ગાંધીનગરમાં શિક્ષક દિવસે ટેટ-ટાટ પાસ ઉમેદવારોનો કાયમી ભરતીની માંગ સાથે ચક્કાજામ

ગાંધીનગરમાં સચિવાલય પાસે શિક્ષક દિને ભાવિ શિક્ષકોએ પોતાના હક માટે વિરોધ પ્રદર્શન કરતાં પોલીસે અટકાયત કરી હતી. સચિવાલયની બહાર વિરોધ કરી રહેલાં ઉમેદવારોની અટકાયત કરાતા અન્ય ઉમેદવારોએ પથિકાશ્રમ રોડ ઉપર વિવિધ બેનરો સાથે વિરોધ કરી ચક્કાજામ કર્યો હતો. પોલીસે અટકાયત કરવાનો પ્રયાસ કરતાં તમામ ઉમેદવારો સત્યાગ્રહ છાવણી પહોંચી ગયા હતા. કાયમી ભરતી કરવા અને ભરતીનું નોટિફિકેશન બહાર પાડવાની માંગ સાથે ઉમેદવારોએ સૂત્રોચ્ચાર કર્યા હતા. 

રાજ્ય સરકારે શિક્ષકોની ભરતી માટે ટેટ-ટાટ ઉમેદવારોની 4 હજાર જગ્યાની ભરતી માટે 1 સપ્ટેમ્બરે નોટિફિકેશન પાડવાની જાહેરાત કરી હતી. ભરતીનું નોટિફિકેશન જાહેર ન થતાં ટેટ-ટાટ ઉમેદવારોએ આંદોલનની જાહેરાત કરી હતી.

આ આંદોલનના ભાગરૂપે કેટલાક ઉમેદવારો 'શિક્ષક દિન' નિમિત્તે ખાલી પડેલી જગ્યા પર ભરતી કરવાની માંગ સાથે ધરણાં પ્રદર્શન કરવા ગાંધીનગરમાં સચિવાલયની બહાર પહોંચ્યા હતા. સચિવાલયની બહાર ઉમેદવારોએ ભરતી, પગાર સહિતના વિવિધ મુદ્દાઓ સાથે વિરોધ પ્રદર્શન કર્યુ હતુ. 

ઉમેદવારોના અલગ-અલગ ગૃપે પોલીસને દોડાવી :

કાયમી શિક્ષકોની ભરતીની માંગ સાથે ઉમેદવારોના એક ગૃપે સચિવાલયના ગેટ નંબર-1 પાસે મુખ્યમંત્રીને રજૂઆત કરવા જવાનો પ્રયાસ કર્યો હતો. પરંતુ, તેઓને ગેટની બહાર રોકી દેવામાં આવ્યા હતા. તેથી ઉમેદવારોએ સૂત્રોચ્ચાર કરી વિરોધ પ્રદર્શન કરતાં પોલીસે તમામ ઉમેદવારોની અટકાયત કરી લીધી હતી.

ત્યારબાદ બીજા ગૃપે સિવિલ હોસ્પિટલથી વિવિધ બેનરો સાથે દેખાવો કરી પગપાળા સચિવાલય તરફ જવાનો પ્રયાસ કર્યો હતો. દેખાવો કરતાં ઉમેદવારોએ પથિકાશ્રમ રોડ ઉપર વાહનો રોકી ચક્કાજામ કર્યો હતો. તેથી પોલીસે ઉમેદવારોને ચ-3 અને ઘ-3 સર્કલ ઉપર રોકી દીધા હતા. આ સમયે ઉમેદવારોએ સૂત્રોચ્ચાર સાથે ધરણાં શરૂ કર્યા હતા. ધરણાંના કારણે એકતરફનો રોડ બંધ થઈ જતાં ટ્રાફિક જામના દ્રશ્યો સર્જાયા હતા. તેથી પોલીસે ઉમેદવારોની અટકાયત કરવાનો પ્રયાસ કરતાં તમામ ઉમેદવારો સત્યાગ્રહ છાવણી તરફ જતાં રહ્યા હતા. 

