ગુજરાતમાં ‘બુક અ કોલ વિથ BLO’ પહેલ લોકપ્રિય

ગુજરાતમાં ‘બુક અ કોલ વિથ BLO’ પહેલ લોકપ્રિય બની, હજારો નાગરિકોને મળ્યું માર્ગદર્શન : 

ગુજરાત રાજ્યમાં હાલ ચાલી રહેલી મતદાર યાદીની ખાસ સુધારણા ઝુંબેશ (SIR) દરમિયાન ચૂંટણી પંચ દ્વારા શરૂ કરાયેલ ‘બુક અ કોલ વિથ BLO’ પહેલ નાગરિકોમાં ખૂબ લોકપ્રિય બની રહી છે. મુખ્ય નિર્વાચન અધિકારી હારીત શુક્લાની આગેવાની હેઠળ 27 ઑક્ટોબર 2025થી શરૂ થયેલી આ ઝુંબેશનો હેતુ મતદાર યાદીની શુદ્ધતા અને સમાવેશિતા સુનિશ્ચિત કરવાનો છે.

10 નવેમ્બર 2025 સુધી રાજ્યભરમાં કુલ 10,204 નાગરિકોએ ECINET વેબસાઈટ પર જઈ આ સુવિધાનો લાભ લીધો છે. જેમાંથી 6,239 નાગરિકોનો સંપર્ક BLO દ્વારા માત્ર 48 કલાકમાં જ કરીને તેમની સમસ્યાઓનું સમાધાન કરવામાં આવ્યું છે. બાકી નાગરિકોનો સંપર્ક કરવાનો પ્રયાસ ચાલુ છે.

મતદાર યાદી સુધારણામાં ટેક્નોલોજીનો ઉમદા ઉપયોગ : 

મતદારોને સહેલાઈથી માહિતી મળે અને કોઈ પાત્ર મતદાર યાદીમાંથી છૂટી ન જાય તે માટે BLO દ્વારા ઘરે-ઘરે જઈ એન્યુમરેશન ફોર્મનું વિતરણ કરવામાં આવી રહ્યું છે. સાથે સાથે ‘બુક અ કોલ વિથ BLO’ સુવિધા દ્વારા ઓનલાઇન સંપર્ક પ્રક્રિયા વધુ સરળ અને પારદર્શક બની છે.

જાણો કેવી રીતે કરશો ‘બુક અ કોલ વિથ BLO’ ઑનલાઇન : 

1. સૌપ્રથમ ecinet.eci.gov.in વેબસાઈટ પર જાઓ

2. હોમ પેજ પર દેખાતા ‘Book a Call with BLO’ વિકલ્પ પર ક્લિક કરો

3. તમારો રજિસ્ટર્ડ મોબાઇલ નંબર અથવા EPIC નંબર નાખો અને OTP દ્વારા લૉગિન કરો

4. સ્ક્રીન પર તમારી વિગતો દેખાશે

5. અંતે ‘Book a Call with BLO’ બટન પર ક્લિક કરીને કન્ફર્મ કરો

પ્રક્રિયા પૂર્ણ થયા બાદ BLO પોતે મતદારનો સંપર્ક કરશે. આ ઉપરાંત, એન્યુમરેશન ફોર્મ પર આપેલા સંપર્ક નંબર દ્વારા પણ મતદારો સીધો સંપર્ક કરી શકે છે.