<h3 dir="auto"><span style="font-size: 12pt; font-family: tahoma, arial, helvetica, sans-serif;">અમદાવાદ, ગાંધીનગર અને કલોલની અનેક પ્રતિષ્ઠિત શાળાઓને આજે સવારે ઈ-મેલ દ્વારા બોમ્બથી ઉડાવી દેવાની ધમકી મળી હતી. ધમકીભર્યા મેલમાં બપોરે ૧:૧૧ વાગ્યે બ્લાસ્ટ કરવાની વાત લખાઈ હતી, સાથે અમદાવાદની શાળાઓથી સાબરમતી જેલ સુધી ધમાકાની ધમકી આપવામાં આવી હતી. મેલમાં કેન્દ્રીય ગૃહમંત્રી અમિત શાહ અને ગેંગસ્ટર લોરેન્સ બિશ્નોઈને પણ ટાર્ગેટ કરવાનો ઉલ્લેખ હતો. કેટલાક મેલમાં ખાલિસ્તાનનો પણ ઉલ્લેખ કરવામાં આવ્યો હતો.</span></h3>
<p dir="auto">ધમકી મળતાં જ પોલીસ, બોમ્બ ડિટેક્શન અને ડિસ્પોઝલ સ્ક્વોડ (BDDS), ડોગ સ્ક્વોડ તેમજ ફાયર વિભાગની ટીમો શાળાઓમાં પહોંચી ગઈ હતી. તમામ શાળાઓમાં સઘન તપાસ કરવામાં આવી, પરંતુ કોઈપણ શંકાસ્પદ વસ્તુ મળી નહોતી. પોલીસના પ્રાથમિક અનુમાન મુજબ આ ધમકીઓ હોબાળો હોવાની શક્યતા છે.</p>
<h4 dir="auto">અસરગ્રસ્ત શાળાઓની યાદી</h4>
<ul dir="auto">
<li>ઝેબર સ્કૂલ, થલતેજ</li>
<li>મહારાજા અગ્રસેન વિદ્યાલય, ગુરુકુળ રોડ</li>
<li>ડીએવી ઇન્ટરનેશનલ સ્કૂલ, મકરબા</li>
<li>ઝાયડસ સ્કૂલ ફોર એક્સલન્સ, વેજલપુર/ગોધાવી</li>
<li>ઉદ્ગમ સ્કૂલ, થલતેજ</li>
<li>નિર્માણ હાઈ સ્કૂલ, વસ્ત્રાપુર</li>
<li>ડીપીએસ બોપલ</li>
<li>તુલિપ ઇન્ટરનેશનલ સ્કૂલ, બોપલ</li>
<li>ગ્લોબલ ઇન્ડિયન ઇન્ટરનેશનલ સ્કૂલ (GIIS), ચાંદખેડા</li>
<li>ડિવાઇન ચાઇલ્ડ ઇન્ટરનેશનલ સ્કૂલ, અડાલજ</li>
<li>આવિષ્કાર સ્કૂલ, કલોલ</li>
<li>જેમ્સ એન્ડ જ્વેલ્સ જેનેસિસ સ્કૂલ, ખોરજ-ખોડિયાર</li>
<li>અમદાવાદ ઇન્ટરનેશનલ સ્કૂલ, વસ્ત્રાપુર</li>
<li>મહાત્મા ગાંધી ઇન્ટરનેશનલ સ્કૂલ, મીઠાખળી</li>
<li>માઉન્ટ કાર્મેલ હાઈ સ્કૂલ, આશ્રમ રોડ</li>
<li>જે.જી. ઇન્ટરનેશનલ સ્કૂલ, સોલા</li>
<li>સત્ય વિકાસ સ્કૂલ, સિંધુભવન રોડ</li>
<li>પ્રકાશ હાઈયર સેકન્ડરી સ્કૂલ, બોડકદેવ</li>
</ul>
<p dir="auto">સુરક્ષાના ભાગરૂપે કેટલીક શાળાઓએ વિદ્યાર્થીઓને ઘરે મોકલી દીધા હતા અને બપોરની પાળીમાં રજા જાહેર કરી હતી. ડીએવી ઇન્ટરનેશનલ સ્કૂલના પ્રિન્સિપાલે જણાવ્યું કે સવારે ૯ વાગ્યે મેલ મળ્યો હતો અને તરત જ પોલીસને જાણ કરી વાલીઓને મેસેજ કરીને બાળકોને સુરક્ષિત ઘરે મોકલવામાં આવ્યા.</p>
<p dir="auto">આ ઘટનાને પગલે ગાંધીનગર સચિવાલય અને સીએમ ઓફિસ પાસે પણ ડોગ સ્ક્વોડ દ્વારા ચેકિંગ હાથ ધરાયું હતું. મુખ્યમંત્રી ભૂપેન્દ્ર પટેલની અધ્યક્ષતામાં યોજાયેલી કેબિનેટ બેઠકમાં આ મુદ્દે વિગતવાર ચર્ચા કરવામાં આવી હતી. સરકારી પ્રવક્તા મંત્રી જીતુ વાઘાણીએ જણાવ્યું કે પોલીસે તાત્કાલિક કાર્યવાહી કરી છે અને પરિસ્થિતિ નિયંત્રણમાં છે.</p>
<p dir="auto">અમદાવાદ શહેર ડીઈઓ રોહિત ચૌધરીએ તમામ શાળાઓને સંબંધિત પોલીસ સ્ટેશનમાં લેખિત ફરિયાદ નોંધાવવા સૂચના આપી છે. પોલીસ હવે ઈ-મેલના સ્ત્રોતની તપાસ કરી રહી છે.</p>

શાળાઓને બોમ્બથી ઉડાવી દેવાની ધમકી

અમિત શાહ અને લોરેન્સ બિશ્નોઈને પણ ટાર્ગેટ કરવાની વાત, તપાસમાં કંઈ મળ્યું નહીં

December 17, 2025 | 22:18 IST