ગુજરાતમાં ચોમાસાની એન્ટ્રી ક્યારે? જાણો આગાહી

ગુજરાતમાં ચોમાસાની રાહ જોઈ રહેલા લોકો માટે મહત્વના સમાચાર સામે આવ્યા છે. હવામાન વિભાગના વિવિધ મોડલ મુજબ રાજ્યમાં 17 જૂન સુધી કોઈ નોંધપાત્ર વરસાદની શક્યતા દેખાતી નથી. જોકે 20 જૂન પછી મોનસૂનનો વરસાદ સક્રિય થવાની સંભાવના વ્યક્ત કરવામાં આવી છે. વિભાગના અનુમાન અનુસાર જૂનના અંત સુધીમાં સમગ્ર ગુજરાત ચોમાસાની ઝપેટમાં આવી શકે છે.

કેરળથી શરૂ થયેલી ચોમાસાની સફર
ચોમાસાએ 4 જૂનના રોજ કેરળમાં પ્રવેશ કર્યો હતો. ત્યારબાદ તે ઝડપથી આગળ વધીને કર્ણાટક, તમિલનાડુ, ગોવા અને મહારાષ્ટ્રના કેટલાક વિસ્તારો સુધી પહોંચી ગયું છે. પશ્ચિમ બંગાળમાં પણ મોનસૂન સક્રિય બન્યું છે. આગામી ચારથી પાંચ દિવસમાં ઓડિશા, છત્તીસગઢ, બિહાર અને મહારાષ્ટ્રના અન્ય વિસ્તારોમાં પણ ચોમાસું પહોંચવાની સંભાવના છે. મુંબઈમાં 11 અથવા 12 જૂન સુધી વરસાદી માહોલ શરૂ થઈ શકે છે.

ગુજરાતમાં હાલ કેવી છે સ્થિતિ?
હવામાન વિભાગના આંકડાઓ મુજબ રાજ્યમાં હાલ ચોમાસાની શરૂઆત ધીમી ગતિએ થઈ રહી છે. ગયા વર્ષની સરખામણીએ જૂન મહિનાના પ્રથમ દસ દિવસમાં જેટલો વરસાદ નોંધાવવો જોઈએ એટલો વરસાદ હજુ સુધી થયો નથી. વિવિધ હવામાન મોડલ પણ દર્શાવે છે કે મોનસૂનની શરૂઆત આ વખતે સામાન્ય કરતાં નબળી રહી છે.

વેસ્ટર્ન ડિસ્ટર્બન્સની અસરથી વરસાદની શક્યતા
રાજ્યમાં વેસ્ટર્ન ડિસ્ટર્બન્સની અસરને કારણે 15 જૂન સુધી હળવાથી મધ્યમ અને છૂટાછવાયા વરસાદની શક્યતા છે. દક્ષિણ ગુજરાત, મધ્ય ગુજરાત અને સૌરાષ્ટ્રના કેટલાક વિસ્તારોમાં ગાજવીજ સાથે વરસાદ વરસી શકે છે. 12થી 15 જૂન દરમિયાન અમરેલી, ભાવનગર અને ગીર સોમનાથ જિલ્લામાં હળવા વરસાદની આગાહી કરવામાં આવી છે.

દેશના 17 રાજ્યોમાં વરસાદ અને ભારે પવનની ચેતવણી
હવામાન વિભાગના જણાવ્યા અનુસાર પશ્ચિમી વિક્ષેપ સક્રિય થતાં ઉત્તરપશ્ચિમ ભારતમાં 11 અને 12 જૂન દરમિયાન ભારે પવન અને વરસાદી માહોલ સર્જાઈ શકે છે. દિલ્હી, પંજાબ, હરિયાણા, ઉત્તર પ્રદેશ, રાજસ્થાન અને ઉત્તરાખંડ સહિત દેશના 17 રાજ્યો માટે વરસાદની ચેતવણી જાહેર કરવામાં આવી છે.

જૂનના અંત સુધી સમગ્ર ગુજરાતમાં ચોમાસું
હવામાન નિષ્ણાતોના અનુમાન મુજબ હાલ ચોમાસાની ગતિ ધીમી હોવા છતાં જૂનના અંત સુધીમાં સમગ્ર ગુજરાતમાં વરસાદી માહોલ જામશે. ખેડૂતો સહિત સામાન્ય લોકોની નજર હવે આગામી સપ્તાહના હવામાન પર ટકેલી છે, કારણ કે 20 જૂન બાદ રાજ્યમાં મોનસૂન વધુ સક્રિય બનવાની શક્યતા વ્યક્ત કરવામાં આવી રહી છે.

આગામી 7 દિવસ આ વિસ્તારોમાં થશે વરસાદ
હવામાન વિભાગના જણાવ્યા અનુસાર, આજે દક્ષિણ ગુજરાતની સાથે સંઘ પ્રદેશ દમણ અને દાદરાનગર હવેલીમાં વરસાદ પડી શકે છે. જો આવનારા દિવસોની વાત કરીએ તો 11 અને 12 જૂનના રોજ દક્ષિણ ગુજરાતના સુરત, તાપી, ડાંગ, નવસારી અને વલસાડ જિલ્લાના છૂટાછવાયા વિસ્તારોમાં હળવાથી મધ્યમ વરસાદ થવાની પૂરેપૂરી શક્યતા છે. આ સાથે જ દમણ અને દાદરાનગર હવેલીમાં પણ વરસાદી માહોલ જળવાઈ રહેશે.

13 જૂને મેઘરાજા પોતાનો વ્યાપ થોડો વધારશે. આ દિવસે છોટા ઉદેપુર અને નર્મદા જિલ્લાની સાથે-સાથે સુરત, તાપી, ડાંગ, નવસારી, વલસાડ અને બંને સંઘ પ્રદેશોમાં હળવો વરસાદ વરસી શકે છે. હાલમાં રાજ્યમાં દક્ષિણ-પશ્ચિમ દિશામાંથી પવનો ફૂંકાઈ રહ્યા છે, જેને કારણે દક્ષિણ-પશ્ચિમ ચોમાસું ખૂબ જ ઝડપથી આગળ વધી રહ્યું છે.