સપ્તનદી સંગમે વૌઠાનો સુપ્રસિદ્ધ મેળો શરૂ

અમદાવાદ જિલ્લાના ધોળકા તાલુકામાં આવેલા વૌઠા ગામે ગુજરાતનો સુપ્રસિદ્ધ લોકમેળો કાર્તિકી અગિયારસથી કાર્તિકી પૂર્ણિમા (1 નવેમ્બરથી 6 નવેમ્બર) સુધી વિધિવત રીતે શરૂ થઈ ગયો છે. રાજ્યમાં કમોસમી વરસાદી માહોલ હોવા છતાં, આજે સાધુ-સંતો દ્વારા સપ્તનદીના પવિત્ર સંગમ સ્થાને આ મેળાનું ઉદ્ઘાટન કરવામાં આવ્યું હતું.

સપ્તસંગમ અને પૌરાણિક મહત્વ

વૌઠાનો આ મેળો ગુજરાતના સૌથી અનોખા ઉત્સવોમાં સ્થાન ધરાવે છે. તેનું મુખ્ય આકર્ષણ સાબરમતી, વાત્રક, હાથમતી, મેશ્વો, માઝમ, ખારી અને શેઢી એમ સાત નદીઓના પવિત્ર સંગમ સ્થળે ભરાય છે. પૌરાણિક માન્યતા મુજબ, ભગવાન શિવના પુત્ર ભગવાન કાર્તિકેયે આ સ્થળની મુલાકાત લીધી હતી, જેના કારણે વર્ષોથી આ મેળો અહીં ભરાતો આવ્યો છે. ગુજરાતભરમાંથી લાખો શ્રદ્ધાળુઓ આ પવિત્ર સંગમમાં સ્નાન કરીને ધન્યતા અનુભવે છે.

ગધેડાના વેપારનું અનોખું આકર્ષણ

વૌઠાના મેળાનું એક આગવું આર્થિક પાસું છે, જે તેને પુષ્કરના ઊંટ મેળાની જેમ જ પ્રખ્યાત બનાવે છે: ગધેડાનો વેપાર. આ મેળામાં દેશના વિવિધ વિસ્તારોમાંથી મોટી સંખ્યામાં ગદર્ભ વેપારીઓ ખરીદ-વેચાણ કરવા માટે આવે છે. એક અંદાજ મુજબ, દર વર્ષે અહીં 4 હજારથી 5 હજાર જેટલા ગધેડાઓનો વેપાર થાય છે, જે આ મેળાને આર્થિક ઉપાર્જનનું પણ એક મોટું કેન્દ્ર બનાવે છે. રાત્રિના સમયે સંગમ સ્થળે તરતા મૂકવામાં આવતા દીવડાઓની રોશની અહીં અદભૂત વાતાવરણ સર્જે છે.

કમોસમી વરસાદ વચ્ચે તંત્રની ખાસ વ્યવસ્થા

કમોસમી વરસાદની આગાહી અને જોખમને ધ્યાનમાં રાખીને વૌઠા ગ્રામ પંચાયત દ્વારા મેળામાં આવતા લોકોની સેવા અને સલામતી માટે ખાસ વ્યવસ્થા કરવામાં આવી છે. મેળાના સ્થળે ખુલ્લા રસ્તાઓ, વીજળી, પીવાના પાણીની સુવિધા, આરોગ્ય અને પશુ દવાખાનાની સુવિધાઓ ઊભી કરાઈ છે.

આ ઉપરાંત, 108 એમ્બ્યુલન્સ, 181 મહિલા હેલ્પલાઇન ટીમ, ફાયર વિભાગ અને પોલીસનો ચુસ્ત બંદોબસ્ત તૈનાત રહેશે. પંચાયત દ્વારા લોકોને પોતાના વાહનોને બદલે સરકારી વાહનોનો ઉપયોગ કરવા અને સાબરમતી નદીના કિનારે ન જવા તેમજ સ્નાનગરનો ઉપયોગ કરવા અપીલ કરવામાં આવી છે, કારણ કે ઉપરવાસમાંથી નદીમાં પાણી છોડવામાં આવ્યું છે.