Vadodara : ગેંડા સર્કલ પાસે ભયાવહ અકસ્માત, બાઇક સવાર હવામાં ફંગોળાયા, Video Viral

વડોદરા (Vadodara) શહેરમાંથી એક ચોંકાવનારા અકસ્માતના સમાચાર સામે આવ્યા છે. શહેરના વ્યસ્ત ગેંડા સર્કલ પાસે કાર અને બાઇક વચ્ચે જોરદાર ટક્કર થતા ગંભીર દુર્ઘટના સર્જાઈ હતી. આ અકસ્માતની સમગ્ર ઘટનાના CCTV ફૂટેજ પણ સામે આવ્યા છે, જેમાં અકસ્માતની ભયાવહતા સ્પષ્ટ દેખાઈ રહી છે.

કેવી રીતે સર્જાયો અકસ્માત?

CCTV ફૂટેજ અનુસાર, ચાર રસ્તા પરથી પસાર થઈ રહેલી એક કાર સાથે બાઇક ધડાકાભેર અથડાઈ. પ્રાથમિક દ્રષ્ટિએ જણાઈ રહ્યું છે કે, રસ્તો ક્રોસ કરવાની ઉતાવળમાં આ અકસ્માત સર્જાયો હતો. ટક્કર એટલી જોરદાર હતી કે, બાઇક પર સવાર એક મહિલા અને એક પુરુષ બંને હવામાં ઊંચે ફંગોળાયા હતા, જે દ્રશ્ય ખરેખર હૃદયદ્રાવક હતું.

ગંભીર ઇજાઓ અને રાહદારીઓની ત્વરિત મદદ...

આ ગમખ્વાર અકસ્માતમાં બાઇક સવાર બંને વ્યક્તિઓને ગંભીર ઇજાઓ પહોંચી હતી. ઘટનાસ્થળે હાજર રહેલા રાહદારીઓ એ તાત્કાલિક માનવતા દાખવી, ઈજાગ્રસ્ત બંને લોકોને સમયસર હોસ્પિટલ ખસેડ્યા હતા. આ ઘટના શહેરમાં ટ્રાફિક નિયમોના પાલન અને બેદરકારીથી થતા અકસ્માતો અંગે ફરી એકવાર ગંભીર ચિંતા જગાવી છે.