SURAT : બોલો...પોલીસે રસ્તાના ખાડાના ફોટા પાડીને કોર્પોરેશનને મોકલ્યા...

ગુજરાતના ઇતિહાસમાં સૌપ્રથમવાર એવું જોવા મળ્યું છે કે એક સનદી અધિકારી અને એક ઉચ્ચ પોલીસ અધિકારી વચ્ચે સમન્વયથી વાહન ચાલકોની સલામતી માટે મહત્ત્વપૂર્ણ પગલું ભરવામાં આવ્યું છે. સુરત શહેરના પોલીસ કમિશનર અનુપમસિંહ ગેહલોત અને મહાનગરપાલિકાના કમિશનર અગ્રવાલ વચ્ચેના સંકલનથી શહેરના રસ્તાઓ પર પડેલા ખાડાઓને પૂરી દેવા માટે એક અનોખી કામગીરી હાથ ધરવામાં આવી છે.

સુરતના ટ્રાફિક વિભાગ દ્વારા શહેરના મુખ્ય અને આંતરિક વિસ્તારોમાં પડી ગયેલા ખાડાઓના ફોટોગ્રાફ લઇને તેનું નકશીકરણ તૈયાર કરવામાં આવ્યું. ત્યારબાદ આ માહિતી મહાનગરપાલિકા તરફ મોકલવામાં આવી, જેના આધારે દરેક ઝોનના અધિકારીઓને તાત્કાલિક ખાડા પૂરવાનું કામ સોંપવામાં આવ્યું છે. નોંધનીય છે કે આમ તો આવા રસ્તા સમારકામની કામગીરી સામાન્ય રીતે પાલિકા હેઠળ આવતી હોય છે, પરંતુ આ વખતે પોલીસ તંત્રના સક્રિય સંકલનથી કામ વધુ ઝડપથી આગળ વધ્યું છે.

 

પોલીસ કમિશનર અનુપમસિંહ ગેહલોતે પોતાના કાર્યક્ષેત્રમાં આવી ન આવતી જવાબદારીને પોતાના ફરજની લાગણીથી આગળ વધારતા એક ભગીરથ પ્રયાસ કર્યો છે. તેમની આગેવાની હેઠળ ટીઆરબી જવાનો અને ટ્રાફિક અધિકારીઓ દ્વારા શહેરભરના રસ્તાઓના ખાડાઓના ફોટા લેવામાં આવ્યા, જે બાદમાં નક્કી કરાયું કે દરેક ખાડો પુરાશે.

પ્રથમ વરસાદમાં શહેરના અનેક રસ્તાઓ પર દોઢ ફૂટ સુધીના ખાડા પડી જતા નાના મોટા અકસ્માતો નોંધાયા હતા. આવા અકસ્માતો અટકાવવા માટે રાજ્યના એક IPS અધિકારી દ્વારા હાથ ધરાયેલો આ પહેલું પગલું સમગ્ર રાજ્યમાં ચર્ચાનો વિષય બન્યો છે. મહત્વપૂર્ણ છે કે હવે ફરી ફરિયાદની રાહ જોવાનું નહિ પડે – પોલીસ દ્વારા દર્શાવેલા દસ્તાવેજના આધારે પાલિકા તાત્કાલિક કાર્યવાહી કરશે.

 

આ અભિગમની નોંધ રાજ્ય સરકાર તથા મુખ્યમંત્રી કાર્યાલય (CMO) સુધી પહોંચી છે. એવું મનાય છે કે અનુપમસિંહ ગેહલોત અને અગ્રવાલનો સંકલિત મોડલ હવે અન્ય શહેરો માટે પણ દૃષ્ટાંતરૂપ બની શકે છે. એક તરફ ટ્રાફિક વ્યવસ્થાનું વહન, તો બીજી તરફ જાહેર સુરક્ષા બંનેના સંકલનમાં આવતાં શહેરના નાગરિકોને મોટી રાહત મળશે.

આ પણ વાંચો---

રખેવાળના ધરમાં ચોરી!: Surat પોલીસનું સોશિયલ મીડિયા હેક