Surat BJP Leaders Clash: સુરતના સ્થાનિક રાજકારણમાં ભાજપનો આંતરિક વિવાદ હવે અત્યંત હિંસક વળાંક લઈ ચૂક્યો છે. સુરત-ઉત્તર વિધાનસભા મતવિસ્તારના ભારતીય જનતા પાર્ટીના ધારાસભ્ય કાંતિ બલરના કાર્યાલયમાં જ પક્ષના નેતાઓ વચ્ચે ભારે હોબાળો અને છૂટાહાથની મારામારી થતાં રાજકીય વર્તુળોમાં ચકચાર મચી ગઈ છે. ભાજપના જ બે જૂથો વચ્ચે ધારાસભ્યની હાજરીમાં થયેલી આ હિંસક ઝપાઝપીમાં મહિલા કોર્પોરેટર અને તેમના પતિ ગંભીર રીતે ઇજાગ્રસ્ત થયા છે. સુરત મહાનગરપાલિકાની ટીપી કમિટીના ચેરમેન મહેન્દ્ર દેસાઈ ધારાસભ્યની હાજરીમાં જ ખુરશી લઈને મારવા દોડ્યા હોવાનો ગંભીર આરોપ લાગ્યો છે. આ હુમલામાં મહિલા કોર્પોરેટર જયશ્રીબેન વોરા અને તેમના પતિ મનહર વોરાને હાથ તથા આંગળીના ભાગે ફેક્ચર જેવી ગંભીર ઈજાઓ પહોંચી છે. પક્ષના જ કાર્યાલયમાં નેતાઓ વચ્ચે લોહીયાળ અડફેટે રમાયેલા આ ખેલના સમાચાર વાયુવેગે સુરતથી લઈને ગાંધીનગર સુધી પહોંચી ગયા છે.
સોસાયટીના પ્રશ્નોની બેઠક બની રણમેદાન: ભાતની વાડી વિવાદમાં વર્ચસ્વની લડાઈ ઘટનાની વિગતવાર માહિતી અનુસાર, વોર્ડ નંબર 5 (ફૂલપાડા-અશ્વિનીકુમાર) માં આવેલી ભાતની વાડી સોસાયટીના પડતર પ્રશ્નો અને ડિમોલિશન સંબંધિત રજૂઆતો અંગે ચર્ચા કરવા માટે ધારાસભ્ય કાંતિ બલરે તેમના કાર્યાલય ખાતે એક ખાસ બેઠકનું આયોજન કર્યું હતું. આ બેઠકમાં વોર્ડ નંબર 5 ના ચારેય કોર્પોરેટરો, સોસાયટીના અગ્રણીઓ અને સ્થાનિક લોકો હાજર રહ્યા હતા. સોસાયટીના આગેવાનો પોતાની રજૂઆત કરીને ત્યાંથી રવાના થઈ ગયા બાદ, અંદરોઅંદરની વર્ચસ્વની લડાઈ અને આંતરિક મતભેદો બહાર આવ્યા હતા. સંકલન અને વિવિધ કાર્યક્રમોમાં આમંત્રણ ન આપવા જેવા મુદ્દાઓ પર અચાનક ચર્ચા ગરમ થઈ ગઈ હતી અને જોતજોતામાં શાંત બેઠકનું વાતાવરણ અત્યંત તંગ બની ગયું હતું.
