અમદાવાદના પાલડી, સાબરમતી રિવરફ્રન્ટ ઈવેન્ટ સેન્ટર ખાતે 13 નવેમ્બરથી 16 નવેમ્બર 2025 સુધી આંતરરાષ્ટ્રીય ફૂડ ફેસ્ટિવલ 'ફૂડ ફોર થોટ ફેસ્ટ'નું આયોજન કરવામાં આવ્યું છે. કેન્દ્રીય ગૃહ અને સહકારિતા મંત્રી અમિત શાહ 13 નવેમ્બરના રોજ આ ફૂડ ફેસ્ટિવલનું ઉદ્ઘાટન કરશે. આ ઈવેન્ટનું આયોજન અમદાવાદ મ્યુનિસિપલ કોર્પોરેશન અને સાઉથ એશિયન એસોસિએશન ફોર ગેસ્ટ્રોનોમી દ્વારા કરવામાં આવ્યું છે.&nbsp;
પ્રોગ્રામની માહિતી માટે QR કોડ પણ જાહેર
ફૂડ ફેસ્ટિવલમાં એન્ટ્રી માટે કોઈ પણ પ્રકારની ફી નથી, પરંતુ ફૂડ પેવેલિયન અને સ્ટોલમાં મળતી વસ્તુઓનો ચાર્જ ચૂકવીને લોકો ભોજનનો આનંદ માણી શકશે. ટિકિટનું બુકિંગ ઓનલાઈન વેબસાઈટ બુક માય શો ઉપર કરાવી શકાશે. મ્યુનિસિપલ કોર્પોરેશન દ્વારા મેનુ અને પ્રોગ્રામની માહિતી માટે એક QR કોડ પણ જાહેર કરવામાં આવ્યો છે, જે સ્કેન કરવાથી ફૂડનું મેનુ અને ભાવ જાણી શકાશે.
2 થીમ પર ફૂડ કોર્ટ તૈયાર કરાયા
મેયર પ્રતિભા જૈન અને સ્ટેન્ડિંગ કમિટીના ચેરમેન દેવાંગ દાણીએ જણાવ્યું હતું કે, આ ફેસ્ટિવલમાં 'A Taste of Luxury' અને 'The Regional Flavours' એમ 2 થીમ પર ફૂડ કોર્ટ તૈયાર કરવામાં આવ્યા છે. આ ઈન્ટરનેશનલ ફૂડ ફેસ્ટિવલમાં 3 અનોખા પેવેલિયન્સ તૈયાર કરાશે. લક્ઝરી પેવેલિયનમાં Taj Soulinaireના ખાસ મેનૂ સહિત ફેમસ હોટેલ દ્વારા તેમની સ્પેશિયલ વાનગીઓ પીરસવામાં આવશે. આ લક્ઝરી પેવેલિયનમાં લંચ અને ડિનર માટે પ્રતિ વ્યક્તિ 2,500 અને હાઈ ટી માટે 1,000નો ચાર્જ રહેશે.
પુરીના જગન્નાથ મંદિરનો 'ભોગ પ્રસાદ' મળશે
ફૂડ ફેસ્ટિવલના સ્પિરિચ્યુઅલ પેવેલિયનમાં પુરીના જગન્નાથ મંદિરમાં આપવામાં આવતો 'ભોગ પ્રસાદ' મળશે, જે મૂળ મંદિરના બ્રાહ્મણ રસોઈયાઓ દ્વારા જ બનાવવામાં આવશે. અમદાવાદીઓને પુરી મંદિર જેવી જ પવિત્રતા, પરંપરા અને સ્વાદનો અનુભવ થશે. આ પેવેલિયનમાં ભગવાન શ્રી કૃષ્ણના જીવનપ્રસંગો પર આધારિત 'લીલા' નામનું વિશેષ નૃત્ય પ્રદર્શન પણ રજૂ થશે.&nbsp;
'કોફી પેવેલિયન' વિશેષ આકર્ષણ
