હવામાન વિભાગે 29 ઓગસ્ટથી 4 સપ્ટેમ્બર સુધીના આગામી સાત દિવસ માટે ગુજરાત રાજ્યમાં ભારેથી અતિ ભારે વરસાદની આગાહી જાહેર કરી છે. આ સાથે, રાજ્યના અનેક જિલ્લાઓમાં યલો એલર્ટ જારી કરવામાં આવ્યું છે. હવામાન વિભાગના જણાવ્યા મુજબ, હાલ રાજ્યમાં બે સક્રિય વરસાદી સિસ્ટમ કાર્યરત છે, જેના કારણે દક્ષિણ અને મધ્ય ગુજરાતમાં ધોધમાર વરસાદની શક્યતા છે.
આ વરસાદી સિSસ્ટમના પરિણામે દરિયાકાંઠે તીવ્ર પવનો અને ઊંચા મોજાંની સંભાવના છે, જેને કારણે દરિયાકાંઠે 3 નંબરનું સિગ્નલ લગાવવામાં આવ્યું છે. માછીમારોને આગામી દિવસો સુધી દરિયામાં ન જવાની સૂચના આપવામાં આવી છે.
આજે, 30 ઓગસ્ટના રોજ સાબરકાંઠા, અરવલ્લી, મહીસાગર, ખેડા, પંચમહાલ, દાહોદ, આણંદ, વડોદરા, છોટા ઉદેપુર, ભરૂચ, નર્મદા, સુરત, તાપી, નવસારી, ડાંગ, વલસાડ, દમણ અને દાદરા નગર હવેલીમાં યલો એલર્ટ જાહેર કરાયું છે.
29 ઓગસ્ટના રોજ સવારે 6 વાગ્યાથી સાંજે 4 વાગ્યા સુધી રાજ્યના 103 તાલુકાઓમાં વરસાદ નોંધાયો હતો. સૌથી વધુ વરસાદ તાપીના ડોલવણમાં 6.34 ઈંચ અને સૌથી ઓછો છોટા ઉદેપુરના પાવી જેતપુરમાં 1 મિમી નોંધાયો હતો. નડિયાદમાં વહેલી સવારથી શરૂ થયેલા વરસાદને કારણે ઘણી જગ્યાએ પાણી ભરાયા હતા.
સુરતમાં ભારે વરસાદને કારણે કીમ નદીમાં પાણીની આવક વધતાં માંગરોળના શેઠી ગામનો નીચાણવાળો કોઝવે પાણીમાં ડૂબી ગયો હતો. આ ઉપરાંત, મહેસાણાના ધરોઈ ડેમમાં પાણીની આવક થતાં વધુ બે દરવાજા ખોલવામાં આવ્યા છે, અને હવે કુલ ચાર દરવાજા દ્વારા પાણી સાબરમતી નદીમાં છોડવામાં આવી રહ્યું છે. સ્થાનિક વહીવટીતંત્રે લોકોને સુરક્ષિત સ્થળે રહેવા અપીલ કરી છે.

દરિયામાં ભારે પવન અને મોજા ઉછળવાની સંભાવના

August 30, 2025 | 14:24 IST