PM Modi Vadodara Visit Preparations: પશ્ચિમ બંગાળ વિધાનસભા ચૂંટણીમાં ભારતીય જનતા પાર્ટીની ભવ્ય જીત બાદ વડાપ્રધાન નરેન્દ્ર મોદી પ્રથમ વખત પોતાના વતન ગુજરાતના પ્રવાસે આવી રહ્યા છે. આગામી 11 મેના રોજ પીએમ મોદી ગુજરાતના આંગણે પધારશે, જ્યાં તેઓ સોમનાથમાં ધાર્મિક અને વડોદરામાં સામાજિક ક્ષેત્રના મહત્વપૂર્ણ કાર્યક્રમોમાં હાજરી આપશે. વડાપ્રધાનના આ પ્રવાસને લઈને ભાજપ સંગઠન અને રાજ્ય વહીવટી તંત્ર દ્વારા અત્યારથી જ તડામાર તૈયારીઓ શરૂ કરી દેવામાં આવી છે.
સોમનાથમાં 'સ્વાભિમાન પર્વ' અને જામનગરમાં રાત્રિ રોકાણ પીએમ મોદીના નિર્ધારિત કાર્યક્રમ મુજબ, તેઓ 10 મેના રોજ મોડી રાત્રે જામનગર એરપોર્ટ પર ઉતરાણ કરશે અને તે રાત્રિ જામનગરમાં જ વિતાવશે. ત્યારબાદ, 11 મેના રોજ વહેલી સવારે તેઓ જામનગરથી પવિત્ર યાત્રાધામ સોમનાથ જવા રવાના થશે. સોમનાથ ખાતે આયોજિત 'સોમનાથ સ્વાભિમાન પર્વ'ની ઉજવણીમાં વડાપ્રધાન મુખ્ય અતિથિ તરીકે ઉપસ્થિત રહેશે અને મહાદેવના દર્શન-પૂજન કરી જનસભાને સંબોધિત કરશે.
વડોદરામાં ₹150 કરોડના 'સરદારધામ-3'નું લોકાર્પણ સોમનાથનો કાર્યક્રમ પૂર્ણ કરી પીએમ મોદી વડોદરા પહોંચશે. વડોદરામાં પાટીદાર સમાજ દ્વારા નિર્મિત અને ₹150 કરોડના ખર્ચે તૈયાર થયેલા ભવ્ય 'સરદારધામ-3'નું વડાપ્રધાનના હસ્તે લોકાર્પણ કરવામાં આવશે. આ પ્રોજેક્ટ વિશેષ છે કારણ કે તે 'સમાજ નિર્માણથી રાષ્ટ્ર નિર્માણ'ના મંત્રને વરેલો છે. આશરે 4.75 લાખ સ્ક્વેર ફૂટમાં પથરાયેલા આ અત્યાધુનિક સંકુલમાં 2000 જેટલા વિદ્યાર્થી-વિદ્યાર્થીનીઓ માટે રહેવા-જમવાની અને સ્પર્ધાત્મક પરીક્ષાઓના કોચિંગની ઉત્તમ વ્યવસ્થા કરવામાં આવી છે. ખાસ કરીને જરૂરિયાતમંદ દીકરીઓ માટે માત્ર 1 રૂપિયો ટોકન ફી અને ઉચ્ચ સ્તરની સુરક્ષા પ્રણાલી આ સંકુલની વિશેષતા છે. આ પ્રસંગે પાટીદાર સમાજની વિવિધ સંસ્થાઓ દ્વારા વડાપ્રધાનનું ભવ્ય સન્માન કરવામાં આવશે અને તેમને 'સરદાર ગૌરવ પુરસ્કાર' એનાયત કરાશે.
ભવ્ય રોડ-શોની શક્યતા અને સુરક્ષા સમીક્ષા બંગાળના વિજય બાદ પીએમ મોદી પ્રથમવાર જાહેર જનતા વચ્ચે આવી રહ્યા હોવાથી વડોદરામાં ઉત્સાહનું મોજું છે. અંદાજે 30 થી 40 હજારની જનમેદની ઉમટી પડવાની શક્યતાને જોતા એરપોર્ટથી કાર્યક્રમ સ્થળ સુધી વડાપ્રધાનનો ભવ્ય રોડ-શો યોજાય તેવી પણ પ્રબળ શક્યતા છે. તંત્ર દ્વારા આ બાબતને ધ્યાનમાં રાખીને સુરક્ષાના ચુસ્ત બંદોબસ્તની તૈયારીઓ આરંભી દેવામાં આવી છે.
ગાંધીનગરમાં ઉચ્ચસ્તરીય બેઠકોનો ધમધમાટ વડાપ્રધાનના પ્રવાસને સફળ બનાવવા માટે ગાંધીનગરમાં નાયબ મુખ્યમંત્રી હર્ષ સંઘવીના કાર્યાલય ખાતે એક મહત્વની બેઠક યોજાઈ હતી. આ બેઠકમાં મુખ્યમંત્રીના અગ્ર સચિવ, ગીર સોમનાથના કલેક્ટર, પોલીસ અધિક્ષક અને અન્ય ઉચ્ચ અધિકારીઓ હાજર રહ્યા હતા. બેઠકમાં સુરક્ષા વ્યવસ્થા, ટ્રાફિક મેનેજમેન્ટ અને પ્રોટોકોલ અંગે વિસ્તૃત ચર્ચા કરવામાં આવી હતી. તમામ વિભાગોને સંકલન સાધીને કામ કરવા અને પીએમના કાર્યક્રમમાં કોઈ પણ પ્રકારની કચાસ ન રહે તે માટે કડક સૂચનાઓ આપવામાં આવી છે. ગુજરાતમાં તાજેતરમાં યોજાયેલી સ્થાનિક સ્વરાજ્યની ચૂંટણીઓમાં ભાજપના શાનદાર પ્રદર્શન અને બંગાળના પરિણામો બાદ પીએમ મોદીનો આ પ્રવાસ રાજકીય રીતે પણ ઘણો મહત્વનો માનવામાં આવી રહ્યો છે. વડોદરાના આંગણે પાટીદાર સમાજ દ્વારા આયોજિત આ કાર્યક્રમમાં વડાપ્રધાન શું સંબોધન કરે છે તેના પર સૌની નજર ટકેલી રહેશે.

11 મેના રોજ સોમનાથ અને વડોદરામાં ભવ્ય કાર્યક્રમો

May 5, 2026 | 17:01 IST