ગાંધીનગરમાં ટાઈફોઈડનો કહેર: 100થી વધુ બાળકો દાખલ

ગાંધીનગરમાં જળજન્ય રોગચાળાનો વિસ્ફોટ: દૂષિત પાણીએ 100થી વધુ બાળકોને હોસ્પિટલ ભેગા કર્યા

ગુજરાતના પાટનગર ગાંધીનગરમાં પીવાના પાણીમાં ગટરનું પાણી ભળી જવાની ગંભીર બેદરકારીને કારણે ટાઈફોઈડનો મોટો ફાટવો થયો છે. શહેરના સેક્ટર-24, 28 અને આદિવાડા જેવા વિસ્તારોમાં સ્થિતિ અત્યંત ગંભીર બની છે. છેલ્લા ત્રણ દિવસમાં પોઝિટિવ કેસોમાં 50 ટકાનો ઉછાળો આવતા સિવિલ હોસ્પિટલ દર્દીઓથી ઉભરાઈ રહી છે.

તંત્રની બેદરકારી અને સ્માર્ટ સિટીની નિષ્ફળતા : 

સ્માર્ટ સિટી પ્રોજેક્ટ અંતર્ગત કરોડોના ખર્ચે નખાયેલી નવી પાઈપલાઈનોમાં અનેક જગ્યાએ લીકેજ જોવા મળ્યા છે. આ લીકેજ દ્વારા પીવાના પાણીમાં અશુદ્ધિઓ ભળી રહી હોવાનું તપાસમાં બહાર આવ્યું છે. લેબોરેટરી રિપોર્ટમાં પણ પુષ્ટિ થઈ છે કે વિતરણ કરવામાં આવતું પાણી પીવાલાયક નથી. આ સ્થિતિને પગલે ગાંધીનગર શહેર વસાહત મહાસંઘે ઉગ્ર જનઆંદોલનની ચીમકી આપી છે.

કેન્દ્રીય ગૃહમંત્રી અને નાયબ મુખ્યમંત્રી હરકતમાં : 

પરિસ્થિતિની ગંભીરતાને જોતા કેન્દ્રીય ગૃહમંત્રી અમિત શાહે જિલ્લા કલેક્ટર સાથે ટેલિફોનિક ચર્ચા કરી સતત મોનિટરિંગ શરૂ કર્યું છે. નાયબ મુખ્યમંત્રી હર્ષ સંઘવીએ ઉચ્ચ અધિકારીઓ સાથે બેઠક યોજી સિવિલ હોસ્પિટલની મુલાકાત લીધી હતી. હાલમાં 22 ડોક્ટરોની વિશેષ ટીમ અને 40 હેલ્થ ટીમો અસરગ્રસ્ત વિસ્તારોમાં ઘરે-ઘરે સર્વે કરી રહી છે.

સિવિલ હોસ્પિટલમાં નવો વોર્ડ શરૂ કરાયો : 

હોસ્પિટલના સુપરિન્ટેન્ડેન્ટના જણાવ્યા મુજબ, અત્યારે 104થી વધુ બાળકો સારવાર હેઠળ છે. દર્દીઓનો ધસારો વધતા તાત્કાલિક ધોરણે નવો વોર્ડ નંબર 604 કાર્યરત કરવામાં આવ્યો છે. બાળકોમાં હાઈ ગ્રેડ ફીવર અને ઉલટી-પેટમાં દુખાવા જેવા લક્ષણો જોવા મળી રહ્યા છે. તંત્ર દ્વારા નાગરિકોને પાણી ઉકાળીને પીવા અને ખોરાકમાં ખાસ સાવચેતી રાખવા અપીલ કરવામાં આવી છે.

રાષ્ટ્રીય સ્તરે જળ સંકટની સ્થિતિ : 

ઉલ્લેખનીય છે કે ઇન્દોરમાં પણ દૂષિત પાણીના કારણે અનેક મોત નિપજ્યા છે. ભારતમાં દૂષિત પાણીને કારણે વર્ષે લાખો લોકો જીવ ગુમાવે છે. આ સ્થિતિને જોતા આગામી સમયમાં વોટર પ્યુરીફાયર પર જીએસટી ઘટાડવા અંગે પણ વિચારણા ચાલી રહી છે.