542 સરકારી એમ્બ્યુલન્સનું સંચાલન 108 સેવાના હવાલેઃ કુલ 1499 એમ્બ્યુલન્સ તૈયાર

રાજ્યના પ્રાથમિક આરોગ્ય કેન્દ્રથી લઇ મેડિકલ કોલેજ સંલગ્ન હોસ્પિટલોની એમ્બ્યુલન્સનું સંચાલન હવે 108 એમ્બ્યુલન્સ સેવા દ્વારા કરવાનો નિર્ણય કરાયો છે. આરોગ્ય વિભાગની 542 એમ્બ્યુલન્સનું 108 એમ્બ્યુલન્સ સેવા દ્વારા સંચાલન કરવામાં આવશે. એક હોસ્પિટલથી બીજી હોસ્પિટલ ખાતે દર્દીઓને રેફરલ કરવા તેમજ ઇમરજન્સી કેસમાં મદદ કરવા નવીન 542 એમ્બ્યુલન્સનું 108 સેવા દ્વારા સંચાલન કરાશે.

રાજ્યના પ્રાથમિક આરોગ્ય કેન્દ્રની 118, સામુહિક આરોગ્ય કેન્દ્રની 310, સબ ડિસ્ટ્રીક્ટ હોસ્પિટલની 59, ડિસ્ટ્રીક્ટ હોસ્પિટલની 31 અને મેડિકલ કૉલેજ સંલ્ગન હોસ્પિટલની 21 મળીને કુલ 542 જેટલી નવીન એમ્બ્યુલન્સ હવે 108 સેન્ટર દ્વારા કાર્યાન્વિત થશે.

રાજ્યમાં 108 એમ્બ્યુલન્સની સેવા હેઠળ કુલ 800 ALS/BLS એમ્બ્યુલન્સ અને 38 આઇસીયુ ઓન વ્હીલ્સ ઓન રોડ કાર્યરત છે. આ વર્ષે નવીન 119 જેટલી 108 એમ્બુલન્સનો ઉમેરો થતાં કુલ 957 જેટલી 108 એમ્બ્ચુલન્સ પ્રજાજનોની સેવામાં સમર્પિત થશે. 542 એમ્બ્યુલન્સનું પીઠબળ 108ને મળતાં હવે રાજ્યમાં કુલ 1499 જેટલી એમ્બ્યુલન્સ પ્રજાજનોની સેવામાં આકસ્મિક પરિસ્થિતિમાં સેવારત થશે.

રાજ્યમાં 108 સેવા દ્વારા બે વર્ષમાં 28,69,115 જેટલા લોકોને મેડીકલ સેવાઓ પૂરી પાડવામાં આવી હોવાનો દાવો કરવામાં આવ્યો છે. હવે રાજ્યમાં 542 એમ્બ્યુલન્સનો ઉમેરો થતાં કુલ 1499 એમ્બ્યુલન્સ મેડિકલ ઇમરજન્સી વધુ સુદ્રઢ બનશે. ઇમરજન્સી કેસ આંતર-સુવિધા ટ્રાન્સફરના હાલ દૈનિક 350 થી 400 જેટલા કેસનું કાર્યભારણ રહે છે. હાલમાં રિસ્પોન્સ ટાઈમ રૂરલ એરીયામાં 21.04 મિનિટ અને અર્બન માં 11.26 મિનિટ છે. જેમાં 542 એમ્બ્યુલન્સના કાફલો ઉમેરાતા રાજ્યના હાલના સરેરાશ 16.5 મિનિટના રિસ્પોન્સ ટાઈમને ઘટાડી સરેરાશ 10 મિનિટ જેટલો રિસ્પોન્સ ટાઈમ લક્ષ્યાંક પાર પાડી શકાશે.

રાજયમાં હાલની 108 ઈમરજન્સી સેવાના પ્રોટોકોલ, તાલીમબધ્ધ, મેનપાવર, ઓપરેશનલ સંચાલનની કાર્યપ્રણાલી સાથે કુલ 542 એમ્બ્યુલન્સને 108 સેવા હેઠળની વ્યવસ્થાને ઓપરેશનલ કરવા રાજ્ય સરકારે વાર્ષિક 104.77 કરોડના બજેટનું આયોજન કર્યુ છે.