ગુજરાતમાં છેલ્લા એક સપ્તાહથી હવામાનનો મિજાજ સંપૂર્ણપણે બદલાઈ ગયો છે. ચોમાસુ વિદાય લીધા છતાં, રાજ્યભરમાં કમોસમી વરસાદનો કહેર જોવા મળી રહ્યો છે. ખાસ કરીને સૌરાષ્ટ્રના અમરેલી અને ભાવનગર જિલ્લામાં મેઘરાજાએ રીતસરનું તાંડવ મચાવ્યું છે. ગઈકાલે શુક્રવારે રાજ્યના કુલ 141 તાલુકાઓમાં નોંધપાત્ર વરસાદ નોંધાયો હતો, જેણે ખેડૂતોની ચિંતામાં વધારો કર્યો છે.
ગુજરાતમાં કમોસમી વરસાદે છેલ્લા એક દશકાનો રેકોર્ડ તોડ્યો છે. ઓક્ટોબરમાં કમોસમી વરસાદ 3 ઇંચ કરતા પણ વધુ વરસ્યો છે જેને ખેડૂતોના પાકમાં ભારે નુકસાન કર્યું છે. સમગ્ર ગુજરાતમાં ઠંડા પવન સાથે વાતાવરણમાં ગજબનો પલટો જોવા મળી રહ્યો છે.&nbsp;
રાજુલામાં જળબંબાકારની સ્થિતિ
છેલ્લાં 24 કલાકના આંકડા જોઈએ તો, અમરેલીનો રાજુલા તાલુકો રાજ્યમાં સૌથી વધુ વરસાદનો હોટસ્પોટ બન્યો છે. હવામાન વિભાગના રિપોર્ટ મુજબ, રાજુલામાં 88 મિ.મી. (3.46 ઈંચ) વરસાદ નોંધાયો, જેના પગલે નીચાણવાળા વિસ્તારોમાં જળબંબાકારની સ્થિતિ સર્જાઈ હતી. રાજુલાની સાથે સાથે અમરેલીના ખાંભામાં 76 મિ.મી., ભાવનગરના તળાજામાં 63 મિ.મી., જાફરાબાદમાં 52 મિ.મી. અને મહુવામાં 49 મિ.મી. વરસાદ વરસ્યો છે, જે સૌરાષ્ટ્રમાં મેઘરાજાના ભારે પ્રકોપની સાબિતી આપે છે.
રાજ્યવ્યાપી મેઘમહેર
કુલ 10 તાલુકાઓમાં 30 મિ.મીથી વધુ વરસાદ નોંધાયો છે, જેમાં સૌરાષ્ટ્રના રાજુલા, ખાંભા, તળાજા, જાફરાબાદ, મહુવા, ઉના, પદ્ધરી, ખંભાળિયા, લીંબડી અને ચોટીલાનો સમાવેશ થાય છે. આ સિવાય રાજ્યના અનેક વિસ્તારોમાં સારો વરસાદ નોંધાયો છે. નર્મદા, ભાવનગર, સુરેન્દ્રનગર, જામનગર, બોટાદ, નવસારી અને પોરબંદર જેવા જિલ્લાઓના તાલુકાઓમાં પણ 25થી 26 મિ.મી. જેટલો વરસાદ વરસ્યો છે. સુરત, વલસાડ, જામનગર, નવસારી, ભરૂચ, જૂનાગઢ, ગીર સોમનાથ સહિતના જિલ્લાઓમાં પણ હળવાથી મધ્યમ વરસાદ નોંધાતા રાજ્યવ્યાપી મેઘમહેર જોવા મળી છે. જોકે, ઉત્તર ગુજરાતના અરવલ્લી, મહેસાણા અને બનાસકાંઠાના કેટલાક ભાગોમાં વરસાદનું જોર ઓછું રહ્યું છે.
કપાસ અને મગફળીના પાકને મોટું નુકસાન થવાની ભીતિ
આ કમોસમી વરસાદે ખેડૂતોની ઊંઘ હરામ કરી દીધી છે. તૈયાર થયેલા કપાસ, મગફળી અને શિયાળુ પાકોને મોટા પાયે નુકસાન થવાની ભીતિ છે. એક તરફ કુદરતનો પ્રકોપ અને બીજી તરફ સરકાર તરફથી તાત્કાલિક ખરીદી અને સહાયની અપેક્ષાએ ખેડૂતો આકાશ તરફ મીટ માંડીને બેઠા છે.

ગુજરાતમાં કમોસમી વરસાદનું તાંડવ

મોસમે બદલ્યો મિજાજ! ગુજરાતમાં મેઘરાજાનું રૌદ્ર સ્વરૂપ, જાણો તમારા વિસ્તારનો હાલ!

November 1, 2025 | 17:17 IST