વિમાન દુર્ઘટનાએ ઉજાડ્યો પરિવાર, ભાવુક બની દીકરી

પ્લેન દુર્ઘટનાને આજે એક વર્ષ પૂર્ણ થયું છે, પરંતુ અનેક પરિવારો માટે આ ઘાવ હજુ પણ તાજા છે. સુરતના કોસંબાના  તરસાડી ગામના અર્જુનસિંહ વાસડીયા અને તેમની પત્નીનું પણ આ દુર્ઘટનામાં કરુણ મોત થયું હતું. એક વર્ષ બાદ પણ પરિવાર આ આઘાતમાંથી સંપૂર્ણપણે બહાર આવી શક્યો નથી. ખાસ કરીને તેમની દીકરી મુક્તિ વાસડીયા માટે માતા-પિતાની યાદો આજે પણ આંખોમાં આંસુ લાવી દે છે.

છ મહિના સુધી સમગ્ર પરિવાર ભારે માનસિક આઘાત અને ડિપ્રેશનમાં રહ્યો
મૃતક દંપતિની દીકરી મુક્તિ વાસડીયા એ જણાવ્યું કે જ્યારે તેઓ માતા-પિતાના મૃતદેહ લેવા ગયા હતા ત્યારે ત્યાંના ભયાનક દ્રશ્યો જોઈને કંપારી છૂટી ગઈ હતી. તે ક્ષણો આજે પણ તેમના મનમાંથી ભૂંસાઈ શકી નથી.પરિવારના જણાવ્યા અનુસાર, દુર્ઘટના બાદ ચારથી છ મહિના સુધી સમગ્ર પરિવાર ભારે માનસિક આઘાત અને ડિપ્રેશનમાં રહ્યો હતો. માતા-પિતાની અચાનક વિદાયે પરિવારને અંદરથી હચમચાવી નાખ્યો હતો. મુક્તિ વાસડીયાનું સપનું એરલાઇન્સ ક્ષેત્રમાં કારકિર્દી બનાવવાનું હતું,પરંતુ આ દુર્ઘટના બાદ તેમણે પોતાનું એ સપનું પણ પડતું મૂકી દીધું છે. દુર્ઘટનાએ તેમના જીવનની દિશા જ બદલી નાંખી છે. જે દીકરીને મળવા માટે તેઓ વિદેશ જવાના હતા.આ ઘટના બાદ એ દીકરી પણ આજે ઇન્ડિયા આવી ગઈ છે અને ફરીથી એ દીકરી વિદેશ પણ ગઈ નથી આજે હવે તેઓને પ્લેનમાં બેસતા બીક લાગે છે. પરિવારે વધુમાં આક્ષેપ કર્યો છે કે દુર્ઘટના બાદ સહાય અને માર્ગદર્શન માટે એરલાઇન્સ કંપની દ્વારા આપવામાં આવેલા સંપર્ક નંબર અને ઇ-મેલ પર હવે યોગ્ય પ્રતિસાદ મળતો નથી. જેના કારણે પરિવાર આજે પણ અનેક પ્રશ્નો અને મુશ્કેલીઓનો સામનો કરી રહ્યો છે.

પળવારમાં ઉજડી ગયો ખુશીઓથી ભરેલો પરિવાર
અર્જુનસિંહ વાસડીયા અને તેમની પત્ની પોતાના પરિવાર માટે માત્ર માતા-પિતા જ નહીં,પરંતુ પરિવારનો મજબૂત આધારસ્તંભ હતા.બંનેનો સ્વભાવ મળતાવડો અને સૌને મદદરૂપ થવાનો હતો. પરિવારના સભ્યો માટે તેઓ પ્રેરણારૂપ હતા. પરંતુ તે કાળમુખા દિવસે બનેલી દુર્ઘટનાએ સમગ્ર પરિવારને ઊંડા શોકમાં ધકેલી દીધો હતો.દુર્ઘટનાના સમાચાર મળ્યા ત્યારે પરિવારના સભ્યોને શરૂઆતમાં વિશ્વાસ જ નહોતો આવ્યો. આશા હતી કે કદાચ કોઈ ચમત્કાર થશે અને તેઓ સલામત પરત ફરશે. પરંતુ થોડા સમય બાદ જ્યારે સત્ય સામે આવ્યું, ત્યારે સમગ્ર પરિવાર પર દુઃખનો પહાડ તૂટી પડ્યો.

દીકરી મુક્તિ માટે સૌથી મોટો આઘાત
માતા-પિતા દરેક સંતાન માટે જીવનનો આધાર હોય છે.પરંતુ જ્યારે એક જ ક્ષણે બંનેનો સાથ છૂટી જાય,ત્યારે એ પીડાને શબ્દોમાં વર્ણવી શકાતી નથી.મુક્તિ વાસડીયા માટે આ દુર્ઘટના માત્ર માતા-પિતાના વિયોગની ઘટના નહોતી, પરંતુ જીવનની સૌથી મોટી ખોટ હતી.એક વર્ષ બાદ પણ જ્યારે માતા-પિતાની વાત આવે છે, ત્યારે મુક્તિની આંખો ભીની થઈ જાય છે. પરિવારના સભ્યો જણાવે છે કે આજે પણ ઘરમાં માતા-પિતાની યાદો દરેક ખૂણે જીવંત છે. તેમની તસવીરો, તેમની વાતો અને તેમની સાથે વિતાવેલી પળો આજે પણ સૌના હૃદયમાં તાજી છે.

