Surat Pharmacist Arrested: શહેરના વરાછા વિસ્તારમાં તબીબી ડિગ્રી વગર જ નિર્દોષ બાળકીઓની ગર્ભમાં હત્યા કરનારા પાખંડી ફાર્માસિસ્ટ રામગોપાલ ખંડેલવાલની આખરે ધરપકડ કરવામાં આવી છે. શુક્રવાર, 8 મેના રોજ સુરત પોલીસે બાતમીના આધારે આંજળા ફાર્મના પાછળના ભાગેથી આ ફરાર આરોપીને દબોચી લીધો હતો. રામગોપાલ 'મમતા હોસ્પિટલ'ના ઓઠા હેઠળ ગેરકાયદે ગર્ભપાતનું મસમોટું નેટવર્ક ચલાવતો હોવાનો પર્દાફાશ થયો છે. દરોડા દરમિયાન સામે આવેલી વિગતોએ આરોગ્ય જગત અને પોલીસ તંત્રને પણ સ્તબ્ધ કરી દીધા છે.
જેલમાંથી છૂટીને ફરી શરૂ કરી 'મોતની હાટડી' રામગોપાલ ખંડેલવાલની ગુનાહિત માનસિકતાનો અંદાજ એ વાત પરથી લગાવી શકાય છે કે તે કાયદાથી જરાય ડરતો નહોતો. માત્ર 6 મહિના પહેલા, નવેમ્બર 2025માં પણ તે 'શિવાય હોસ્પિટલ'ના નામે આ જ પ્રકારના કાળા કારનામા કરતા પકડાયો હતો. જેલમાંથી જામીન પર છૂટ્યાના ટૂંકા ગાળામાં જ તેણે એ જ જૂના સ્થળે માત્ર બોર્ડ બદલીને 'મમતા હોસ્પિટલ' શરૂ કરી દીધી હતી. આરોપી એટલો બેખોફ હતો કે તે માત્ર 10,000 રૂપિયામાં ઘરે જઈને પોર્ટેબલ મશીનથી ગર્ભ પરીક્ષણ કરી આપતો અને 15,000 રૂપિયામાં અસુરક્ષિત રીતે ગર્ભપાત કરવાની 'સુવિધા' પૂરી પાડતો હતો.
આરોગ્ય વિભાગની નિષ્ફળતા અને મિલીભગતના આરોપ આશ્ચર્યની વાત એ છે કે રામગોપાલના આ નેટવર્કની ચર્ચા છેક મહારાષ્ટ્ર અને રાજસ્થાન સુધી ફેલાયેલી હતી. પરપ્રાંતમાંથી અનેક સગર્ભા મહિલાઓ અહીં ગેરકાયદે ગર્ભપાત કરાવવા આવતી હતી. જે ગુનાહિત પ્રવૃત્તિની જાણ પાડોશી રાજ્યોના એજન્ટોને હતી, તેનાથી સ્થાનિક આરોગ્ય વિભાગ સાવ અજાણ હોય તે બાબત ગળે ઉતરે તેવી નથી. સુરત જિલ્લા મુખ્ય આરોગ્ય અધિકારી (CDHO) ડૉ. અનિલ પટેલના નાક નીચે જ આ 'મોતનો ખેલ' ખેલાતો રહ્યો, પરંતુ તંત્રએ ક્યારેય શંકાસ્પદ સેન્ટરોની તપાસ કરવાની તસ્દી લીધી નહોતી. આ ઘટના બાદ ડૉ. અનિલ પટેલની કામગીરી સામે ગંભીર સવાલો ઉભા થયા છે. શહેરમાં અન્ય કેટલીય આવી ગેરકાયદે હોસ્પિટલો ધમધમી રહી હોવાની આશંકા છે. જો નિષ્પક્ષ તપાસ કરવામાં આવે તો આરોગ્ય વિભાગની મોટી લાલિયાવાડી અને મિલીભગત બહાર આવે તેમ છે. નવાઈની વાત તો એ છે કે, અગાઉ ગુનામાં પકડાયા હોવા છતાં આ ફાર્માસિસ્ટનું લાયસન્સ રદ કરવા માટે વિભાગ હજુ સુધી કોઈ નક્કર કાર્યવાહી કરી શક્યું નથી.
CDHO ડૉ. અનિલ પટેલ સામે શિક્ષાત્મક કાર્યવાહીની નોટીસ આ ઘટનામાં સૌથી મોટો વળાંક ત્યારે આવ્યો જ્યારે રાજ્યના આરોગ્ય વિભાગે સુરતના CDHO ડૉ. અનિલ પટેલની કામગીરી સામે ગંભીર સવાલો ઉઠાવ્યા. ગાંધીનગર સ્થિત અધિક નિયામકે 6 મે, 2026 ના રોજ ડૉ. અનિલ પટેલને 'કારણદર્શક નોટીસ' ફટકારી છે. નોટીસમાં સ્પષ્ટપણે જણાવાયું છે કે, જિલ્લામાં ગેરકાયદે પ્રવૃત્તિઓ રોકવાની જવાબદારી હોવા છતાં તેમની કક્ષાએથી કોઈ ચોક્કસ પગલાં લેવાયા નથી. રાજ્ય કક્ષાએથી વારંવાર ધ્યાન દોરવા છતાં આ ગંભીર બાબતે બેદરકારી દાખવવામાં આવી છે. તેમની સામે શિસ્ત અને અપીલના નિયમો હેઠળ શિક્ષાત્મક કાર્યવાહી કેમ ન કરવી તે અંગે 3 દિવસમાં ખુલાસો માંગવામાં આવ્યો છે.
પોલીસ હવે કુંડળી ખંગાળશે થોડા દિવસો પહેલા જ્યારે આરોગ્ય વિભાગે મમતા મલ્ટી સ્પેશિયલિટી હોસ્પિટલમાં દરોડા પાડ્યા ત્યારે પોર્ટેબલ સોનોગ્રાફી મશીન અને ગેરકાયદે ગર્ભપાતના સાધનો મળી આવ્યા હતા. તે સમયે રામગોપાલ ફરાર થઈ ગયો હતો. હવે તેની ધરપકડ બાદ પોલીસ તપાસનો ધમધમાટ તેજ થયો છે. પોલીસ હવે એ દિશામાં તપાસ કરી રહી છે કે ડૉક્ટર ન હોવા છતાં તેને કોણ મદદ કરતું હતું? તેને મેડિકલ સાધનો અને દવાઓ કોણ પૂરી પાડતું હતું? પોલીસ સૂત્રોના જણાવ્યા અનુસાર, રામગોપાલની પૂછપરછમાં અનેક મોટા નામો અને એજન્ટોના નેટવર્કનો ખુલાસો થઈ શકે છે. દીકરીઓને ગર્ભમાં જ મારી નાખનારા આ નરાધમ સામે કડકમાં કડક કાર્યવાહી થાય અને તેની પાછળ રહેલા સફેદપોશ ગુનેગારો પણ જેલના સળિયા પાછળ જાય તે જરૂરી છે. હાલમાં પોલીસ રામગોપાલના રિમાન્ડ મેળવીને આ આખા રેકેટના મૂળ સુધી પહોંચવા પ્રયાસ કરી રહી છે.

ગર્ભપાતનું રેકેટ ચલાવતો ફાર્માસિસ્ટ ઝડપાયો

આરોગ્ય વિભાગની 'ઊંઘ' સામે સવાલ

May 8, 2026 | 11:13 IST