શહેરના નોબલનગર વિસ્તારમાં એક હૃદયદ્રાવક ઘટના CCTV કેમેરામાં કેદ થઈ છે, જેમાં એક સગીર વયના યુવકે ત્રણ વર્ષની માસૂમ બાળકી પર કાર ફેરવી દીધી હતી.&nbsp;
આઘાતજનક વાત એ છે કે, આટલો ગંભીર અકસ્માત થવા છતાં બાળકીને કોઈ મોટી ઈજા થઈ ન હતી અને તે કાર નીચેથી નીકળીને તરત જ દોડવા લાગી હતી. આ વીડિયો હાલમાં સોશિયલ મીડિયા પર વાયરલ થઈ રહ્યો છે.
કેવી રીતે બની ઘટના?
પોલીસના જણાવ્યા અનુસાર, આ ઘટના નોબલનગર વિસ્તારમાં આવેલા શિવ બંગ્લોઝના કોમન પ્લોટમાં બની હતી. કાર એક સગીર યુવક ચલાવી રહ્યો હતો. તેજ ગતિએ આવતી કારે રમતી બાળકીને ટક્કર મારી અને તેના પરથી પસાર થઈ ગઈ. આ જોઈને આસપાસના રહેવાસીઓએ બૂમ પાડી, જેના કારણે સગીરે કાર તરત જ રોકી દીધી. CCTCV ફૂટેજમાં સ્પષ્ટ દેખાય છે કે બાળકી કારની નીચે આવી જાય છે, પરંતુ ચમત્કારિક રીતે તે કાર રોકાતાની સાથે જ નીચેથી ઘસાઈને બહાર નીકળે છે અને ઊભી થઈને પોતાના ઘર તરફ દોડવા લાગે છે.
અકસ્માત બાદ બાળકીના માતા-પિતા અને સ્થાનિક લોકોનો મોટો જમાવડો સ્થળ પર થયો હતો. બાળકીની માતાએ પોતાની દીકરી સુરક્ષિત હોવાની રાહત અનુભવવાની સાથે સગીર ડ્રાઇવર પર ગુસ્સો પણ ઠાલવ્યો હતો. ઘટનાસ્થળે હાજર લોકોએ સગીરને ઠપકો આપ્યો હતો. પોલીસે ઘટનાની જાણ થતાં તાત્કાલિક કાર્યવાહી હાથ ધરી છે અને જી ડિવિઝન ટ્રાફિક પોલીસ સ્ટેશનમાં ફરિયાદ નોંધવામાં આવી છે.
સગીર કાર માલિક સામે ગુનો નોંધાયો
જી ડિવિઝન ટ્રાફિક પોલીસ સ્ટેશનના PI વી.ડી. વાઘેલાએ આ ઘટનાની પુષ્ટિ કરી છે અને જણાવ્યું છે કે સગીર ડ્રાઇવર વિરુદ્ધ સંબંધિત કલમો હેઠળ ગુનો નોંધવામાં આવ્યો છે. આ ઉપરાંત, પોલીસે કારના માલિક સામે પણ કાયદેસરની કાર્યવાહી શરૂ કરી છે, કારણ કે સગીરને વાહન ચલાવવા દેવા બદલ તેમની બેદરકારી સામે પગલાં લેવાશે. પોલીસે ઉમેર્યું હતું કે કાર પર નંબર પ્લેટ પણ નહોતી, જેનો ભંગ પણ ફરિયાદમાં ઉમેરવામાં આવશે. આ ગંભીર ઘટનાએ વાહન ચાલકોની બેદરકારી અને માસૂમ બાળકોની સલામતી પર સવાલો ઉભા કર્યા છે.
&nbsp;
&nbsp;

કાર નીચે આવ્યા પછી પણ બાળકી સુરક્ષિત

CCTV ફૂટેજમાં કેદ થયો અકસ્માત, બાળકી જાતે જ કાર નીચેથી બહાર નીકળી દોડી!

October 29, 2025 | 21:23 IST