જામનગરમાં અનંત અંબાણીના લગ્ન પ્રસંગમાં ચોરી કરવા ગયેલી ત્રિચી ગેંગ ઝડપાઇ

જામનગરમાં યોજાયેલા ઉદ્યોગપતિ મુકેશ અંબાણીના પુત્ર અનંત અંબાણીના વેડિંગ પ્રસંગમાં ચોરી કરવા પહોંચેલી તામિલનાડુની કુખ્યાત ત્રિચી ગેંગ વડોદરા પોલીસના હાથે આખરે ઝડપાઇ ગઇ છે. વડોદરા પોલીસે જ્યારે આ ગેંગને પકડી ત્યારે આ સ્ફોટ ખુલાસો થયો હતો. આ ટોળકી કારના ગ્લાસ તોડીને ચોરી કરવામાં માહેર છે અને તેણે અડધા ભારતમાં આ પ્રકારે ચોરી કરીને આતંક મચાવ્યો છે. 

વડોદરા ક્રાઈમ બ્રાન્ચે ઘણા રાજ્યોમાં ગિલોઇથી કારના કાચ તોડી ચોરી કરતી આંતર રાજ્ય ત્રિચી ટોળકીને ઝડપી પાડી છે.આ ટોળકીના 12 સભ્યો પોલીસના હાથે ઝડપાયા છે. તામિલનાડુની આ ટોળકી  કારમાંથી લેપટોપ, આઈફોન, ટેબ્લેટ્સ, રોકડા સહિતની ચીજ વસ્તુઓની ચોરી કરતી હતી.

પોલીસે આ ટોળકીને ઝડપી લઇને ગુજરાત, મહારાષ્ટ્ર અને ગોવા , શિરડી, પુણે અને નાસિક સહિતના સ્થળો પર થયેલી 25 ચોરીનો ભેદ ઉકેલ્યો છે. આ ગેંગનો લીડર  જગન બાલા સુબ્રમણ્યમ સેવર છે.

ટોળકીની ચોંકાવનારી પૂછપરછમાં ચોંકાવનારો ખુલાસો થયો હતો કે  જામનગરમાં યોજાયેલા અનંત અંબાણીના વેડિંગ પ્રસંગમાં પણ ગેંગના સાગરીતો પહોચ્યા હતા પણ અહીં  હાઇ સિક્યોરિટી હોવાથી તેમાં ચોરી કરી શક્યા ન હતા.

આ ટોળકી વડોદરામાં ચોરી કરવાના ઇરાદે ફરતી હતી પણ તે ચોરી કરે તે પહેલાં જ વડોદરા પોલીસે બાતમીના આધારે આજવા રોડ ખાતેથી તમામને પકડી પાડ્યા હતા.

તપાસમાં બહાર આવ્યું કે આ તમામ આરોપી તામિલનાડુ રામજીનગરમાં રહે છે અને તેમની આ ત્રીજી પેઢી છે જે આ પ્રકારે ચોરી કરી રહી છે. 

પોલીસે  આરોપી જગન બાલા સુબ્રમણ્યમ સેરવે , ઉદયકુમાર સેરવે, હરીશ મુથુરાજ, વિજ્ઞેશ્વર સેરવે, કિરણકુમાર સેરવે, સેલ્વકુમાર સેરવે, અગિલન સેરવે, ઐયપન સેરવે, ગોવર્ધન સેરવે, વેંકટેશ કોર્ચા, સેન્દીલ સેરવે, મોહન સેરવેને ઝડપી પાડ્યા છે.