ધો.8ની વિદ્યાર્થિનીએ મોબાઈલના વળગણમાં જીવ ટૂંકાવ્યો

સુરતના પાંડેસરા વિસ્તારમાં આવિર્ભાવ સોસાયટીમાં શાકભાજી લઈ પરત ફરેલી માતાને માસૂમ દીકરી ફાંસો ખાધેલી હાલતમાં મળી આવતા પરિવાર શોકમાં ગરકાવ થઈ ગયો હતો. મૃતક વર્ષા ધોરણ-8ની વિદ્યાર્થિની હતી. માતાએ મોબાઈલ લઈ લેતા દીકરીએ આપઘાતનો રસ્તો પકડ્યો હોય એવી આશંકા વ્યક્ત કરાઈ રહી છે.

પરિવાર મૂળ યુપીના રહેવાસી છે. સુરતમાં પાંડેસરા ચીકુવાડી નજીક આવિર્ભાવ સોસાયટીમાં રહે છે. પિતા રાજન પ્રસાદ મિલમાં લેબર કોન્ટ્રાકટ રાખી પરિવારનું ગુજરાન ચલાવતા આવ્યા છે. બે દીકરીઓમાં વર્ષા મોટી દીકરી હતી. ઘરની નજીકમાં જ આવેલી સ્કૂલમાં ધોરણ-8માં અભ્યાસ કરતી હતી.

ગતરોજ મોડી સાંજે વર્ષા બેડરૂમમાં મોબાઈલમાં વ્યસ્ત હતી. જેને લઈ માતાએ ઠપકો આપી મોબાઈલ લઈ લીધો હતો. ત્યારબાદ માતા શાકભાજી લેવા બજાર ગયા હતા. 10 મિનિટ બાદ પરત ફરતા નાની દીકરી સૂતેલી હતી અને વર્ષા ગળે ફાંસો ખાધેલી હાલતમાં મળી આવી હતી. બૂમાબૂમ કરી દેતા પાડોશીઓની મદદથી વર્ષાને 108માં સિવિલ લઈ આવતા મૃત જાહેર કરાઈ હતી..

આ ઘટના અંગે મૃતકના પરિવારજન સંદીપભાઈ સાથે વાત કરતા જણાવ્યું કે, દીકરી એકદમ સરળ સ્વભાવની હતી. તે દરરોજ સ્કૂલથી ઘર અને ઘરથી સ્કૂલ જ જતી આવતી હતી. તેને કોઈપણ પ્રકારનો તણાવ પણ નહોતો. ઘરના લોકો પણ તેને સારી રીતે રાખતા હતા. કોઈએ તેને માર્યું હોય એવુ પણ નથી. તેને ફક્ત મોબાઈલ વધુ પડતો વાપરવાની આદત પડી ગઈ હતી. ગઈકાલે સાંજ તેની માતા શાકભાજી લેવા જઈ રહી હતી ત્યારે તે મોબાઈલ લઈને ચાલી ગઈ. તે પછી ખબર નહી શું થયું? આ પછી તેણે ઘરમાં ગળાફાંસો ખાઈ લીધો.