આક્ષેપોની ઝડીથી ગરમ થયું વાતાવરણ: તુ-તુ મૈં-મૈં માંથી સીધી છૂટાહાથની મારામારી બેઠક દરમિયાન સ્થાનિક રજૂઆતો પૂરી થયા બાદ કોર્પોરેટરો વચ્ચે આંતરિક ચર્ચા શરૂ થઈ હતી. આ સમયે મહિલા કોર્પોરેટર જયશ્રીબેન વોરાના પતિ મનહર વોરાએ ટીપી કમિટીના ચેરમેન મહેન્દ્ર દેસાઈ પર પક્ષપાત કરવાનો, સંકલન ન રાખવાનો અને કોર્પોરેટરોની ઉપેક્ષા કરવાનો સીધો આક્ષેપ કર્યો હતો. મનહર વોરાએ આક્ષેપ લગાવ્યો કે મહેન્દ્ર દેસાઈ દ્વારા કતારગામ અને વરાછા ઝોનમાં સૌરાષ્ટ્રવાસીઓ તથા પાટીદારોના ઉદ્યોગોને ટાર્ગેટ બનાવીને ડિમોલિશન કરવામાં આવી રહ્યું છે. જ્યારે સ્થાનિકોએ ચૂંટણી વખતે પક્ષ માટે કરેલી મહેનત યાદ અપાવી, ત્યારે મહેન્દ્ર દેસાઈએ "હું થૂંકેલું પાછું નહીં લઉં" તેમ કહીને રજૂઆત ફગાવી દીધી હતી. આ બોલાચાલી જોતજોતામાં વધી ગઈ હતી અને વાત ગાળાગાળીથી લઈને છૂટાહાથની મારામારી સુધી પહોંચી ગઈ હતી.
ધારાસભ્યની હાજરીમાં ખુરશી ઉપાડી હુમલો: મહિલા કોર્પોરેટર અને પતિને ફેક્ચર કોર્પોરેટર જયશ્રીબેન વોરાએ અત્યંત ભાવુક થઈને અને રડતાં રડતાં જણાવ્યું હતું કે, ધારાસભ્ય કાંતિભાઈ બલરની ઓફિસમાં જ ટીપી કમિટીના ચેરમેન મહેન્દ્ર દેસાઈએ તેમની પર અને તેમના પતિ પર અચાનક હિંસક હુમલો કરી દીધો હતો. વાતચીત ચાલી રહી હતી ત્યારે જ મહેન્દ્ર દેસાઈ અચાનક ઉશ્કેરાઈ ગયા હતા અને તેમણે સીધી ખુરશી ઉપાડીને મારવા દોડ્યા હતા. આ હિંસક ઝપાઝપીમાં મનહરભાઈ અને જયશ્રીબેન બંનેને ઈજાઓ પહોંચી હતી, જેમાં મનહરભાઈના હાથ, આંગળી અને અંગૂઠાના ભાગે ફેક્ચર થઈ ગયું હતું. આ ઘટના સમયે હાજર ધારાસભ્ય કાંતિ બલર અને અન્ય કોર્પોરેટરોએ તાત્કાલિક વચ્ચે પડીને બંને પક્ષોને માંડ અલગ કર્યા હતા. હુમલા બાદ ઈજાગ્રસ્ત મનહર વોરાને તાત્કાલિક સારવાર અર્થે હોસ્પિટલ ખસેડવામાં આવ્યા હતા.
પોલીસ ફરિયાદ દબાવવાનો પ્રયાસ: ધારાસભ્યની વિનંતીથી 100 નંબરનો કોલ રદ કરાયો ઘટના બન્યા બાદ તુરંત જ મનહરભાઈ વોરાએ 100 નંબર પર કંટ્રોલ રૂમમાં 2 વાર કોલ કરીને પોલીસ ફરિયાદ કરવાનો પ્રયાસ કર્યો હતો. જોકે, ધારાસભ્ય કાંતિ બલરે પોતાની ઓફિસ અને કાર્યાલયની છબી બદનામ ન થાય તેવું કહીને આ સમગ્ર બાબતને દબાવવાનો પ્રયાસ કર્યો હતો. ધારાસભ્યની વિનંતી અને તેમના માન-સન્માનને ખાતર મનહરભાઈએ તે સમયે પોલીસ ફરિયાદ કરવાની પ્રક્રિયા અટકાવી દીધી હતી. મનહરભાઈએ દુઃખ વ્યક્ત કરતાં જણાવ્યું હતું કે, ધારાસભ્યએ હુમલો કરનાર મહેન્દ્ર દેસાઈને ઠપકો આપવાના બદલે ઊલટાનો તેમને જ ઠપકો આપ્યો હતો. વધુમાં, કોર્પોરેટર જયશ્રીબેને ઉમેર્યું હતું કે હોદ્દો સંભાળ્યાને માંડ 3 મહિના થયા છે અને 5 વર્ષનો કાર્યકાળ બાકી છે ત્યારે સ્વપક્ષના નેતા દ્વારા આવું કૃત્ય કરાયું છે. જો પતિને માથામાં ઈજા થઈ હોત તો મોટો અનર્થ સર્જાયો હોત.
