ઓપરેશન સિંદૂર : શશિ થરુર, ઔવેસી, સહિતના આ નેતાઓ વિદેશ જઇ પાકની પોલ ખોલશે

ઓપરેશન સિંદૂર અને સરહદ પાર આતંકવાદ સામે ભારતની સતત લડાઈના સંદર્ભમાં, સાત સર્વપક્ષીય નેતાઓનું પ્રતિનિધિમંડળ આ મહિનાના અંતમાં યુએન સુરક્ષા પરિષદના સભ્યો સહિત મુખ્ય ભાગીદાર દેશોની મુલાકાત લેશે. આ પ્રતિનિધિમંડળમાં  શશી થરૂર, કોંગ્રેસ, રવિ શંકર પ્રસાદ, ભાજપ, સંજય કુમાર ઝા, જેડીયુ,  બૈજયંત પાંડા, ભાજપ,  કનિમોઝી કરુણાનિધિ, ડીએમકે,  સુપ્રિયા સુલે, એનસીપી અને  શ્રીકાંત એકનાથ શિંદે, શિવસેનાનો સમાવેશ થાય છે

સંસદીય બાબતોના મંત્રાલયે વિદેશમાં ભારતનું પ્રતિનિધિત્વ કરતા ભારતીય સંસદીય પ્રતિનિધિમંડળનું નેતૃત્વ કરનારા સાંસદોના નામ જાહેર કર્યા છે. મોદી સરકારે આ મામલે કોંગ્રેસ નેતા શશિ થરૂરને મોટી જવાબદારી સોંપી છે. આ સાથે, થરૂર હવે અમેરિકામાં ભારતનો પક્ષ રજૂ કરશે અને પાકિસ્તાનનો પર્દાફાશ કરશે.

 પહેલગામ આતંકવાદી હુમલાનો યોગ્ય જવાબ આપતા, ભારતીય સેનાએ ઓપરેશન સિંદૂર દ્વારા પાકિસ્તાનના આતંકવાદી ઠેકાણાઓનો નાશ કરીને એક મજબૂત સંદેશ આપ્યો છે. આ નિર્ણાયક કાર્યવાહીને માત્ર જનતા તરફથી જ નહીં પરંતુ વિરોધ પક્ષો તરફથી પણ સંપૂર્ણ સમર્થન મળ્યું. દેશમાં રાજકીય પક્ષોની વિચારધારાઓ ભલે અલગ અલગ હોય, પરંતુ જ્યારે દેશની સુરક્ષા અને આતંકવાદ સામે એકતાની વાત આવી ત્યારે સમગ્ર રાજકીય નેતૃત્વ એક અવાજમાં ઊભું જોવા મળ્યું.

હવે ભારતની આ રાજકીય એકતા આખી દુનિયામાં દેખાશે. સૂત્રોના જણાવ્યા અનુસાર, સરકારે નિર્ણય લીધો છે કે ઓપરેશન સિંદૂર પર ભારતનો પક્ષ રજૂ કરવા માટે સાંસદોનું એક પ્રતિનિધિમંડળ 8 અલગ અલગ દેશોમાં મોકલવામાં આવશે. આ પ્રયાસ સંસદીય બાબતોના મંત્રાલય દ્વારા હાથ ધરવામાં આવી રહ્યો છે, જેણે વિદેશ મંત્રાલયના સહયોગથી યોજનાને અંતિમ સ્વરૂપ આપ્યું છે.

પ્રથમ તબક્કામાં, 8 જૂથો બનાવવામાં આવ્યા છે, જેમાંથી દરેક એક અલગ દેશની મુલાકાત લેશે. આ જૂથોમાં તમામ પક્ષોના સાંસદોનો સમાવેશ કરવામાં આવી રહ્યો છે, જેથી એ સ્પષ્ટ થાય કે આતંકવાદ સામે ભારતની લડાઈ ફક્ત સરકારની નથી પરંતુ સમગ્ર દેશની છે.

દરેક પ્રતિનિધિમંડળમાં લગભગ અડધો ડઝન સાંસદો હશે અને તમામ રાજકીય પક્ષોના ફ્લોર લીડર્સ તેમાં નેતૃત્વની ભૂમિકા ભજવશે. આ સાંસદોનો ઉદ્દેશ્ય આંતરરાષ્ટ્રીય મંચો પર એ સ્પષ્ટ કરવાનો રહેશે કે પાકિસ્તાનમાં પોષાયેલા આતંકવાદી માળખાઓએ ભારતની સાર્વભૌમત્વ પર કેવી રીતે હુમલો કર્યો છે અને તેના જવાબમાં ભારતે કેવી રીતે સંયમ અને દૃઢતાથી પ્રતિક્રિયા આપી છે.

આ 8 પ્રતિનિધિમંડળોનો ઉદ્દેશ્ય વિદેશી સરકારો, થિંક ટેન્કો, મીડિયા સંસ્થાઓ અને નીતિ નિર્માતાઓને જણાવવાનો રહેશે કે ભારતને આ બદલો લેવાની ફરજ કેમ અને કેવી રીતે પડી. તે જ સમયે, એ કહેવું જ જોઇએ કે ભારતે કોઈપણ દેશની સાર્વભૌમત્વનું ઉલ્લંઘન કર્યું નથી પરંતુ તેના નાગરિકોની સુરક્ષા માટે ઊભું રહ્યું છે.

22 મે પછી, સાંસદોનું પ્રતિનિધિમંડળ વિદેશ પ્રવાસ પર જવાનું શરૂ કરશે. સૂત્રોના જણાવ્યા અનુસાર, વિદેશ જનારા પ્રતિનિધિમંડળમાં લગભગ 43/45 સાંસદોના નામ સામેલ કરવામાં આવશે. અત્યાર સુધી મળેલી માહિતી મુજબ, આ સાંસદોના નામ તેમાં શામેલ છે-

૧. પ્રેમચંદ ગુપ્તા, આરજેડી
૨. સંજય ઝા, જેડીયુ - જાપાન જશે.
૩. રવિશંકર પ્રસાદ, ભાજપ - મધ્ય પૂર્વ જશે
૪. વિજયંત જય પાંડા - ભાજપ
૫. અનુરાગ ઠાકુર - ભાજપ
૬. બ્રિજલાલ, ભાજપ
૭. તેજસ્વી સૂર્યા, ભાજપ
૮. અપરાજિતા સારંગી, ભાજપ
૯. રાજીવ પ્રતાપ રૂડી, ભાજપ
૧૦. ડી પુરંદેશ્વરી - ભાજપ
11. શ્રીકાંત શિંદે – શિવસેના શિંદે
12. સુપ્રિયા સુલે - NCP (શરદ પવાર)
૧૩. સંબિત પાત્રા - (બીજેડી)
૧૪. સમિક ભટ્ટાચાર્ય- (ભાજપ)
૧૫. મનીષ તિવારી - (કોંગ્રેસ)
૧૬. શશિ થરૂર - કોંગ્રેસ
૧૭. અમર સિંહ - કોંગ્રેસ
18. પ્રિયંકા ચતુર્વેદી – શિવસેના ઉદ્ધવ
૧૯. જોન બિટ્સ- સીપીઆઈ એમ
૨૦. અસદુદ્દીન ઓવૈસી - AIMIM