110 કરોડના ખર્ચે સચિવાલય સંકુલમાં AC લગાવવામાં આવશે, કાર્યક્ષમતા વધારો થવાનો દાવો

ગુજરાત સરકાર હવે સરકારી બાબુઓ અને કર્મચારીઓને વધુ આરામદાયક વાતાવરણ આપવા સચિવાલય સંકુલને સંપૂર્ણપણે વાતાનુકુલિત બનાવવા જઈ રહી છે. વહીવટી સુધારણા આયોગની ભલામણ પછી બ્લોક નંબર 1થી 14 સુધીની તમામ ઓફિસોમાં સેન્ટ્રલ AC પ્લાન્ટ લગાવવામાં આવશે. આ કામગીરી માટે અંદાજિત રૂપિયા 110 કરોડનો ખર્ચ થવાનો છે.

અધિકારીઓ અને કર્મચારીઓના કામકાજમાં વધારો થાય એ હેતુથી નિર્ણય લેવામાં આવ્યો હોવાનું જણાવાયું છે. વહીવટી સુધારણા આયોગના મત અનુસાર, વધતા તાપમાનને કારણે કર્મચારીઓના સ્વાસ્થ્ય અને કાર્યક્ષમતા પર અસર થાય છે, તેથી તેઓ માટે ઠંડકપૂર્ણ વાતાવરણ જરૂરી છે.

આ સાથે બીજી તરફ, કર્મચારીઓ માત્ર 5 દિવસ ઓફિસમાં કામ કરવાની માંગ સાથે શનિ-રવિવારની ફરજિયાત રજા માંગે છે. જોકે, અનેક વિભાગોમાં ફાઈલોના ઢગલાં થયા છે અને અરજદારોના કામો હજુ પણ ધીમી ગતિએ ચાલી રહ્યા છે. ઓફિસના પ્રભાવમાં બેદરકારી હોવાને લીધે મુલાકાતીઓની સંખ્યામાં પણ ઘટાડો થયો છે.

આવી સ્થિતિમાં સરકારી કાર્યક્ષમતા વધારવા માટે કરોડો રૂપિયાનો ખર્ચ થવા છતાં AC લગાવ્યા પછી પણ અરજદારોના કામો ઝડપી નીકળશે કે કેમ તે અનિશ્ચિત છે. રાજ્ય સરકાર અને વહીવટી સુધારણા આયોગે આશા વ્યક્ત કરી છે કે, ઠંડકભર્યું વાતાવરણ કર્મચારીઓની કામગીરીમાં સુધારો લાવશે.