સુરત: પડોશીના ત્રાસથી મહિલાનો આપઘાતનો પ્રયાસ

સુરત શહેરના પાસોદરા વિસ્તારમાંથી એક ચોંકાવનારી ઘટના સામે આવી છે, જ્યાં માનવીય સંબંધોની મર્યાદા ઓળંગી જનારા પાડોશીઓના માનસિક ત્રાસથી કંટાળીને એક ૩૨ વર્ષીય પરણિત મહિલાએ મોતની સોડ તાણવાનો પ્રયાસ કર્યો છે. પાડોશીઓના સતત વધતા જતા દબાણ, ગાળાગાળી અને ધમકીઓ સામે લાચાર બનેલી આ મહિલાએ ફિનાઈલ પીતા પહેલા સોશિયલ મીડિયા પર પોતાની આપવીતી વર્ણવતો એક વીડિયો વાયરલ કર્યો હતો, જેણે સમગ્ર સુરત પંથકમાં ચકચાર મચાવી દીધી છે.

વીડિયોમાં છલકાઈ મહિલાની વેદના: "આજે સહનશક્તિની હદ આવી ગઈ"

ઘટનાની શરૂઆત સોશિયલ મીડિયા પર વાયરલ થયેલા એક વીડિયોથી થઈ હતી. જેમાં પીડિત મહિલા અત્યંત રડતી હાલતમાં અને ધ્રૂજતા અવાજે પોતાની પીડા વ્યક્ત કરી રહી હતી. વીડિયોમાં તેણે જણાવ્યું કે, "આજે મારી સહનશક્તિની હદ પૂરી થઈ ગઈ છે. છેલ્લા ૬ મહિનાથી અમને બાજુવાળી અલ્પા ટાંકનો ત્રાસ વધી ગયો છે. હું અને મારો પરિવાર સાવ કંટાળી ગયા છીએ."

મહિલાએ વીડિયોમાં સ્પષ્ટપણે આક્ષેપ કર્યો હતો કે જો તેને અથવા તેના પરિવારને કાંઈ પણ થાય, તો તેની જવાબદાર અલ્પા ટાંક, તેનો ભાઈ નિલેશ પરમાર અને તેમને સાથ આપનારા શખ્સો રહેશે. આ વીડિયો અપલોડ કર્યાના ગણતરીના સમયમાં જ મહિલાએ ફિનાઈલ પીને જીવન ટૂંકાવવાનો પ્રયાસ કર્યો હતો. સદનસીબે, તેના પતિને સમયસર જાણ થતા તેમને તાત્કાલિક હોસ્પિટલ ખસેડવામાં આવ્યા હતા, જ્યાં હાલ તેમની સારવાર ચાલી રહી છે.

નાની વાતોમાંથી શરૂ થયેલો વિવાદ વકર્યો

મહિલા દ્વારા લસકાણા પોલીસ સ્ટેશનમાં નોંધાવવામાં આવેલી ફરિયાદ મુજબ, આ વિવાદની શરૂઆત આશરે છ મહિના પહેલા બહુ સામાન્ય બાબતોથી થઈ હતી. એપાર્ટમેન્ટની લોબીમાં કચરા-પોતા કરવા જેવી ક્ષુલ્લક બાબતે પાડોશી અલ્પાબેન સાથે બોલાચાલી થઈ હતી. ત્યારબાદ, ચોમાસા દરમિયાન બાલ્કનીમાં વરસાદનું પાણી ન આવે તે માટે જે તાડપત્રી લગાવવામાં આવી હતી, તેના પૈસાની વસૂલાત બાબતે પણ અલ્પાબેને અસભ્ય વર્તન કરીને ઝઘડો કર્યો હતો.

તકરાર અહીં જ ન અટકી, ફરિયાદમાં જણાવ્યા મુજબ અલ્પાબેન જાણીજોઈને પોતાના ઘરનો કચરો વાળીને ફરિયાદી મહિલાના દરવાજા પાસે નાખી દેતા હતા. એટલું જ નહીં, બિલ્ડિંગની અન્ય મહિલાઓને પણ ફરિયાદી વિરુદ્ધ ઉશ્કેરીને તેમને એકલા પાડી દેવાનું વ્યવસ્થિત કાવતરું રચવામાં આવ્યું હતું.

વીડિયો રેકોર્ડિંગ બાદ મામલો વધુ ગંભીર બન્યો

જ્યારે પાડોશી દ્વારા વારંવાર કચરો નાખવાની હરકત બંધ ન થઈ, ત્યારે ફરિયાદીના પતિએ પુરાવા તરીકે તેનો વીડિયો ઉતાર્યો હતો. આ વીડિયો જ્યારે બિલ્ડિંગના વોટ્સએપ ગ્રુપમાં મુકાયો, ત્યારે આરોપીઓ બેકાબૂ બન્યા હતા. અલ્પાબેનના ભાઈ નીલેશ પરમાર, પતિ શૈલેષ ટાંક અને એક અજાણ્યો શખ્સ ફરિયાદીના ઘરે પહોંચ્યા હતા અને ગંભીર ધમકીઓ આપી હતી.

નીલેશ પરમારે મહિલાને ધમકાવતા કહ્યું હતું કે, "વીડિયો કેમ બનાવે છે? તારા ટાંગા ભાંગી નાખીશ અને તને સગેવગે કરી દઈશ." આ દરમિયાન મહિલાને ધક્કો મારીને શારીરિક રીતે પણ હેરાન કરવામાં આવી હતી. આરોપીઓએ માનસિક દબાણ વધારવા માટે એવું પણ કહ્યું હતું કે, "તારા જેવા કેટલાય ભાડુઆત અહીંથી જતા રહ્યા છે, તારે પણ જવું પડશે."

કાયદાકીય કાર્યવાહી અને પોલીસ તપાસ

આ ગંભીર મામલાની નોંધ લઈને લસકાણા પોલીસે ભારતીય નાગરિક સુરક્ષા સંહિતા (B.N.S.S) ની વિવિધ કલમો હેઠળ ત્રણ મુખ્ય આરોપીઓ સામે ગુનો દાખલ કર્યો છે:

1. અલ્પાબેન શૈલેષભાઇ ટાંક

2. શૈલેષભાઇ ટાંક

3. નીલેશ પરમાર

પોલીસે આ મામલે સીસીટીવી ફૂટેજ અને સોશિયલ મીડિયા પર મૂકવામાં આવેલા વીડિયોને પુરાવા તરીકે મેળવવાની તજવીજ હાથ ધરી છે. પાડોશીઓ વચ્ચેની આ લડાઈએ જ્યારે એક વ્યક્તિને મરવા માટે મજબૂર કરી દીધી હોય, ત્યારે આ મામલો સમાજ માટે પણ એક લાલબત્તી સમાન કિસ્સો બન્યો છે.