 9 જિલ્લામાં વરસાદ માટે ઓરેન્જ એલર્ટ અને બાકીના 9 જિલ્લામાં યલો એલર્ટ છે. ગુરુગ્રામમાં ભારે વાવાઝોડાને કારણે સાઇન બોર્ડ પડી ગયું. તેની નીચે દટાઈ જવાથી બે લોકો ઘાયલ થયા હતા, જ્યારે અનેક વાહનોને પણ નુકસાન થયું હતું.

તોફાન અને વરસાદને કારણે યુપી અને બિહારમાં અત્યાર સુધીમાં 80 લોકોના મોત થયા છે. જ્યારે યુપીમાં 22 લોકોના મોત થયા છે. આ ઉપરાંત ઝારખંડમાં 4 અને હરિયાણામાં 2-2 લોકોના મોત થયા છે. ખેતરોમાં પાણી ભરાઈ જવાથી પાકને નુકસાન થયું છે. હવામાન વિભાગે આજે પણ બિહારના 9 જિલ્લાઓમાં વરસાદની ચેતવણી જારી કરી છે. આ સ્થિતિ ૧૫ એપ્રિલ સુધી ચાલુ રહેશે. આ સમયગાળા દરમિયાન વીજળી પણ ત્રાટકશે. જ્યારે ગ્રામીણ વિસ્તારોમાં લોકોને વરસાદ દરમિયાન ખુલ્લામાં ન જવાની ચેતવણી આપવામાં આવી છે.