વહેલી સવારે પંચમહાલ જિલ્લાના ગોધરા શહેર નજીક દાહોદ હાઈવે પર આવેલા ભથવાડા ટોલનાકા પાસે એક ગંભીર અકસ્માત સર્જાયો હતો. વડોદરાના આજવા રોડ પર આવેલી A/12 ઓમકાર સોસાયટીમાં રહેતો શાહ પરિવાર પોતાની કાર દ્વારા વડોદરાથી મધ્યપ્રદેશના શિહોર ગામ ખાતે એક લગ્નપ્રસંગમાં હાજરી આપવા જઈ રહ્યો હતો. તેમની કાર જ્યારે ગોધરા નજીક સંતરોડ પાસે ભથવાડા ટોલનાકા આગળથી પસાર થઈ રહી હતી, ત્યારે અચાનક કારચાલકે સ્ટીયરિંગ પરથી કાબૂ ગુમાવ્યો હતો. બેકાબૂ બનેલી કાર હાઈવેની સાઈડમાં આવેલી રેલિંગ કૂદીને બાજુમાં ખેતરમાં જોરદાર રીતે ફંગોળાઈ હતી. ટક્કર એટલી ભયાનક હતી કે રેલિંગમાં રહેલો પથ્થર પણ તૂટીને બહાર આવી ગયો હતો.
કારમાંથી ઉછળીને રોડની બહાર ખેતરમાં પડ્યા
આ અકસ્માતની ગંભીરતા એ વાત પરથી જાણી શકાય છે કે, કારમાં સવાર નિધિ શાહ, સંગીતા શાહ, કરણ શાહ, અમીશા શાહ અને કોકિલા શાહ, એમ એક જ પરિવારના પાંચેય લોકો કારમાંથી ઉછળીને રોડની બહાર ખેતરમાં પડ્યા હતા. ગંભીર ઈજાઓને કારણે તેઓ દર્દથી તડપતા હતા, જેના કારણે આસપાસના લોકો તાત્કાલિક મદદ માટે દોડી આવ્યા હતા. ઘટનાની જાણ થતાં જ 108 એમ્બ્યુલન્સ તાત્કાલિક સ્થળ પર પહોંચી અને પાંચેય ઈજાગ્રસ્તોને સારવાર માટે ગોધરા સિવિલ હોસ્પિટલ ખાતે ખસેડવામાં આવ્યા હતા. જોકે, ફરજ પરના ડૉક્ટરે તપાસ કરતાં પાંચેય ઈજાગ્રસ્તોને શરીરના ભાગે ગંભીર પ્રકારના ફ્રેક્ચર હોવાનું જણાયું હતું.
ડૉક્ટરે તાત્કાલિક પ્રાથમિક સારવાર આપી
ઈજાગ્રસ્તોની પીડાને જોતાં અને તેમની સ્થિતિ ગંભીર હોવાથી, ડૉક્ટરે તાત્કાલિક પ્રાથમિક સારવાર આપીને તમામને વધુ સારવાર માટે વડોદરાની SSG હોસ્પિટલ ખાતે રિફર કર્યા હતા. પાંચેય ઈજાગ્રસ્તો પીડાને કારણે જોર જોરથી બૂમો પાડી રહ્યા હતા અને એમ્બ્યુલન્સમાં બેસી શકે તેવી સ્થિતિમાં પણ ન હતા. આથી, તેમને વડોદરા લઈ જવા માટે એક પછી 3 એમ્બ્યુલન્સ અને એક પ્રાઇવેટ ફોર વ્હીલ વાહનનો ઉપયોગ કરવામાં આવ્યો હતો. સ્થાનિક પોલીસ ટીમ પણ ઘટનાસ્થળે પર પહોંચી હતી અને આ અકસ્માત કઈ રીતે સર્જાયો તે અંગેની વધુ તપાસ હાથ ધરી છે.

રેલિંગ કૂદીને કાર ફંગોળાઈ

દાહોદ હાઈવે પર કાર બેકાબૂ બનતા રેલિંગ કૂદીને ફંગોળાઈ, 1જ પરિવારના 5 સ્ભ્યો ગંભીર ઈજાગ્રસ્ત

November 13, 2025 | 17:40 IST