સુરત પાલિકાનો ખાડા સર્વે વિવાદાસ્પદ: શહેરમાં માત્ર 1800 સ્પોટનો દાવો

સુરત શહેર વરસાદથી જળબંબાકાર બન્યા બાદ તેના મોટાભાગના રસ્તા પર ખાડા પડી ગયા છે અને સંખ્યાબંધ રસ્તાઓ બિસ્માર બન્યા છે. મોટાભાગના શહેરીજનો રસ્તા પરના ખાડાથી ત્રાહિમામ છે ત્યારે સુરત પાલિકાએ જાદુઈ સર્વે કર્યો છે અને શહેરમાં માત્ર 1800 સ્પોટ પર ખાડા હોવાનો દાવો કર્યો છે. 

સુરતમાં વરસાદની શરૂઆત સાથે પાલિકાની નબળી કામગીરી જાહેર થઈ છે અને શહેરના ઢગલાબંધ રસ્તા ધોવાઇ ગયા છે. ઉપરથી મેટ્રોની ચાલતી કામગીરીના પગલે બ્રિજની આસપાસના રસ્તાની હાલત દયનીય થઈ છે. શહેરના રસ્તા પર ખાડા છે કે ખાડામાં રસ્તા છે તેવો અહેસાસ થઈ રહ્યો છે. શહેરમાં રસ્તા પરના ખાડાના કારણે લોકો ત્રાહિમામ પોકારી ઉઠ્યા છે અને પાલિકાની કામગીરી સામે સવાલ ઉઠાવવા સાથે આક્રોશ ઠાલવી રહ્યાં છે. 

પાલિકાના ઈનચાર્જ સીટી ઈજનેર જતિન દેસાઈએ જણાવ્યું હતું કે, તમામ ઝોન પાસે સર્વે કરાવ્યો હતો તેમાં 1800 સ્પોટ પર જ ખાડા હોવાનું બહાર આવ્યું છે. અને છેલ્લા ચાર દિવસથી ખાડા પુરવાની કામગીરી ચાલી રહી છે અને તેમાંથી 700  સ્પોટના ખાડા પૂરી દેવામાં આવ્યા છે. આ કામગીરી માટે ચાર દિવસ સુધી 151 મશીનરી, 607 કામદારોએ 3628.69 મેટ્રીક ટન મટીરીયલ્સનો ઉપયોગ કર્યો છે અને 18,450 સ્કે. મીટરમાં ખાડા પુરવાની કામગીરી કરવામાં આવી છે અને આગામી દિવસોમાં અન્ય સ્પોટના ખાડા પુરવાની કામગીરી કરવામાં આવશે. 

શહેરના મોટાભાગના રસ્તા બિસ્માર છે અને સંખ્યાબંધ ખાડાઓ સામે અનેક પ્રશ્નો ઉઠી રહ્યાં છે અને બીજી તરફ 700 ખાડા પુરતા ચાર દિવસનો સમય અને મોટી માત્રામાં સ્ટાફ અને સામગ્રીનો ઉપયોગ થયો તે વિરોધાભાષ હોવાનું કહેવાય રહ્યું છે. તો બીજી તરફ પાલિકાના અધિકારીઓ પોતાની કામગીરી સારી બતાવવા પાલિકાના રસ્તાને હાઇવેના ખાડા સાથે સરખામણી કરી રહ્યાં છે તે ચર્ચાનો વિષય બન્યો છે.