અમદાવાદમાં કોલ્ડપ્લે માટે દોડાવાશે ખાસ ટ્રેન 

અમદાવાદ: અમદાવાદમાં વિશ્વના સૌથી મોટા નરેન્દ્ર મોદી સ્ટેડિયમ ખાતે 25મી અને 26મી જાન્યુઆરીના રોજ યોજાનારા કોલ્ડપ્લે કોન્સર્ટ માટે ટિકિટનું વેચાણ શરૂ થતા જ થોડા સમયમાં હજારો ટિકિટ વેચાઈ ગઈ હતી. આ દરમિયાન, કોલ્ડપ્લે કોન્સર્ટને ધ્યાનમાં રાખીને પશ્ચિમ રેલવેે એ ખાસ ટ્રેન શરૂ કરવાનો નિર્ણય લીધો છે. 25 અને 26 જાન્યુઆરીએ મુંબઈ અને અમદાવાદ વચ્ચે બે ખાસ ટ્રેન દોડાવવામાં આવશે.

અમદાવાદમાં કોલ્ડપ્લે કોન્સર્ટ યોજાઈ તે પહેલાં આયોજકોને નોટિસ પાઠવવામાં આવી હતી. કોલ્ડપ્લે કોન્સર્ટના આયોજકોને ડિસ્ટ્રિક્ટ ચાઈલ્ડ પ્રોટેક્શન યુનિટ (DCPU) દ્વારા નોટિસ આપવામાં આવી હતી. નોટિસમાં જણાવ્યું હતું કે, કોન્સર્ટ સમયે જાહેર મંચ પર બાળકોને ન બોલાવવાનો અભિપ્રાય આપવામાં આવ્યો છે. 

ગુજરાત કોલ્ડપ્લે કોન્સર્ટ માટે પશ્ચિમ રેલવે દ્વારા ચલાવવામાં આવતી આ ટ્રેનો બાંદ્રા ટર્મિનસથી સવારે 6:15 વાગ્યે ઉપડશે અને 25મી જાન્યુઆરીએ બપોરે 2 વાગ્યે અને 26મી જાન્યુઆરીએ બપોરે 1 વાગ્યે અમદાવાદ પહોંચશે. પરત ફરતી વખતે, આ ટ્રેનો અમદાવાદથી બપોરે 1:40 વાગ્યે ઉપડશે અને રાત્રે 8:40 વાગ્યે બાંદ્રા ટર્મિનસ પહોંચશે.

બીજી ટ્રેન અમદાવાદ થી 27મી જાન્યુઆરીએ રાતે 12:50 વાગ્યે ઉપડશે અને સવારે 8:30 વાગ્યે મુંબઈ પહોંચશે. આ ટ્રેનો બોરિવલી, વાપી, ઉધના, સુરત, ભરૂચ, વડોદરા સ્ટેશન પર પણ ઊભી રહેશે. નોંધનીય છે કે, આ ટ્રેન શિયાળાની સ્પેશિયલ ટ્રેનોમાં સામેલ છે, પરંતુ તેનો મુખ્ય હેતુ કોન્સર્ટ માટે આવી રહેલી ભીડને સંભાળવાનો છે.