અમરેલી ભાજપમાં વિખવાદ કેમ શમવાનું નામ લેતો નથી?

અમરેલી ભાજપમાં લેટરકાંડ બાદ પાટીદાર યુવતી સરઘસ કાંડ થયો હતો. સમગ્ર રાજ્યમાં પાટીદાર યુવતી સરઘસ કાંડનો વિવાદ થયા બાદ તેની તપાસ ચાલી રહી છે. તેવામાં સાવરકુંડલા તાલુકા પંચાયત પ્રમુખ અને ભાજપ કાર્યકર વચ્ચેની ઓડિયો ક્લીપ વાયરલ થઈ છે. આ ઓડિયો ક્લીપમાં સાવરકુંડલાના ભાજપના ધારાસભ્ય મહેશ કસવાલાનો ઉલ્લેખ કરવામાં આવતાં મામલો ચર્ચાની એરણે ચઢ્યો છે.

અમરેલીના ભાજપના ધારાસભ્ય અને વિધાનસભાના નાયબ દંડક કૌશિક વેકરિયાને બદનામ કરવા માટે અમરેલી તાલુકા પંચાયત પ્રમુખ કિશોર કાનપરિયા દ્વારા મુખ્યમંત્રીને લેટર લખવામાં આવ્યો હતો. મુખ્યમંત્રીને લખાયેલો લેટર કિશોર કાનપરિયાએ નહી પણ ભાજપના અન્ય નેતાએ લખ્યો હોવાનું સામે આવ્યુ હતુ. ત્યારબાદ તપાસ કરાતા ભાજપના એક નેતાએ પોતાને ત્યાં નોકરી કરતી પાટીદાર યુવતી પાયલ ગોટી પાસે ટાઈપ કરાવ્યો હોવાનું ખુલ્યુ હતુ. તેથી કિશોર કાનપરિયાએ પાટીદાર યુવતી સહિત 4 સામે પોલીસ ફરિયાદ નોંધાવી હતી. પોલીસે ફરિયાદ નોંધી અન્ય ત્રણ આરોપીઓ સાથે પાટીદાર યુવતીનું પણ સરઘસ કાઢતાં મામલો ગરમાયો હતો. પાટીદાર સમાજના નેતાઓએ વિરોધ કરી સરઘસ કાંડની તપાસ કરવા માંગ કરી હતી. આ સરઘસ કાંડમાં કોંગ્રેસના નેતાઓએ ઝુકાવી અમરેલીના મુદ્દાને રાજકીય સ્વરૂપ આપી રાજ્યનો મુદ્દો બનાવ્યો હતો. જેના કારણે અમરેલી ભાજપનો આંતરિક જૂથવાદ ઉઘાડો પડ્યો હતો. આ મામલે પાટીદાર યુવતીની મોડી રાત્રે ધરપકડથી લઈને જામીન મળવા સુધી અને બાદમાં અમરેલી શહેર બંધનું એલાન આપી વિવાદને વધુ ઘેરો બનાવ્યો હતો.

ભાજપના લેટરકાંડ અને પાટીદાર યુવતીના સરઘસ કાંડની ચર્ચા હજુ માંડ શમી છે તેવામાં અમરેલી ભાજપનો વધુ એક વિખવાદ સામે આવ્યો છે. અમરેલી બાદ સાવરકુંડલા તાલુકામાં ભાજપના નેતાઓમાં ચાલી રહેલો ગજગ્રાહ બહાર આવ્યો છે. સાવરકુંડલા તાલુકા પંચાયત પ્રમુખ જીતુ કાછડિયા અને ભાજપ કાર્યકર રાહુલ વચ્ચે થયેલા સંવાદની ઓડિયો ક્લીપ વાયરલ થઈ છે. આ ઓડિયો ક્લીપમાં જીતુ કાછડિયા સાવરકુંડલાના ભાજપના ધારાસભ્ય મહેશ કસવાલા વિશે અપશબ્દો બોલતાં અને આગામી ચૂંટણીમાં હરાવવા અંગે થયેલો સંવાદ ચર્ચાનો વિષય બન્યો છે. ધારાસભ્ય મહેશ કસવાલા પ્રજા તેમજ સમાજના કામો નહી કરતા હોવાનો આક્ષેપ કરી તેમને હરાવવા પોતે અપક્ષ ઉમેદવારી કરશે તેમ જણાવ્યુ હતુ. આ ઓડિયો ક્લીપથી અમરેલી ભાજપનો આંતરિક જૂથવાદ બહાર આવ્યો છે. ભાજપના સંગઠનની સંરચના અને સ્થાનિક સ્વરાજની સંસ્થાઓની ચૂંટણીમાં જૂથવાદ વધુ વકરે તેવા એંધાણ વર્તાઈ રહ્યા છે.