સુરત : બે સગીરે ક્રિકેટર બનવા ઘર છોડ્યું

સુરતના મોરા ગામના ધોરણ 9માં અભ્યાસ કરતા બે સગીર મિત્રોને ક્રિકેટર બનવાની તીવ્ર ઇચ્છા હતી. આ ઘેલછામાં, બંને વિદ્યાર્થીઓ ગત 7 નવેમ્બરે ઘર છોડીને ભાગી ગયા હતા. જતાં પહેલાં, એક સગીરે પરિવાર માટે હિન્દીમાં એક ચિઠ્ઠી પણ લખી હતી

ઘર છોડવાની ઘટના અને પરિવારની શોધખોળ : 

સુરતના હજીરા રોડ પરના મોરા ટેકરા ગામમાં રહેતા રાજસ્થાની વેપારીનો 16 વર્ષીય પુત્ર વિકાસ બપોરે 4 વાગ્યે વાળ કપાવા જવાનું કહીને ઘરેથી નીકળ્યો હતો. મોડી સાંજ સુધી તે પાછો ન આવતા માતા-પિતા ચિંતિત થયા હતા. સલૂનમાં તપાસ કરતાં તે ઘરે જવા નીકળી ગયો હોવાનું જાણવા મળ્યું.

માતા-પિતાએ સ્થાનિક CCTV ફૂટેજ તપાસ્યા, જેમાં વિકાસ હાથમાં બેગ અને ક્રિકેટ બેટ સાથે જતો દેખાયો. તુરંત જ તેમણે સ્કૂલના મિત્રોનો સંપર્ક કર્યો. મિત્રોએ જણાવ્યું કે વિકાસ અને 15 વર્ષીય નીરવ, જે તેના જ ક્લાસમાં ભણે છે, બંને ક્રિકેટના શોખીન છે અને વારંવાર ક્રિકેટર બનવાની વાતો કરતા હતા

વિકાસના માતા-પિતા નીરવના ઘરે પહોંચ્યા તો જાણવા મળ્યું કે નીરવ પણ તે જ સમયથી ગુમ છે. બંને પરિવારોએ ઉધના રેલવે સ્ટેશન અને બસ સ્ટેશન સુધી શોધખોળ કરી, પરંતુ કોઈ પત્તો ન લાગતા બીજા દિવસે ઇચ્છાપોર પોલીસ સ્ટેશનમાં ફરિયાદ નોંધાવી.

પોલીસની ત્વરિત કાર્યવાહી અને સફળતા : 

ફરિયાદ મળતા જ ઇચ્છાપોર પોલીસે તાત્કાલિક અલગ-અલગ ટીમો બનાવી તપાસ શરૂ કરી. પોલીસે સુરત રેલવે સ્ટેશનના અંદાજે 93 CCTV કેમેરાના ફૂટેજ તપાસ્યા. જેમાં જાણવા મળ્યું કે બંને સગીરો મુંબઈ જતી ટ્રેનમાં બેઠા હતા

પોલીસે પીછો ચાલુ રાખ્યો અને જાણ થઈ કે બંને મિત્રો બોરીવલી સ્ટેશને ઉતરીને જયપુર-રાજસ્થાન જતી ટ્રેનમાં બેઠા હતા. વિકાસ રાજસ્થાનનો હોવાથી પોલીસે તેના પિતાની મદદથી વતન ખાતે સંબંધીઓને જાણ કરી. આખરે, પોલીસની બીજી ટીમે ભીલવાડા ખાતે વિકાસના મામાના ઘર નજીકથી બંને સગીરોને સુરક્ષિત શોધી કાઢ્યા અને પરિવારને સોંપ્યા

પ્રાથમિક પૂછપરછમાં બંને મિત્રોએ ક્રિકેટર બનવાની ધૂનમાં કોઈને કહ્યા વગર ઘરેથી નીકળી ગયાની કબૂલાત કરી હતી. પોલીસની સમયસર અને ટેકનિકલ સર્વેલન્સ આધારિત કામગીરીથી બંને સગીરોનું સુરક્ષિત મિલન શક્ય બન્યું હતું.