"તારા માટે સરપ્રાઈઝ છે"; કહી ભાઈએ બહેનની લાશ બતાવી

ઉત્તર પ્રદેશના મુરાદાબાદમાં એક એન્જિનિયર યુવકે તેની જ જોડિયા બહેનની એટલી ક્રૂરતાથી હત્યા કરી કે પોસ્ટમોર્ટમ રિપોર્ટ જોઈને ડોક્ટરો પણ ફફડી ઉઠ્યા હતા. 25 વર્ષીય હાર્દિકે તેની બહેન હિમશિખા પર ચપ્પુના 84 ઘા ઝીંકી તેને મોતને ઘાટ ઉતારી દીધી હતી. 

આ હત્યાકાંડ પાછળ કરિયર અને સોશિયલ મીડિયા પર થયેલા સંબંધોને લઈને ઘરમાં ચાલતી તકરાર હોવાનું બહાર આવ્યું છે.

"ચાલ ઘરે, તારા માટે એક સરપ્રાઈઝ છે"

ગયા અઠવાડિયે બનેલી આ ઘટનામાં હાર્દિકે બહેનની હત્યા કર્યા બાદ તે તેની માતા નીલિમાની ઓફિસે પહોંચ્યો હતો. નીલિમા એક ઇન્સ્યોરન્સ કંપનીમાં આસિસ્ટન્ટ મેનેજર છે. 

હાર્દિકે ત્યાં જઈને માતાને કહ્યું, "ચાલ ઘરે, મેં તારા માટે એક સરપ્રાઈઝ રાખી છે." માતા ઘરે પહોંચી ત્યારે તેણે દીકરી હિમશિખાને લોહીના ખાબોચિયામાં પડેલી જોઈ. માતા ચીસો પાડે તે પહેલા જ હાર્દિકે તેના પર પણ હુમલો કરી દીધો હતો. સદનસીબે માતાનો જીવ બચી ગયો છે અને તેઓ અત્યારે હોસ્પિટલમાં સારવાર હેઠળ છે.

પોલીસ તપાસમાં સામે આવ્યું છે કે હાર્દિક અને હિમશિખા બંને એન્જિનિયર હતા અને ગુરુગ્રામમાં કામ કરતા હતા. હિમશિખા એમબીએ (MBA) નો અભ્યાસ પણ કરી રહી હતી, જ્યારે હાર્દિકે દોઢ વર્ષ પહેલા નોકરી છોડી દીધી હતી અને તે આખો દિવસ સોશિયલ મીડિયામાં વ્યસ્ત રહેતો હતો.

હાર્દિક પુણેની એક યુવતી સાથે લગ્ન કરવા માંગતો હતો, જેનો બહેન અને માતા વિરોધ કરતા હતા અને તેને કરિયર પર ધ્યાન આપવા સમજાવતા હતા. 6 માર્ચની સાંજે આ મુદ્દે વિવાદ ઉગ્ર બન્યો અને હાર્દિકે શાકભાજી સુધારવાના ચપ્પુ વડે બહેન પર હુમલો કરી દીધો.

મુરાદાબાદ પોલીસે ગણતરીના કલાકોમાં જ હત્યારા હાર્દિકની ધરપકડ કરી લીધી છે. પૂછપરછ દરમિયાન હાર્દિકે કબૂલાત કરી હતી કે સતત મળતી સલાહ અને રોકટોકથી તેના મનમાં રોષ ભરાયો હતો, જેને કારણે તેણે આ આત્યંતિક પગલું ભર્યું હતું.