સમય વીતી ગયો, પરંતુ યાદો નથી ભૂંસાઈ
સામાન્ય રીતે કહેવાય છે કે સમય દરેક ઘાવને ભરી દે છે. પરંતુ કેટલાક ઘાવ એવા હોય છે, જે ક્યારેય સંપૂર્ણપણે રુઝાતા નથી. વાસડીયા પરિવાર માટે પણ સ્થિતિ કંઈક આવી જ છે. એક વર્ષ પછી પણ પરિવારના સભ્યોને એવું લાગે છે કે જાણે આ ઘટના ગઈકાલની જ હોય.ઘરમાં કોઈ શુભ પ્રસંગ હોય કે સામાન્ય દિવસ, દરેક ક્ષણે અર્જુનસિંહ વાસડીયા અને તેમની પત્નીની ખોટ અનુભવાય છે. તેમની ગેરહાજરી આજે પણ પરિવાર માટે સ્વીકારવી મુશ્કેલ બની રહી છે.

ગામમાં આજે પણ યાદ કરવામાં આવે છે દંપતીને
તરસાડી ગામના લોકો આજે પણ અર્જુનસિંહ વાસડીયા અને તેમની પત્નીને યાદ કરે છે. ગામના લોકોના જણાવ્યા અનુસાર બંને સમાજમાં સૌ સાથે હળીમળીને રહેતા હતા. તેમની સરળતા અને સૌજન્યના કારણે લોકોના દિલમાં તેમણે વિશેષ સ્થાન બનાવ્યું હતું.આ દુર્ઘટના બાદ આખું ગામ પરિવારની સાથે ઊભું રહ્યું હતું. આજે એક વર્ષ પૂર્ણ થતાં ગામના લોકો પણ તેમને શ્રદ્ધાંજલિ અર્પણ કરી રહ્યા છે.

માતા-પિતાની યાદો જ બની સહારો
મુક્તિ વાસડીયા માટે માતા-પિતાની યાદો આજે સૌથી મોટો સહારો છે. તેમની સાથે વિતાવેલી ક્ષણો, તેમના સંસ્કારો અને જીવન માટે આપેલી શિખામણ આજે પણ માર્ગદર્શન પૂરું પાડી રહી છે.પરિવારના સભ્યોનું કહેવું છે કે અર્જુનસિંહ વાસડીયા હંમેશા પરિવારને એકજૂટ રાખવાની વાત કરતા હતા. તેઓ દરેક પરિસ્થિતિમાં હિંમત અને સકારાત્મકતા જાળવવાની સલાહ આપતા હતા. આજે પરિવાર એ જ મૂલ્યોને સાથે લઈને આગળ વધવાનો પ્રયાસ કરી રહ્યો છે.

અનેક પરિવારો માટે હજુ પણ તાજો છે ઘા
અમદાવાદ પ્લેન દુર્ઘટનાને આજે ભલે એક વર્ષ પૂર્ણ થયું હોય, પરંતુ માત્ર વાસડીયા પરિવાર જ નહીં, અનેક પરિવારો માટે આ પીડા આજે પણ અકબંધ છે. ઘણા પરિવારો પોતાના સ્વજનોની યાદો સાથે જીવન જીવવાનો પ્રયાસ કરી રહ્યા છે. કેટલાક માટે હજુ પણ આઘાતમાંથી બહાર આવવું મુશ્કેલ બની રહ્યું છે.
આ દુર્ઘટનાએ સૌને એક જ વાતનો અહેસાસ કરાવ્યો કે જીવન કેટલું અનિશ્ચિત છે. પળવારમાં બધું બદલાઈ શકે છે. પરંતુ આવા સમયે પરિવાર, સમાજ અને સ્વજનોનો સાથ જ સૌથી મોટી શક્તિ બની રહે છે.

યાદો ક્યારેય મરતી નથી હંમેશા જીવંત હોય છે 
એક વર્ષનો સમય વીતી ગયો છે, પરંતુ અર્જુનસિંહ વાસડીયા અને તેમની પત્નીની યાદો આજે પણ પરિવારના હૃદયમાં જીવંત છે.તેમની ગેરહાજરીનું દુઃખ કદાચ ક્યારેય ઓછું નહીં થાય, પરંતુ તેમના દ્વારા આપવામાં આવેલા સંસ્કારો અને પ્રેમ પરિવાર માટે હંમેશા અમૂલ્ય સંપત્તિ બની રહેશે.આજે જ્યારે સમગ્ર દેશ અમદાવાદ પ્લેન દુર્ઘટનાની પહેલી વરસી યાદ કરી રહ્યો છે, ત્યારે તરસાડીના વાસડીયા પરિવારની આંખોમાં પણ પોતાના સ્વજનોની યાદો તાજી થઈ ગઈ છે. સમય આગળ વધતો રહેશે, પરંતુ માતા-પિતાના પ્રેમ અને તેમની યાદો ક્યારેય ભૂંસાઈ શકતી નથી.