રાજ્યના 31 જિલ્લામાં 24 કલાકમાં કમોસમી વરસાદ, ભરૂચ અને સૌરાષ્ટ્રમાં હાલાકી

રાજ્યમાં વાવાઝોડાની સંભાવનાઓ વચ્ચે કમોસમી વરસાદે ગુજરાતના અનેક વિસ્તારોમાં ધમાકેદાર એન્ટ્રી કરી છે. છેલ્લા 24 કલાકમાં રાજ્યના કુલ 31 જિલ્લાઓમાં વરસાદ નોંધાયો છે. આ વરસાદનું મુખ્ય કારણ અરબ સાગરમાં ઉભરાતું લો-પ્રેશર સિસ્ટમ છે, જેના લીધે દક્ષિણ ગુજરાત અને સૌરાષ્ટ્રમાં વાતાવરણ પલટાઈ ગયું છે.

સૌરાષ્ટ્ર અને દક્ષિણ ગુજરાતમાં ધોધમાર વરસાદ

20 મેની રાતથી રાજ્યમાં અનેક સ્થળોએ કમોસમી વરસાદ શરૂ થયો. ખાસ કરીને ભરૂચમાં વહેલી સવારથી કાળા વાદળો સાથે ધોધમાર વરસાદ વરસ્યો હતો. પરિણામે ઉમવાડા રેલ્વે અંડરબ્રિજ જેવી જગ્યાએ પાણી ભરાઈ ગયા હતા. અત્યારસુધીમાં શહેરમાં અંદાજે 1 ઈંચ જેટલો વરસાદ નોંધાયો છે.

જૂનાગઢમાં 2 કલાકમાં 2.44 ઈંચ વરસાદ

મેઘરાજાની મહેર જૂનાગઢ જિલ્લાના વિસાવદરમાં ખાસ જોવા મળી હતી. અહીં માત્ર 2 કલાકમાં 2.44 ઈંચ વરસાદ પડ્યો હતો. રાજકોટ અને અમરેલીના વડિયામાં પણ ભારે વરસાદ પડ્યો હતો. વડિયાના ઠુંઢિયા પીપળીયા ગામ પાસેની નદીમાં પૂર જેવી સ્થિતિ સર્જાઈ હતી. સુરત જિલ્લાના બારડોલી પંથકમાં પણ ભારે પવન સાથે વરસાદ નોંધાયો હતો.

કમોસમી વરસાદનું કારણ

હવામાન વિભાગ મુજબ, કર્ણાટકના દરિયાકાંઠે અરબ સાગરમાં વિકસતી સિસ્ટમને કારણે ગુજરાતમાં આ સ્થિતિ સર્જાઈ છે. હાલ આ સિસ્ટમ હજુ ડિપ્રેશનમાં પરિવર્તિત થઈ નથી, પરંતુ શક્ય તેટલું જલ્દી લો-પ્રેશર બની શકે છે. તે સમયે તેની દિશા વધુ સ્પષ્ટ થશે.

આજે પણ ભારે વરસાદની આગાહી

21 મેના રોજ હવામાન વિભાગે વધુ વરસાદની આગાહી કરી છે. સૌરાષ્ટ્રના જૂનાગઢ, અમરેલી, રાજકોટ, ભાવનગર, તેમજ દક્ષિણ ગુજરાતના ભરૂચ, નર્મદા, વલસાડ, ડાંગ, નવસારી સહિત અનેક વિસ્તારોમાં હળવાથી મધ્યમ વરસાદની શક્યતા છે. ગાજવીજ અને તીવ્ર પવનની પણ શક્યતા છે.