ગુજરાતમાં ચોમાસું ફરી એકવાર આક્રમક બન્યું છે. ભારતીય હવામાન વિભાગ (IMD) એ રાજ્યમાં સાર્વત્રિક ભારે વરસાદની આગાહી કરી છે, જેને પગલે અનેક જિલ્લાઓમાં તંત્ર એલર્ટ મોડ પર આવી ગયું છે. ખાસ કરીને ઉત્તર ગુજરાત અને સૌરાષ્ટ્ર-કચ્છના વિસ્તારોમાં 'અતિ ભારે વરસાદ'ની ચેતવણી સાથે 'રેડ એલર્ટ' જારી કરવામાં આવ્યું છે.
વાવાઝોડા જેવા સંકટનો ખતરો
હવામાન વિભાગના જણાવ્યા મુજબ, બંગાળની ખાડીમાં સર્જાયેલું એક શક્તિશાળી લો પ્રેશર એરિયા ડિપ્રેશનમાં ફેરવાઈને ગુજરાત તરફ આગળ વધી રહ્યું છે. આજે સવારે 5.30 વાગ્યાની સ્થિતિએ આ સિસ્ટમ ઉત્તર ગુજરાતના ડીસાથી 70 કિમી દૂર સક્રિય હતી. આના કારણે આગામી 24 કલાકમાં ભારે વરસાદ, વીજળી અને તોફાની પવન ફૂંકાવાની શક્યતા છે. એક રીતે, આ પરિસ્થિતિ વાવાઝોડા જેવા સંકટ સમાન છે. માછીમારોને 7થી 10 સપ્ટેમ્બર સુધી દરિયો ન ખેડવા સૂચના આપવામાં આવી છે.
ક્યાં ક્યાં 'રેડ' અને 'ઓરેન્જ' એલર્ટ?
રેડ એલર્ટ: બનાસકાંઠા, પાટણ, મહેસાણા, સૌરાષ્ટ્ર અને કચ્છના કેટલાક વિસ્તારોમાં અતિ ભારે વરસાદની આગાહી છે. આ વિસ્તારોમાં સૌથી વધુ અસર થવાની શક્યતા છે.
ઓરેન્જ એલર્ટ: અમદાવાદ, સુરેન્દ્રનગર, ખેડા, નવસારી, વલસાડ, દમણ અને દાદરા નગર હવેલી સહિત દક્ષિણ ગુજરાતના જિલ્લાઓમાં ભારે વરસાદની સંભાવના છે.
યલો એલર્ટ: સાબરકાંઠા, અરવલ્લી, ગાંધીનગર, મોરબી, જામનગર, દેવભૂમિ દ્વારકા સહિતના અન્ય જિલ્લાઓમાં પણ ભારે વરસાદની સંભાવના વ્યક્ત કરવામાં આવી છે.
ભારે વરસાદની આગાહીને ધ્યાનમાં રાખીને તંત્ર પણ સતર્ક બન્યું છે. બનાસકાંઠા જિલ્લામાં તમામ આંગણવાડી, શાળાઓ અને કોલેજો આવતીકાલે એટલે કે 8 સપ્ટેમ્બર, 2025ના રોજ બંધ રાખવાનો નિર્ણય લેવાયો છે. સાબરકાંઠાના ખેડબ્રહ્મા, પોશીના અને વિજયનગર તાલુકામાં પણ શાળાઓ બંધ રહેશે.
બચાવ અને રાહત કામગીરી માટે રાજ્યમાં 12 NDRF અને 22 SDRFની ટીમો તૈનાત કરવામાં આવી છે. રાજ્યના 206 જળાશયો પૈકી 123 ડેમ 'હાઈ એલર્ટ' પર છે, જ્યારે સરદાર સરોવર ડેમમાં 91.26% જળસંગ્રહ નોંધાયો છે. રાજ્યમાં અત્યાર સુધીમાં 5,598 લોકોને સુરક્ષિત સ્થળોએ ખસેડવામાં આવ્યા છે.
હવામાન વિભાગના જણાવ્યા મુજબ, આગામી ત્રણ દિવસ સુધી વરસાદનું જોર યથાવત્ રહેશે અને ત્યારબાદ ધીમે ધીમે ઓછું થવાની શક્યતા છે.

ગુજરાતમાં ભારે વરસાદ

રાજ્યમાં  ભારે વરસાદ, વીજળી અને તોફાની પવન ફૂંકાવાની શક્યતા, અનેક જીલ્લામાં એલર્ટ જાહેર

September 8, 2025 | 15:12 IST