ભાવનગરમાં રસ્તા પર મોપેડ રોકી યુવાનની હત્યા

ગુજરાતમાં કાયદો અને વ્યવસ્થાની સ્થિતિ કથળી રહી હોય તેમ લાગી રહ્યું છે. ભાવનગર જિલ્લાના ઘોઘા તાલુકાના વાળુકડ ગામે શનિવારે રાત્રે કાયદો અને વ્યવસ્થાના ધજાગરા ઉડાવતી એક સનસનાટીભરી ઘટના સામે આવી છે.

ગામના પાદર પાસે જ 29 વર્ષીય રવિ અનિલભાઈ કલોતરા નામના યુવાન પર ત્રણ અજાણ્યા શખ્સોએ અચાનક તૂટી પડી, જાહેરમાં છરીના ઉપરાઉપરી ઘા ઝીંકી તેની હત્યા કરી નાખતા સમગ્ર પંથકમાં ભારે અરેરાટી સાથે ચકચાર મચી ગઈ છે.

મોપેડ રોકીને કરાયો જીવલેણ હુમલો

પ્રાપ્ત માહિતી અનુસાર, રવિ કલોતરા શનિવારે રાત્રે પોતાની મોપેડ પર પસાર થઈ રહ્યો હતો ત્યારે અજાણ્યા હુમલાખોરોએ તેને રસ્તા વચ્ચે આંતર્યો હતો. હુમલાખોરોએ કંઈ પણ વિચાર્યા વગર રવિના પેટના ભાગે તીક્ષ્ણ છરીના આડેધડ ઘા મારવાનું શરૂ કર્યું હતું. હુમલો એટલો ભયાનક હતો કે રવિ લોહીલુહાણ હાલતમાં રસ્તા પર જ ઢળી પડ્યો હતો. ગંભીર રીતે ઇજાગ્રસ્ત યુવાનને તાત્કાલિક ભાવનગરની સર ટી. હોસ્પિટલ ખસેડવામાં આવ્યો હતો, પરંતુ કમનસીબે ફરજ પરના તબીબોએ તેને મૃત જાહેર કર્યો હતો.

કેમેરામાં હત્યાના લાઈવ દ્રશ્યો કેદ

આ સમગ્ર હૃદયદ્રાવક ઘટના સમયે ત્યાંથી પસાર થઈ રહેલા એક જાગૃત કારચાલકે પોતાના મોબાઈલ કેમેરામાં હુમલાના દ્રશ્યો કેદ કરી લીધા હતા. વાયરલ થયેલા વીડિયોમાં જોઈ શકાય છે કે ત્રણ શખ્સો રવિ પર હુમલો કરી રહ્યા છે. આ દરમિયાન એક રાહદારીએ હુમલાખોરોને રોકવાનો અને રવિને બચાવવાનો પ્રયાસ પણ કર્યો હતો, પરંતુ બેખૌફ હુમલાખોરોએ કોઈની પણ પરવા કર્યા વગર હુમલો ચાલુ રાખ્યો હતો અને ત્યારબાદ પોતાની મોપેડ પર સવાર થઈ નાસી છૂટ્યા હતા.

પોલીસ તપાસનો ધમધમાટ

હત્યાની જાણ થતા જ એએસપી, સીટી ડીવાયએસપી અને વરતેજ પોલીસનો મોટો કાફલો વાળુકડ ગામે દોડી ગયો હતો. પોલીસે મૃતદેહને પોસ્ટમોર્ટમ માટે મોકલી આપી ઘટનાસ્થળેથી મહત્વના પુરાવા એકત્ર કર્યા છે. જોકે, આ હત્યા પાછળનું ચોક્કસ કારણ હજુ સુધી જાણી શકાયું નથી, પરંતુ પોલીસ અંગત અદાવત સહિતના વિવિધ પાસાઓ પર તપાસ કરી રહી છે. હાલમાં પોલીસે જિલ્લાભરમાં નાકાબંધી કરી છે અને વાયરલ વીડિયોના આધારે ફરાર ત્રણેય હત્યારાઓને ઝડપી પાડવા માટે અલગ-અલગ ટીમો બનાવી તપાસ તેજ કરી છે.