અમદાવાદ શહેરમાં ડિજિટલ છેતરપિંડીના કિસ્સાઓ ચિંતાજનક રીતે વધી રહ્યા છે. સાયબર ગુનેગારો હવે સામાન્ય લોકોની સાથે-સાથે ટેકનિકલ જાણકારી ધરાવતા પ્રોફેશનલ્સને પણ શિકાર બનાવી રહ્યા છે. તાજેતરમાં શહેરના નિકોલ વિસ્તારમાં રહેતા અને વટવા GIDCની એક ખાનગી કંપનીમાં એકાઉન્ટન્ટ તરીકે ફરજ બજાવતા 50 વર્ષીય વિપુલ પટેલ સાથે 10.70 લાખ રૂપિયાની મોટી છેતરપિંડી થઈ હોવાનું સામે આવ્યું છે.
શેઠનું વોટ્સઅપ હેક કરી જાળ બિછાવી :&nbsp;
આ ઘટનાની વિગત એવી છે કે, ગત 19મી ફેબ્રુઆરીના રોજ વિપુલભાઈ પોતાની ઓફિસમાં કામ કરી રહ્યા હતા. આ દરમિયાન તેમના શેઠ જયંતિભાઈ પટેલના મોબાઈલ નંબર પરથી વોટ્સઅપમાં એક મેસેજ આવ્યો હતો. આ મેસેજમાં 'RTO E challan.apk' નામની એક ફાઈલ મોકલવામાં આવી હતી. વિપુલભાઈને લાગ્યું કે શેઠે ગાડીના મેમોની વિગતો તપાસવા માટે આ ફાઈલ મોકલી હશે, તેથી તેમણે કોઈ પણ શંકા કર્યા વિના તે ફાઈલ ડાઉનલોડ કરી લીધી હતી.
મોબાઈલનો રિમોટ એક્સેસ મેળવી લીધો :&nbsp;
જેવી વિપુલભાઈએ આ ફાઈલ ઓપન કરી, તેમાં નામ અને અન્ય અંગત વિગતો માંગવામાં આવી હતી. થોડી જ ક્ષણોમાં વિપુલભાઈને કંઈક અજુગતું લાગતા તેમણે ફાઈલ ડિલીટ કરી નાખી હતી. પરંતુ, ત્યાં સુધીમાં ઘણું મોડું થઈ ચૂક્યું હતું. આ APK ફાઈલ વાસ્તવમાં એક વાયરસ હતી, જેના દ્વારા ઠગોએ વિપુલભાઈના મોબાઈલનો સંપૂર્ણ રિમોટ એક્સેસ મેળવી લીધો હતો. આ ટેકનિકની મદદથી હેકર્સ તેમના મોબાઈલની તમામ પ્રવૃત્તિઓ જોઈ શકતા હતા અને તેમણે વિપુલભાઈના ઇન્ટરનેટ બેન્કિંગના આઈડી-પાસવર્ડ ચોરી લીધા હતા.
લોન મંજૂર કરાવી લાખો રૂપિયા પડાવ્યા :&nbsp;
20મી ફેબ્રુઆરીના રોજ ઠગોએ વિપુલભાઈના બેન્ક ખાતામાં મોટું ગાબડું પાડ્યું હતું. વિપુલભાઈ જ્યારે ઘરે જઈ રહ્યા હતા ત્યારે તેમના મોબાઈલ પર એક પછી એક મેસેજ આવવા લાગ્યા હતા. તપાસ કરતા માલુમ પડ્યું કે ઠગોએ માત્ર બેન્ક બેલેન્સ જ નહીં, પરંતુ તેમના નામે બેન્કમાંથી 5.31 લાખની ઈન્સ્ટા જમ્બો લોન અને 4.50 લાખની અન્ય એક લોન પણ મંજૂર કરાવી લીધી હતી. આમ, પોતાની બચત અને લોનની રકમ મળીને કુલ 10.70 લાખ રૂપિયા સાયબર ઠગોએ અલગ-અલગ ખાતાઓમાં ટ્રાન્સફર કરી લીધા હતા.
સાયબર ક્રાઈમમાં ફરિયાદ અને સાવચેતી :&nbsp;
આ ભયાનક છેતરપિંડી બાદ વિપુલભાઈએ તુરંત સાયબર હેલ્પલાઇન 1930 પર કોલ કર્યો હતો અને અમદાવાદ સાયબર ક્રાઈમ પોલીસ સ્ટેશનમાં ફરિયાદ નોંધાવી હતી. સાયબર નિષ્ણાંતોના મતે, કોઈપણ અજાણી વ્યક્તિ કે જાણીતા મિત્ર કે સંબંધીના નંબર પરથી પણ જો કોઈ APK ફાઈલ આવે, તો તેને ક્યારેય ડાઉનલોડ ન કરવી જોઈએ. આ ફાઈલો તમારા મોબાઈલનો કંટ્રોલ હેકર્સને આપી શકે છે, જેનાથી તમારી આર્થિક અને અંગત વિગતો જોખમમાં મુકાઈ શકે છે.&nbsp;

અમદાવાદ સાયબર ક્રાઈમ APK ફ્રોડ

શેઠના વોટ્સઅપ પરથી આવેલી એક ફાઈલ એકાઉન્ટન્ટને ભારે પડી,સાયબર ઠગોએ મોબાઈલ હેક કર્યો

March 31, 2026 | 15:50 IST