ઈ-મેઈલ મારફતે હાઈકમાન્ડને સત્તાવાર ફરિયાદ કાર્યાલયમાં બનેલી આ શરમજનક ઘટના અને નેતાના પતિને પહોંચેલી ગંભીર શારીરિક ઈજાઓના સમાચાર વાયુવેગે સુરતથી ગાંધીનગર પ્રદેશ ભાજપ કાર્યાલય સુધી પહોંચી ગયા છે. ઘરે આવ્યા બાદ પ્રદેશના ઉચ્ચ નેતાઓ સાથે વાતચીત થતાં તેમણે સંગઠન સ્તરે લેખિત રજૂઆત કરવાની સલાહ આપી હતી. જે બાદ, જયશ્રીબેન વોરાના સત્તાવાર લેટરપેડ પર પ્રદેશ અધ્યક્ષ જગદીશ પંચાલ, પ્રદેશ મહામંત્રી પ્રશાંત કોરાટ, સંગઠન મહામંત્રી રત્નાકરજી તથા સુરત શહેર ભાજપના શિર્ષ નેતાઓને ઈ-મેઈલ કરીને સમગ્ર ઘટના અને આક્ષેપો અંગે વિસ્તૃત રજૂઆત મોકલી આપવામાં આવી છે અને આ મામલે કડક શિસ્તભંગના પગલાં લેવાની માગ કરાઈ છે.
&lsquo;મેં કોઈને માર્યા નથી&rsquo;: ટીપી કમિટી ચેરમેન મહેન્દ્ર દેસાઈની સફાઈ બીજી તરફ, આ સમગ્ર હિંસક વિવાદ અંગે ટીપી કમિટીના ચેરમેન મહેન્દ્ર દેસાઈએ પોતાના પર લાગેલા તમામ આક્ષેપોને નકારી કાઢ્યા છે. તેમણે જણાવ્યું હતું કે, "મેં કોઈને પણ માર માર્યો નથી કે ખુરશી ઉપાડી નથી. ઘરના ભાઈ-બહેન વચ્ચે જે રીતે સામાન્ય બોલાચાલી અને ઝઘડો થાય, બસ તે જ રીતે અમારી વચ્ચે પણ સામાન્ય આંતરિક વિવાદ થયો હતો." જોકે, સામે પક્ષે તબીબી અહેવાલો અને ઈજાના નિશાન હોવાથી આંતરિક જૂથબંધીનો આ મામલો હવે શાંત થાય તેમ લાગતું નથી. રાજકીય વર્તુળોમાં ચર્ચા છે કે ટીપી વિભાગ અને ડિમોલિશનના નિર્ણયોને લઈને ચાલતી આંતરિક ખેંચતાણમાં હવે ભાજપના પ્રદેશ હાઈકમાન્ડ દ્વારા કેવા કડક પગલાં લેવામાં આવે છે તેના પર સૌની નજર ટકેલી છે.

ધારાસભ્ય કાંતિ બલરની ઓફિસમાં જ નેતાઓ વચ્ચે લોહિયાળ જંગ

August 5, 2026 | 12:13 IST