પાટણ કલેક્ટર કચેરીમાં ખેડૂતોને બોલાવી અધિકારી ગાયબ

કહેવાતા ખેતી પ્રધાન દેશમાં ખેડૂતોની કેવી હાલત છે તેનું જીવંત ઉદાહરણ પાટણ જિલ્લામાં જોવા મળ્યું છે. જેટકો કંપની સાથેના વાંધા મામલે સુનાવણી માટે ખેડૂતોને ધોમધખતા તાપમાં પાટણની કલેક્ટર કચેરીમાં બોલાવ્યા બાદ એકપણ અધિકારીએ મળવાની તસ્દી લીધી નહી. ત્યારે સવાલ એ થાય છે કે, શું આ દેશમાં ખેડૂતોની કોઈ કિંમત જ નથી? શું સરકારી બાબુઓ માટે ધરતીપુત્રો માત્ર એક મજાક બનીને રહી ગયા છે?

શું છે સમગ્ર મામલો?

પાટણ જિલ્લાના શંખેશ્વર તાલુકાના નાની ચંદુરથી મુજપુર સુધી જેટકો લાઇન નીકળે છે. આ જેટલો લાઈન મુદ્દે મોટીચંદુર અને મેમણા ગામના ખેડૂતોને પાટણ કલેકટર કચેરી ખાતે હિયરીંગ માટે નોટિસ પાઠવી બોલાવવામાં આવ્યા હતા. 19મે 2026ના રોજ બપોરે અઢી થી ત્રણ વાગ્યાના સમયગાળામાં ખેડૂતોને હાજર રહેવા જણાવાયું હતું.

કલેકટર કચેરીએ પહોંચ્યા બાદ ખેડૂતો સાથે જે સ્થિતિ સર્જાઈ તેનાથી ખેડૂતોમાં ભારે નારાજગી જોવા મળી રહી  છે. ખેડૂતોના શબ્દોમાં કહીએ તો, “જાન તેડાવી હોય અને દીકરી ભાગી જાય પછી મુરતિયો પરણ્યા વગર ઘરે પાછો આવે” એવી સ્થિતિ સર્જાઈ હતી. ખેડૂતોને બોલાવ્યા છતાં જવાબદાર અધિકારી મળવા જ આવ્યા નહોતા.

ધોમધખતા તાપમાં આશરે 40 ડિગ્રીથી વધુ ગરમી વચ્ચે 25 થી 30 ખેડૂતો કલેક્ટર કચેરીએ પહોંચ્યા હતાં. ઘણા ખેડૂતો ગામડાંમાંથી ખાનગી વાહન કે ભાડાના વાહન દ્વારા આવ્યા હતા. એક ખેડૂતનો સરેરાશ 500 રૂપિયા જેટલો ખર્ચ ગણીએ તો અંદાજે 15 હજાર રૂપિયા જેટલો ખર્ચ થયો હોવાનો દાવો કરવામાં આવ્યો છે. છતાં તેમને કોઈ જવાબ આપવા કે કોઈ સાંભળવા અધિકારી આવ્યા નહી.

ખેડૂતોએ આક્ષેપ કર્યો કે, જો સરકારી તંત્ર પાસે ખેડૂતોને મળવાનો સમય જ ન હતો તો પછી તેમને શા માટે બોલાવવામાં આવ્યા? શું ખેડૂતોના સમય અને પૈસાની કોઈ કિંમત નથી? ખેડૂતો ભોળા અને નિખાલસ હોઈ શકે, પરંતુ તેઓ મૂર્ખ નથી. શું સરકાર ખેડૂતોને ભાજી-મૂળા સમજે છે? આવા કટાક્ષભર્યા  અને વેધક સવાલો ઉઠાવીને ખેડૂતોએ રોષ વ્યક્ત કર્યો છે.

ક્યાં છે કહેવાતા ખેડૂત નેતાઓ?

ખેડૂતોનું કહેવું છે કે કલેકટર તો દૂર રહ્યા. જેટકો કંપનીના જવાબદાર અધિકારીઓ પણ હાજર રહ્યા નહોતા. જેના કારણે ખેડૂતોમાં એવો સંદેશ ગયો કે, સરકાર અને તંત્ર માટે ખેડૂતોની સમસ્યાઓ બાબતે ગંભીર નથી. ખેતીપ્રધાન દેશની વાતો કરનાર સરકાર પાસે ખેડૂતોની વાત સાંભળવા માટે સમય જ ન હોય તો પછી ખેડૂતો ન્યાય માટે ક્યાં જાય. કિસાન સંઘ હોય કે અન્ય ખેડૂત સંગઠનો, ખેડૂતો સાથે આવી ઘોર મજાક થતી હોય તો આવા સમયે કહેવાતા ખેડૂત નેતાઓ શું કરે છે? મોટા ઝબ્બા પહેરીને નેતાજી બનીને ફરતાં નેતાઓની ફરજ નથી કે ખેડૂતોના પ્રશ્નોનું ધ્યાન રાખે?

જેટકો કંપની સામે ખેડૂતો દ્વારા ઉઠાવવામાં આવેલા વાંધાઓને ગંભીરતાથી સાંભળવાની જગ્યાએ તેમને માત્ર કચેરીએ બોલાવી ઔપચારિકતા પૂર્ણ કરવામાં આવી હોય તેવી લાગણી ખેડૂતો વ્યક્ત કરી રહ્યા છે. ત્યારે આ માત્ર બેદરકારી નહીં પરંતુ ખેડૂતોના સ્વાભિમાનનું અપમાન છે. આ સમગ્ર ઘટનાને પગલે હવે ખેડૂતોમાં ભારે રોષ જોવા મળી રહ્યો છે. નારાજ ખેડૂતો હવે સરકાર અને જિલ્લા વહિવટીતંત્ર સામે આંદોલનનો માર્ગ અપનાવવાના મૂડમાં છે.