સુરતમાં પુત્રે માતાને એક મહિનો કેદમાં રાખી

સુરતમાં માનવતાને શરમાવે તેવી અને હૃદયને હચમચાવી નાખે તેવી ઘટના સામે આવી છે. વેલજા વિસ્તારની શેરડીધામ સોસાયટીમાં એક પુત્રે પોતાની 65 વર્ષીય વૃદ્ધ માતાને એક મહિના સુધી ઘરના પેસેજમાં કેદ રાખી હતી. પાડોશીઓની સતર્કતા અને સેવાભાવી સંસ્થાની મદદથી અંતે વૃદ્ધ માતાની મુક્તિ થઇ છે.

ઘટનાનો વિગતવાર ખુલાસો : 

હીરા કારખાનામાં કામ કરતો યોગેશ નામનો શખ્સ પોતાની માતા હેમલતાબેનને પેસેજમાં લોક મારી રાખતો હતો. માતાની તબિયત ખરાબ હતી અને અતિ દયનીય હાલતમાં તેઓ દિવસ પસાર કરી રહ્યા હતા. પડોશીઓને ઘટનાની જાણ થતાં તેઓએ માનવતાના નાતે વૃદ્ધાને ગ્રીલમાંથી ખોરાક અને પાણી પૂરું પડતાં હતા. 

ચેરીટેબલ ટ્રસ્ટ અને પોલીસનો તાત્કાલિક હસ્તક્ષેપ : 

ઘટનાની માહિતી મળતા વુમન ઈમ્પ્રૂવમેન્ટ ચેરીટેબલ ટ્રસ્ટની ચેતનાબેન સાવલિયા તાત્કાલિક ઘટના સ્થળે પહોંચી હતી. પરિસ્થિતિ જોઈ તેમણે તરત જ પોલીસને માહિતી આપી હતી. પોલીસે સ્થળ પર પહોંચી હેમલતાબેનને સલામત રીતે બહાર કાઢ્યા અને સારવાર તથા કાળજીની વ્યવસ્થા કરી હતી. 

માતાની અખૂટ મમતા : 

એક મહિના સુધી અમાનવીય ત્રાસ સહન કર્યા છતાં હેમલતાબેનનો દીકરા પ્રત્યેનો સ્નેહ ઓછો થયો નહોતો. પોલીસ મથકે પણ તેઓ પોતાના દીકરા યોગેશ અને વહુની તરફદારી કરતાં હતા. માતાની આ નિસ્વાર્થી ભાવનાએ ત્યાં હાજર દરેકને ભાવુક બનાવી દીધા હતા. 

પુત્રનો બચાવ અને હાલની વ્યવસ્થા : 

પુછપરછ વખતે યોગેશે બહાનું આપ્યું કે ઘર પર લોન અને આર્થિક તકલીફને કારણે તે માતાને આ રીતે છોડીને ગયો હતો. હાલ ચેરીટેબલ ટ્રસ્ટ અને પોલીસની મદદથી હેમલતાબેનને સુરક્ષિત સ્થળ 'શ્રી લોક સેવા ભાવના વૃદ્ધાશ્રમ'માં ખસેડવામાં આવ્યા છે, જ્યાં તેમની યોગ્ય સંભાળ રાખવામાં આવી રહી છે.