ટેટ-ટાટ પાસ ઉમેદવારોએ જણાવ્યુ કે 18 જૂને રજૂઆત કરવા આવ્યા ત્યારે અમને સચિવાલયમાં રજૂઆત કરવા જવા દીધા ન હતા. ત્યારબાદ ઋષિકેશ પટેલે નોટિફિકેશન બહાર પાડી 24,700 શિક્ષકોની 1 સપ્ટેમ્બરના રોજ ભરતી કરવાની ખાતરી આપી હતી. 4 સપ્ટેમ્બર સુધી રાહ જોવા છતાં નોટિફિકેશન આવ્યું નહિ. તેથી અમે મુખ્યમંત્રીને રજૂઆત કરવા આવ્યા છીએ.

અમે એક વર્ષથી કહી રહ્યા છીએ કે શિક્ષકોની ભરતી કરો. તેમ છતાં ભરતી કરવામાં આવી નથી. જ્ઞાન સહાયકની યોજના અમલમાં મૂકી છે. જે એક હંગામી યોજના છે. જ્યારે કાયમી ઉમેદવારો પાસ થઈને બેઠા છે તો હંગામી ઉમેદવારોની જરૂર જ શું છે?  કાયમી ઉમેદવારો પરીક્ષા પાસ કરીને બેઠા હોવાથી તેમની ભરતી કરવાના બદલે જ્ઞાન સહાયકની યોજનાને આગળ વધારી રહ્યા છે.

ટેટ-ટાટ પાસ ઉમેદવારોની આગેવાની લેનાર યુવરાજસિંહે જણાવ્યું કે રાજ્ય સરકારે કેલેન્ડર બહાર પાડ્યુ છે એ મુજબ ભરતી કરવામાં આવી નથી. જે તે સમયે 24,700 શિક્ષકોની ભરતી કરવાની જાહેરાત કરવામાં આવી હતી. જે તે વખતે જાહેર કરવામાં આવેલી તારીખ જતી રહી છે પણ ભરતી કરવામાં આવી નથી.

આજે શિક્ષક દિવસે શિક્ષક શાળામાં શોભે શિક્ષક ક્યારેય રસ્તા પર ના શોભે. પરંતુ આજે શિક્ષકોને પોતાની માગણી મુદ્દે રસ્તા પર આવવું પડ્યુ છે. તેમને સાંભળવા કોઈ અધિકારી કે પદાધિકારી તૈયાર નથી. ખરેખર લાયક ઉમેદવારોની ભરતી કરવામાં આવતી નથી.

ઉમેદવારોએ આક્રોશ વ્યક્ત કરતાં કહ્યુ કે, શિક્ષણમંત્રીએ અગાઉ કહ્યું હતું કે 15 જૂને કાયમી ભરતી આવશે. અમે વિશ્વાસ કર્યો. ના આવી એટલે અમે આંદોલન કર્યુ. ત્યારબાદ આંદોલન પછી મુખ્યમંત્રી સહિત નેતાઓએ અલગ અલગ પ્લેટફોર્મ પરથી જાહેરાત કરીને 1 સપ્ટેમ્બરે ઉચ્ચતર માધ્યમિક શિક્ષકોની ભરતી પ્રક્રિયા શરૂ થઈ જવાની ખાતરી આપી હતી. હવે શિક્ષણમંત્રી દિવાળી પહેલાં આ પ્રક્રિયા પૂર્ણ થઈ જવાનું કહે છે. હાલમાં નોટિફેકશન નહીં આવે તો દિવાળી પહેલાં કઈ રીતે પ્રક્રિયા પૂર્ણ થશે. અમારી ફક્ત એક જ માંગ છે કે કાયમી શિક્ષકોની ભરતીનું નોટિફેકશન બહાર પાડો.