વડગામ-પાનવા વચ્ચે ઈકો ટ્રક પાછળ ઘૂસી, સુરેન્દ્રનગર અકસ્માતમાં 3નાં મોત

Surendranagar Accident: સુરેન્દ્રનગર જિલ્લાના વડગામ અને પાનવા ગામ વચ્ચે શનિવારે, 26 સપ્ટેમ્બરની સવારે ગમખ્વાર રોડ અકસ્માત સર્જાયો હતો. હાઇવે પર ઉભેલા ટરબો ટ્રક પાછળ પાછળથી આવી રહેલી ઈકો કાર ઘૂસી જતાં ઈકોમાં સવાર બે લોકોનાં મોત થયાં હતાં. અકસ્માત બાદ ટ્રકનો ક્લીનર ગભરાઈને નજીકના ખેતરમાં ભાગ્યો હતો, જ્યાં ઝટકા મશીનના વાયરનો કરંટ લાગતાં તેનું પણ મોત થયું હતું. આ અકસ્માતમાં કુલ ત્રણ લોકોનાં મોત થયાં છે.

વિરમગામથી શંખેશ્વર જઈ રહેલી ઈકોનો અકસ્માત
પોલીસના જણાવ્યા મુજબ, ઈકો કારમાં સવાર લોકો વિરમગામથી શંખેશ્વર તરફ જઈ રહ્યા હતા. દરમિયાન વડગામ અને પાનવા ગામ વચ્ચે હાઇવે પર ઉભેલા ટરબો ટ્રક પાછળ ઈકો કાર ધડાકાભેર અથડાઈ હતી. અકસ્માતમાં ઈકો કારને ભારે નુકસાન થયું હતું. ઈકો કારમાં સવાર એક વ્યક્તિનું ઘટનાસ્થળે જ મોત થયું હતું. જ્યારે અન્ય એક ગંભીર ઈજાગ્રસ્ત વ્યક્તિને સારવાર માટે લઈ જવામાં આવી રહી હતી ત્યારે રસ્તામાં તેનું મોત થયું હતું.

અકસ્માતમાં 4થી 5 લોકોને ઈજા
પોલીસના જણાવ્યા મુજબ, અકસ્માતમાં ચારથી પાંચ લોકોને ઈજા પહોંચી છે. ઈજાગ્રસ્તોને સારવાર માટે વિરમગામની શિવ હોસ્પિટલમાં ખસેડવામાં આવ્યા છે. અકસ્માતની ગંભીરતાને પગલે હાઇવે પર થોડા સમય માટે ટ્રાફિક જામની સ્થિતિ સર્જાઈ હતી.

ટ્રક ક્લીનર ખેતરમાં ભાગ્યો, કરંટ લાગતાં મોત
અકસ્માત બાદ ટ્રકનો ક્લીનર ઘટનાસ્થળેથી નજીકના ખેતરમાં ભાગ્યો હતો. દરમિયાન ખેતરમાં લગાવવામાં આવેલા ઝટકા મશીનના વાયર સાથે તેનો સંપર્ક થતાં તેને ગંભીર વીજ કરંટ લાગ્યો હતો. કરંટ લાગવાથી ક્લીનરનું પણ મોત નીપજ્યું હતું.

ટ્રક ડ્રાઇવર અકસ્માત બાદ ફરાર
અકસ્માત બાદ ટરબો ટ્રકનો ડ્રાઇવર ઘટનાસ્થળેથી ફરાર થઈ ગયો હોવાનું પોલીસ તપાસમાં સામે આવ્યું છે. પોલીસે સમગ્ર મામલે તપાસ શરૂ કરી છે અને ફરાર ડ્રાઇવરની શોધખોળ હાથ ધરી છે.

દસાડા પોલીસે કાર્યવાહી શરૂ કરી
અકસ્માતની જાણ થતાં દસાડા પોલીસ સ્ટેશનના ઇન્ચાર્જ પીઆઇ વી.આઈ. ખડીયા, પીએસઆઇ વી.જે. માલવિયા સહિતનો પોલીસ સ્ટાફ ઘટનાસ્થળે પહોંચ્યો હતો. પોલીસે ટ્રાફિક વ્યવસ્થા સંભાળી હતી અને મૃતદેહોને કબજે લઈ પોસ્ટમોર્ટમ સહિતની કાયદેસરની કાર્યવાહી હાથ ધરી છે. વડગામ-પાનવા હાઇવે પર થયેલા આ અકસ્માતની વધુ તપાસ પોલીસ દ્વારા કરવામાં આવી રહી છે.