વડોદરાનો ચેતવણીરૂપ કિસ્સો

વડોદરામાં માતા-પિતા અને પરિવારજનો માટે એક ચેતવણીરૂપ કિસ્સો સામે આવ્યો છે. અહીં ઘર બહાર ફિટ કરેલા હીંચકામાં રમતા 10 વર્ષના બાળકે ગળામાં પહેરેલી ટાઇ હીંચકાના હુકમાં ફસાઈ જતા તેને ફાંસો લાગી ગયો હતો. પિતાની નજર પડતા તેઓ પુત્રને નીચે ઉતારી તરત જ ખાનગી હોસ્પિટલમાં સારવાર માટે લઇ ગયા હતા, પરંતુ બાળકનો જીવ બચી શક્યો ન હતો.

પોલીસ સૂત્રોના જણાવ્યાનુસાર, લક્કડપીઠા માર્ગ પર ગનુબકરીના ખાંચામાં રહેતા ધરમભાઇ પટેલ શાકભાજીનો વેપાર કરે છે. તેમનો 10 વર્ષનો દીકરો રચિત ધો. 5 માં અભ્યાસ કરે છે. રચિતે સોમવારે એક ફંક્શનમાં હાજરી આપવાની હોવાથી ટાઇ પહેરી હતી. આ દરમિયાન તે ઘર બહાર હીંચકા પર રમતો હતો, ત્યારે તેને ફાંસો લાગી ગયો હતો. તેના પિતા ઘરની બહાર નીકળ્યા ત્યારે તેમણે પુત્રને જમીન પર ફસડાઈ પડેલો જોયો હતો. બાદમાં તેઓ રચિતને તાત્કાલિક માંજલપુરની એક ખાનગી હોસ્પિટલમાં લઇ ગયા હતા. ત્યાં ટૂંકી સારવારમાં જ તેનું મોત થયું હતું. 

આ ઘટના પછી નવાપુરા પોલીસને જાણ કરતા કાયદેસરની કાર્યવાહી હાથ ધરાઈ હતી. પ્રાથમિક તપાસમાં જાણવા મળ્યું હતું કે, રચિતનું મૃત્યુ ગળે ફાંસો લાગી જવાથી જ થયું છે. રચિતનો જન્મ તેના માતાપિતાના લગ્નના ઘણાં વર્ષો પછી થયો હતો, જેથી સમગ્ર પરિવાર, પરિવારજનો અને પાડોશીઓ પર આભ તૂટી પડ્યું હતું. રચિતને મલખંભ, પુલ અપ્સ જેવી કસરતનો પણ શોખીન હતો. તેથી હીંચકા ઝૂલતી વખતે ટાઇ હીંચકાના હુકમાં વીંટળાઇ જતા તેને ફાંસો લાગી ગયો હશે. 

 હાલ આ પરિવારનો કોઇ પણ પોલીસને કંઈ કહેવાની સ્થિતિમાં નથી. નાના બાળકોને એકલા રમતા મૂકતા વાલીઓ માટે આ લાલબત્તી સમાન કિસ્સો  છે. આ દરમિયાન પોલીસે પોસ્ટમોર્ટમ કરાવવાની વાત કરી, ત્યારે માતા-પિતાએ શરૂઆતમાં ઘસીને ના પાડી દીધી હતી. તેમનું કહેવું હતું કે, અમારા એકના એક પુત્રના શરીર પર વાઢ-કાપ નથી કરાવવી. જો કે, પોલીસે કાયદાકીય કાર્યવાહીની સમજ આપતા તેઓ તૈયાર થયા હતા