Surat માં "દાદાનું બુલડોઝર" ફરી વળ્યું, 36,000 ચો.મી. સરકારી જમીન ગેરકાયદે દબાણમુક્ત કરાઈ!

સુરત શહેરના ઉધના વિસ્તારમાં આજે ઉધના મામલતદાર દ્વારા મેગા ડિમોલેશન ડ્રાઇવ હાથ ધરવામાં આવી હતી, જેમાં લિંબાયત-ડુંભાલ વિસ્તારમાં આવેલી સરકારી મિલકત પરના 36 હજાર ચોરસ મીટરના ગેરકાયદેસર દબાણો હટાવવામાં આવ્યા હતા. આ કાર્યવાહીમાં પોલીસ કાફલાને સાથે રાખીને ભારે સુરક્ષા વ્યવસ્થા વચ્ચે ડિમોલેશન કરવામાં આવ્યું હતું, જેણે ગેરકાયદે દબાણકારોમાં ફફડાટ વ્યાપી દીધો છે.

દિનેશ પટેલની ગેરકાયદે બિલ્ડીંગ ધરાશાયી...

પ્રાપ્ત માહિતી અનુસાર, સરકારી મિલકત પર દિનેશ પટેલ નામના ઈસમ દ્વારા એક વિશાળ ત્રણ માળની ગેરકાયદેસર બિલ્ડીંગ બનાવી દેવામાં આવી હતી, જેના દ્વારા તે મોટા પાયે ભાડું કમાતો હતો. ઉધના મામલતદારની ટીમે આ ગેરકાયદેસર બિલ્ડીંગ પર "દાદાનું બુલડોઝર" ફેરવી તેને ધરાશાયી કરી દીધી હતી. આ કાર્યવાહી દબાણકારો સામે તંત્રની કડક નીતિ દર્શાવે છે.

ઝૂંપડા અને અન્ય દબાણો પણ દૂર કરાયા...

ત્રણ માળની બિલ્ડીંગ ઉપરાંત, આ સરકારી જમીન પર ગેરકાયદેસર રીતે ઉભા કરવામાં આવેલા 100 થી વધુ ઝૂંપડાઓ અને અન્ય નાના-મોટા દબાણોને પણ દૂર કરવામાં આવ્યા હતા. આ મેગા ડિમોલેશનથી કરોડો રૂપિયાની સરકારી જમીન ખુલ્લી થઈ છે.

ઉધના મામલતદારનો સ્પષ્ટ સંદેશ...

ઉધના મામલતદાર એ.આર. નાયકે જણાવ્યું હતું કે, સરકારી જમીન પર કોઈપણ પ્રકારનું દબાણ ચલાવી લેવામાં આવશે નહીં અને ભવિષ્યમાં પણ આવા ગેરકાયદે દબાણો સામે કડક કાર્યવાહી ચાલુ રહેશે. આ ઘટનાએ શહેરમાં ગેરકાયદેસર દબાણ કરનારાઓ માટે લાલબત્તી સમાન છે અને તંત્રનો સ્પષ્ટ સંદેશ છે કે સરકારી જમીન કોઈની બાપદાદાની નથી. શું આ કાર્યવાહીથી સુરતમાં ગેરકાયદે દબાણો પર સંપૂર્ણપણે લગામ કસી શકાશે?