આંધ્રમાં મોટરસાયકલના ધુમાડાથી ગૂંગળાઈ જતાં 4 મોત

આંધ્રપ્રદેશના ચિત્તૂર જિલ્લામાં એક એવી ઘટના બની છે જે વાંચીને કોઈપણનું હૃદય દ્રવી ઉઠશે. હેર સલૂન ચલાવતા મુરલી નામના વ્યક્તિની એક અજાણતા કરેલી ભૂલે તેના પિતા અને ત્રણ સંતાનોનો ભોગ લીધો છે.

મોટરસાયકલના એન્જિનમાંથી નીકળતા ઝેરી ધુમાડાને કારણે એક બંધ રૂમ ગેસ ચેમ્બરમાં ફેરવાઈ ગયો હતો, જેના પરિણામે તેમાં સૂતેલા ચાર લોકોના શ્વાસ હંમેશા માટે થંભી ગયા હતા.

શું હતી ઘટના?

મુરલીએ તાજેતરમાં જ પોતાની મોટરસાયકલ રિપેર કરાવી હતી. મેકેનિકે તેને સલાહ આપી હતી કે એન્જિનને સેટ કરવા માટે તેને આખી રાત ચાલુ રાખવું પડશે. આ સલાહ માનીને મુરલીએ રાત્રે બાઈકને ઘરની અંદર પાર્ક કરી અને તેનું એન્જિન ચાલુ રાખી દીધું. જે રૂમમાં બાઈક ચાલુ હતી, તે જ રૂમમાં તેના 70 વર્ષીય પિતા રામચંદ્રૈયા, ૧૫ વર્ષનો પુત્ર કાર્તિક અને ૮ વર્ષની બે જોડિયા દીકરીઓ ચંદના અને ચરિત્રા સૂતા હતા.

બંધ રૂમ બન્યો ઝેરી

મુરલી અને તેની પત્ની ધાબા પર સૂવા ગયા હતા. તેમણે રૂમના બારી-બારણાં અંદરથી બંધ કરી દીધા હતા. બાઈકમાંથી નીકળતો ધુમાડો રૂમમાં ભરાવા લાગ્યો અને વેન્ટિલેશનના અભાવે ત્યાં કાર્બન મોનોક્સાઈડ ગેસનું પ્રમાણ વધી ગયું.

આ ઝેરી ગેસ એટલો ખતરનાક હતો કે ઊંઘી રહેલા ત્રણેય બાળકો અને વૃદ્ધ દાદાને જાગવાની તક પણ ન મળી અને ઊંઘમાં જ તેમના મોત નિપજ્યા.

રવિવારે સવારે જ્યારે દરવાજો ન ખુલ્યો ત્યારે તપાસ કરતા ચારેયના મૃતદેહો મળી આવ્યા હતા. પોલીસે આ મામલે અકસ્માતે મોતનો ગુનો નોંધી તપાસ હાથ ધરી છે. નિષ્ણાતોના મતે, કાર્બન મોનોક્સાઈડ એક રંગહીન અને ગંધહીન ગેસ છે, જે બંધ જગ્યામાં ઓક્સિજન ઘટાડીને વ્યક્તિને બેભાન કરી દે છે અને મૃત્યુ તરફ દોરી જાય છે.

આ ઘટના લાલબત્તી સમાન છે કે ક્યારેય બંધ જગ્યામાં વાહન, જનરેટર કે કોલસાની સગડી જેવી વસ્તુઓ ચાલુ ન રાખવી જોઈએ.