વડાપ્રધાન મોદીની ગુજરાત યાત્રા માટે કડક સુરક્ષા, પાંચ શહેરોમાં હાઈ એલર્ટ

વડાપ્રધાન નરેન્દ્ર મોદી 26 અને 27 મેના રોજ બે દિવસના ગુજરાત પ્રવાસે આવનાર છે. વડાપ્રધાનના  સ્વાગત માટે રાજ્યનું તંત્ર સજ્જ બનીને તડામાર તૈયારીઓમાં લાગી ગયું છે. વડાપ્રધાનના આગમન પૂર્વે એસપીજી (Special Protection Group)ની ટીમે ગુજરાતમાં ધામા નાખ્યા છે. પાંચ શહેરોમાં હાઈએલર્ટ ઉપર મૂકીને તમામ સુરક્ષા વ્યવસ્થાનો મોરચો સંભાળી લીધો છે.

વડાપ્રધાન મોદી અમદાવાદ, ગાંધીનગર, વડોદરા, દાહોદ અને કચ્છ જિલ્લાના વિવિધ સ્થળોની મુલાકાત લેશે. વડાપ્રધાનના રોડ શો અને જાહેર સભાઓ યોજાનાર છે તે સ્થળોને હાઈ એલર્ટ જાહેર કરવામાં આવ્યા છે. હાઈએલર્ટ જાહેર કરેલા શહેરોમાં થ્રી-લેયર સુરક્ષા વ્યવસ્થા ગોઠવવામાં આવી છે. આ સુરક્ષા વ્યવસ્થામાં સ્થાનિક પોલીસ, રાજ્ય રિઝર્વ ફોર્સ અને એસપીજી એકમોનો સમાવેશ કરાયો છે.

વડાપ્રધાનની સુરક્ષામાં કોઈપણ ખામી ન રહે તે માટે રાજ્ય પોલીસ વડા વિકાસ સહાય વ્યક્તિગત રીતે દેખરેખ રાખી રહ્યા છે. તેમણે તમામ સ્થળ પર જઈને નિરીક્ષણ શરૂ કરી દીધું છે. દરેક સ્થળની સ્થિતિના આધારે અધિકારીઓને સ્પષ્ટ દિશાનિર્દેશ આપી રહ્યા છે.

અમદાવાદ શહેરમાં પોલીસ કમિશનર જ્ઞાનેન્દ્રસિંહ મલિકના જણાવ્યા અનુસાર, પીએમ મોદીના રૂટ પર સઘન સુરક્ષા વ્યવસ્થા તૈયાર કરવામાં આવી છે. આગામી દિવસોમાં તેનું રિહર્સલ પણ કરવામાં આવશે. ટ્રાફિક માટે પણ વિશિષ્ટ પ્લાન તૈયાર કરાયો છે. જેમાં ટ્રાફિક ડાયવર્ઝન, એએમટીએસની સેવા અને પાર્કિંગ વ્યવસ્થાનો સમાવેશ કરાયો છે. વડાપ્રધાનના રોડ શોના દિવસે એરપોર્ટ તરફ જતાં મુસાફરોને ઓછામાં ઓછા બે કલાક પહેલા નીકળી જવાની સલાહ આપવામાં આવી છે.

વડાપ્રધાન જે શહેરમાં જાહેર સભાઓને સંબોધન અને રોડ શો કરવાના છે ત્યાં એસપીજીએ સુરક્ષા વ્યવસ્થા સંભાળી લીધી છે. દરેક સ્થળે સ્થાનિક કક્ષાના અધિકારીઓને વિશેષ જવાબદારી સોંપવામાં આવી છે. સુરક્ષા વ્યવસ્થાની ખાતરી માટે સતત કોમ્બિંગ ઓપરેશન અને એલઆઈબીના ઇનપુટના આધારે એલર્ટ જારી કરવામાં આવ્યા છે.

સત્તાવાર સૂત્રોના જણાવ્યા મુજબ વડાપ્રધાન મોદીના પ્રવાસને ધ્યાનમાં રાખીને અમદાવાદ, ગાંધીનગર, દાહોદ, કચ્છ અને વડોદરામાં ડ્રોનના ઉપયોગ પર પ્રતિબંધ લાદવામાં આવ્યો છે. દરેક જિલ્લાના એસપી દ્વારા જાહેરનામા બહાર પાડીને તેનો ચુસ્તપણે અમલ કરવામાં આવશે. કોઈ શરારતી કૃત્ય કે ભાંગફોડ થાય નહી તે માટે જાહેરનામા બહાર પાડવામાં આવનાર છે.

વડાપ્રધાન નરેન્દ્ર મોદીનો ગુજરાત પ્રવાસ રાજકીય રીતે પણ મહત્વનો માનવામાં આવી રહ્યો છે. ઓપરેશન સિંદૂર બાદ પ્રથમ વખત આવતા હોવાના કારણે તેમજ પ્રદેશ ભાજપ પ્રમુખની વરણી અને મંત્રીમંડળના વિસ્તરણની ચર્ચાઓ વચ્ચે વડાપ્રધાન આવી રહ્યા છે. તેથી રાજકીય વર્તુળો તેમના પ્રવાસને અલગ રીતે જોઈ રહ્યા છે. જો કે, વડાપ્રધાનના પ્રવાસ પહેલા રાજ્યના પાંચ મોટા શહેરોમાં તમામ સુરક્ષા વ્યવસ્થાની ગોઠવણી કરી દેવામાં આવી છે. એસપીજીની હાજરી અને રાજ્યના પોલીસ તંત્રની સક્રિયતા સાથે ગુજરાત આગામી બે દિવસ દરમિયાન ‘હાઈ સિક્યોરિટી ઝોન’ બની જશે તે ચોક્કસ છે.