Gujarat માં ચોમાસાની તૈયારીઓની સમીક્ષા માટે SEOC ખાતે વેધર વોચ ગ્રુપની બેઠક

ગાંધીનગર સ્થિત સ્ટેટ ઈમરજન્સી ઓપરેશન સેન્ટર (SEOC) ખાતે રાહત નિયામકના અધ્યક્ષસ્થાને વેધર વોચ ગ્રુપની બેઠક યોજાઈ હતી. આ બેઠકમાં રાજ્યમાં ચોમાસાની સ્થિતિનું મૂલ્યાંકન કરવામાં આવ્યું અને સંબંધિત વિભાગોની તૈયારીઓની સમીક્ષા કરીને જરૂરી માર્ગદર્શન અને સૂચનાઓ આપવામાં આવી.   ભારતીય હવામાન વિભાગ (IMD)ના અધિકારીએ જણાવ્યું કે, રાજ્યમાં છેલ્લા કેટલાક દિવસોથી વરસાદનું જોર યથાવત છે. આગામી સપ્તાહ દરમિયાન રાજ્યના વિવિધ વિસ્તારોમાં મધ્યમથી ભારે વરસાદની શક્યતા છે. આને ધ્યાનમાં રાખીને સંબંધિત વિભાગોને સંભવિત જોખમો સામે સતર્ક રહેવા અને જરૂરી પગલાં લેવા સૂચના આપવામાં આવી.   રાષ્ટ્રીય આપત્તિ નિવારણ દળ (NDRF)ના અધિકારીએ જણાવ્યું કે, ભારે વરસાદથી ઉદ્ભવતી કોઈપણ કટોકટીનો સામનો કરવા માટે NDRF અને SDRFની કુલ 34 ટીમો જિલ્લા કક્ષાએ તૈનાત કરવામાં આવી છે, જ્યારે 2 ટીમો સ્ટેન્ડબાય પર રાખવામાં આવી છે.   સિંચાઈ વિભાગના અધિકારીએ રાજ્યના જળાશયોની સ્થિતિ અંગે માહિતી આપતાં જણાવ્યું કે, રાજ્યના કુલ 206 જળાશયોમાંથી 15 જળાશયો હાઈ એલર્ટ પર, 12 એલર્ટ પર અને 11 જળાશયો વોર્નિંગ લેવલ પર છે. આ સ્થિતિને ધ્યાનમાં રાખીને જળાશયોનું સતત નિરીક્ષણ કરવામાં આવી રહ્યું છે.   ગુજરાત રાજ્ય માર્ગ પરિવહન નિગમ (GSRTC)ના અધિકારીએ જણાવ્યું કે, વરસાદને કારણે સુરત અને ભરૂચ જિલ્લામાં બસના કેટલાક રૂટ પ્રભાવિત થયા છે, જેને લીધે વૈકલ્પિક રૂટ શરૂ કરવામાં આવ્યા છે. આ ઉપરાંત, પરિવહન વ્યવસ્થાને સરળ રાખવા માટે વધુ પગલાં લેવામાં આવી રહ્યાં છે.   આ બેઠકમાં મહી અને તાપી ડિવિઝનના કેન્દ્રીય જળ આયોગ (CWC), વન, આરોગ્ય, ઊર્જા, નગર વિકાસ, પંચાયત, પશુપાલન, ISRO અને ફિશરીઝ વિભાગના નોડલ અધિકારીઓ ઉપસ્થિત રહ્યા હતા. બેઠકમાં ચોમાસાની પરિસ્થિતિને ધ્યાનમાં રાખીને આગોતરા આયોજન અને સંકલન પર ભાર મૂકવામાં આવ્યો, જેથી કોઈપણ આપત્તિની સ્થિતિમાં ઝડપી અને અસરકારક પ્રતિસાદ આપી શકાય.