દ્વારકામાં કરૂણાંતિકા, માર્ગ અકસ્માતમાં બાળકો સહિત સાતના મોત, ૩૦ ઇજાગ્રસ્ત

શુક્રવારે મોડી સાંજે એક ખાનગી બસ ડ્રાઈવરે સ્ટિયરીંગ કાબૂ ગુમાવતા ગંભીર અકસ્માત થતાં, સાત વ્યક્તિના સ્થળ પર કમકમાટી ભર્યા મોત થયા હતા, તેમાં બે બાળકોનો સમાવેશ થાય છે. પ્રાથમિક માહિતી પ્રમાણે ૩૦ જેટલી વ્યક્તિઓને નાની મોટી ઇજા થઇ હતી, જેમને  ખંભાળિયા સ્થિત સરકારી હોસ્પિટલમાં દાખલ કરાયા હતા. ગંભીર રીતે ઇજા પામેલી વ્યક્તિઓને વધુ સારવાર અર્થે જામનગર ખસેડાયા હતા.   પ્રાથમિક માહિતી પ્રમાણે દ્વારકા થી જામનગર માર્ગ પર જઇ રહી ખાનગી ટ્રાવેલ્સની બસના ડ્રાઇવરે સ્ટિયરિંગ ઉપર કાબૂ ગુમાવતા, બસ ડિવાઇડર કૂદી સામે લેન પર ચડી જતાં, સામેથી આવતી બે કાર એક સ્વિફ્ટ ડિઝાયર અને ઇકો કાર સાથે અથડાઈને રોડને અડીને આવેલ નાળામાં ખાબકી હતી. બસને આડે એક પશુ આવી જતાં, તેને ડ્રાઇવર બચાવવા ગયો અને અકસ્માત સર્જાયો, તેવી માહિતી પણ પ્રાપ્ત થઇ છે.   ઘટનાની જાણ થતાં જિલ્લાના ડેપ્યુટી સુપરિન્ટેન્ડેન્ટ ઓફ પોલીસ સાગર રાઠોડ તેમની ટીમ સાથે ઘટના સાથે પહોંચી ગયા હતા, અકસ્માતની તપાસ શરૂ કરવા સાથે ઇજાગ્રસ્તને હોસ્પિટલ પહોચાડવાની કામગીરી શરૂ કરી હતી. તદઉપરાંત નેશનલ હાઇવે પરના ટ્રાફિક નિયંત્રણ અને ડાયવર્ઝન ની કામગીરી હાથ ધરી હતી.   જે મૃતકોની ઓળખ થઈ છે તેમાં હેતલ ઠાકોર, પ્રિયાંસી ઠાકોર. વિરેન ઠાકોર, ચિરાગ બરાડીયા, બે નાના બાળકો તાન્યા અને હિમાંશુ અને એક સ્ત્રીની ઓળખ થઇ શકી નથી.