કાસગંજના ચંદન ગુપ્તા હત્યા કેસમાં 28 દોષિતોને આજીવન કેદની સજા

નેશનલ ઇન્વેસ્ટિગેશન એજન્સી (NIA)ની વિશેષ અદાલતે શુક્રવારે ચંદન ગુપ્તા હત્યા કેસમાં પોતાનો ચુકાદો સંભળાવ્યો. કોર્ટે તમામ 28 દોષિતોને આજીવન કેદની સજા સંભળાવી છે. હત્યા કેસની સુનાવણી દરમિયાન કોર્ટે ગુરુવારે 28 આરોપીઓને દોષિત ઠેરવ્યા હતા. ઉલ્લેખનિય છે કે 26 જાન્યુઆરી 2018ના રોજ કાસગંજમાં તિરંગા યાત્રા દરમિયાન કોમી અથડામણ દરમિયાન ચંદનની ગોળી મારીને હત્યા કરવામાં આવી હતી. કોર્ટે પુરાવાના અભાવે બે આરોપી નસીરુદ્દીન અને અસીમ કુરેશીને નિર્દોષ જાહેર કર્યા હતા.

આ મામલો સાંપ્રદાયિક હિંસાના પ્રકારને કારણે ચર્ચામાં હતો જેમાં ચંદનના મૃત્યુથી વિસ્તારમાં હિંસા ફેલાઈ હતી. અગાઉ કોર્ટના વિશેષ ન્યાયાધીશ વિવેકાનંદ શરણ ત્રિપાઠીએ જાહેરાત કરી કે દોષિત લોકોને 3 જાન્યુઆરી, 2025ના રોજ સજા સંભળાવવામાં આવશે. આ આરોપીઓને હત્યા, હત્યાનો પ્રયાસ, રમખાણો અને રાષ્ટ્રધ્વજનું અપમાન કરવાના આરોપમાં દોષિત ઠેરવવામાં આવ્યા છે.

આ 28 દોષિતોમાંથી, 26 કોર્ટમાં હાજર હતા, જ્યારે એક આરોપી મુનાજીરની હાજરી 'વીડિયો કોન્ફરન્સિંગ' દ્વારા જેલમાંથી થઈ હતી. કોર્ટે અન્ય આરોપી સલીમ માટે ધરપકડ વોરંટ જારી કર્યું હતું, જે સુનાવણી દરમિયાન ગેરહાજર રહ્યો હતો. કોર્ટના નિર્ણય બાદ આ આરોપીઓને જ્યુડિશિયલ કસ્ટડીમાં લઈ જેલમાં મોકલી દેવાયા હતા. ભારતીય દંડ સંહિતાની આ કલમો ઉપરાંત, સલીમ, વસીમ, નસીમ, મોહસીન, રાહત, બબલુ અને સલમાનને પણ આર્મ્સ એક્ટ હેઠળ દોષી ઠેરવવામાં આવ્યા છે કારણ કે તેઓ ઘટના સમયે હથિયારો લઈને આવ્યા હતા.

સરકારી વકીલ એમકે સિંહ અને એલકે દીક્ષિતની આગેવાની હેઠળ ફરિયાદ પક્ષે 18 સાક્ષીઓ રજૂ કર્યા હતા, જ્યારે બચાવ પક્ષે 23 સાક્ષીઓ રજૂ કર્યા હતા. કાસગંજમાં પ્રારંભિક સુનાવણી બાદ કેસ લખનૌ ટ્રાન્સફર કરવામાં આવ્યો હતો. સરકારી વકીલોના જણાવ્યા અનુસાર 26 જાન્યુઆરી 2018ની સવારે ચંદન ગુપ્તા તેમના ભાઈ વિવેક ગુપ્તા અને અન્ય મિત્રો સાથે પ્રજાસત્તાક દિવસ પર તિરંગા યાત્રા પર જઈ રહ્યા હતા.  સરઘસ તહેસીલ રોડ પર જીજીઆઈસીના ગેટ પાસે પહોંચ્યું, ત્યારે સલીમ, વસીમ, નસીમ અને અન્ય લોકોના જૂથે રસ્તો રોકી દીધો અને સરઘસ અટકાવી દીધું.

જ્યારે ચંદન ગુપ્તાએ આનો વાંધો ઉઠાવ્યો ત્યારે પરિસ્થિતિ વધુ વણસી અને આ આરોપીઓએ સરઘસમાં ભાગ લઈ રહેલા લોકો પર પથ્થરમારો કર્યો અને ગોળીબાર કર્યો. મુખ્ય આરોપીઓમાંના એક સલીમે ચંદન ગુપ્તા પર ગોળીબાર કર્યો હતો, જેમાં ચંદન ઘાયલ થયો હતો. ચંદનના ભાઈ અને અન્ય સહયોગીઓ તેને કાસગંજ પોલીસ સ્ટેશન લઈ ગયા જ્યાંથી તેને તાત્કાલિક જિલ્લા હોસ્પિટલમાં લઈ જવામાં આવ્યો. હોસ્પિટલમાં તેમનું મૃત્યુ થયું હતું.