સ્પિરિચ્યુઅલ પેવેલિયનમાં ડિનર 2,100નું રહેશે, જ્યારે 13 નવેમ્બરના રોજ લંચ 1,600નું રહેશે. આ વર્ષે પ્રથમ વખત રજૂ થતું 'કોફી પેવેલિયન' વિશેષ આકર્ષણનું કેન્દ્ર બનશે. અહીં કોફીના છોડથી લઈને કાચા બીન્સ, તેમની કાપણી, રોસ્ટિંગ અને બૂઈંગ સુધીની સમગ્ર પ્રોસેસ લાઈવ રજૂ કરાશે. મુલાકાતીઓને ફ્રેશ તૈયાર કોફીનો સ્વાદ માણવાની તક સાથે રોસ્ટિંગ અને બૂઈંગ ટેક્નિક્સ અંગે જાણકારી મળશે.
લાઈવ ડેમો, કુકિંગ સેશન્સ, ચર્ચાઓ થશે
આ ફૂડ ફેસ્ટિવલમાં ભારત ઉપરાંત નેપાળ, સ્પેન, નેધરલેન્ડ જેવા દેશોના શેફ ભાગ લેશે. ખાસ કરીને સ્પેનના વલ્લાડોલિડમાંથી મિશેલિન સ્ટાર રેસ્ટોરાંના સેલિબ્રિટી શેફ અલ્વાર હિનોજલ કેસ્પો પ્રથમ વખત અમદાવાદમાં પોતાની શાકાહારી વાનગીનો ડેમો આપશે. ફેસ્ટિવલ દરમિયાન દરરોજ સાંજે 5:30 થી 8:00 વાગ્યા સુધી લાઈવ ડેમો, કુકિંગ સેશન્સ, ચર્ચાઓ, ફૂડ ટેસ્ટિંગ અને કલ્ચરલ પ્રોગ્રામ્સ યોજાશે. જેમાં પ્રસિદ્ધ શેફ રણવીર બ્રાર, સુવીર સરણ, વિક્કી રત્નાની, માસ્ટર શેફ અભિજિત સાહા, લેખિકા રશ્મી ઉદયસિંહ, પદ્મશ્રી ડો. પુષ્લેશ પંત તથા અનેક રાજવી અને સંસ્કૃતિ નિષ્ણાંતો હાજરી આપશે.
'હોસ્પિટાલિટી હોપ એવોર્ડ' અપાશે
'હોસ્પિટાલિટી હોપ એવોર્ડ' જે સ્થાનિક રેસ્ટોરાંને ગુણવત્તા માટે આપવામાં આવશે, તે 14 નવેમ્બરે શેફ રણવીર બ્રાર દ્વારા અપાશે, અને લક્ઝરી ફૂડ કોર્ટમાં ભાગ લેનારી હોટેલ્સને ઈનોવેશન માટે 'SAAG-AMC Award' 16 નવેમ્બરે લેજેન્ડરી શેફ મંજિત ગિલ દ્વારા આપવામાં આવશે. 'ફૂડ ફોર થોટ ફેસ્ટ 2025' ફૂડ લવર્સ, ફૂડ બ્લોગર્સ, ઉદ્યોગ નિષ્ણાંતો અને વિદ્યાર્થીઓ માટે ઉપયોગી બની રહેશે, જ્યાં ફૂડ એજ્યુકેશન, હેલ્ધી ઈટિંગ, સસ્ટેનેબલ ક્યુલિનરી પ્રેક્ટિસિસ અને ભારતીય ગેસ્ટ્રોનોમીની વિશ્વકક્ષાએ ઓળખ જેવા મહત્ત્વના મુદ્દાઓ પર ચર્ચા થશે.

ઈન્ટરનેશનલ ફૂડ ફેસ્ટિવલ

રિવરફ્રન્ટ ખાતે 13થી 16 નવેમ્બર દરમિયાન આંતરરાષ્ટ્રીય ફૂડ ફેસ્ટિવલનું આયોજન

November 12, 2025 | 17:26 IST