રિક્ષાચાલકની 'પુષ્પા' સ્ટાઈલની 'ભાઈગીરી' કાઢી!

વડોદરામાં રિક્ષાચાલકને 'પુષ્પા' રીલ ભારે પડી :

વડોદરામાં એક રિક્ષાચાલક દ્વારા જોખમી સ્ટંટ સાથેનો વીડિયો સોશિયલ મીડિયા પર વાયરલ થતાં ખળભળાટ મચી ગયો છે. આ માથાભારે રિક્ષાચાલકે પોતાની રિક્ષાના છાપરા પર ચડી, હાથમાં તીક્ષ્ણ હથિયાર (ધારિયું) સાથે 'પુષ્પા' ફિલ્મના ડાયલોગ "મેં ઝુકેગા નહીં સાલા" અને "મેં હી હૈ બોસ, પુષ્પા ધ બોસ" બોલીને રીલ બનાવી હતી.

આ યુવકે વીડિયો દ્વારા વિસ્તારમાં રોફ જમાવવાનો અને ભાઈગીરી બતાવવાનો પ્રયાસ કર્યો હતો, જે જાહેરનામાનો ખુલ્લો ભંગ અને પોલીસને પડકાર સમાન હતો

પોલીસ એક્શન અને માફી : 

સોશિયલ મીડિયા પર આ વીડિયો વાયરલ થતાં જ વડોદરા ટ્રાફિક પોલીસ સક્રિય બની હતી. પોલીસે તુરંત કાર્યવાહી કરીને યુવક, લક્ષ્મણ પાટીલને ઝડપી પાડ્યો હતો.

પોલીસ સ્ટેશનમાં લક્ષ્મણની બધી ભાઈગીરી નીકળી ગઈ હતી. પોલીસે તેની પાસે કાન પકડીને સાર્વજનિક રીતે માફી મંગાવી હતી. માફી માગતા વીડિયોમાં યુવકે પોતાની ભૂલ કબૂલી હતી અને લોકોને આવા જોખમી સ્ટંટ ન કરવા અપીલ કરી હતી. તેણે કહ્યું કે, "મારાથી ભૂલ થઈ ગઈ છે. હું જિંદગીમાં બીજી વાર આવો વીડિયો નહીં બનાવું. બધા ચેતી જજો." ત્યારબાદ પોલીસે તેને મુક્ત કર્યો હતો.

ઉલ્લેખનીય છે કે, વડોદરા શહેરમાં અસામાજિક તત્વો દ્વારા સોશિયલ મીડિયા પર જોખમી સ્ટંટ કરીને રીલ્સ મૂકવાનો સિલસિલો ચાલી રહ્યો છે, ત્યારે પોલીસે આ કાર્યવાહી કરીને આવા તત્વોને સ્પષ્ટ સંદેશ આપ્યો છે.