રેવન્યૂ તલાટી ભરતીઃ 1900 ગ્રેડ પે, પણ સિલેબસ 4200 ગ્રેડ પે જેવો!

રાજ્ય સરકારના મહેસૂલ વિભાગે રેવન્યૂ તલાટીની ભરતી પ્રક્રિયાના નિયમોમાં ઘણાં ફેરફાર કરાયા છે. લાયકાત અને વય મર્યાદા ઉપરાંત ભરતીના નિયમોમાં પણ ફેરફાર કરાયા છે. જો કે, 1900 ગ્રેડ પે વાળી રેવન્યૂ તલાટીની પરીક્ષામાં 4200 ગ્રેડ પે વાળી નાયબ ચીટનીસ અને મદદનીશ ઈજનેરની ભરતી પ્રક્રિયા જેવો સિલેબસ રાખતાં ઉમેદવારોમાં રોષ સાથે ગણગણાટ શરૂ થયો છે. જ્યારે પરીક્ષા માટે ભરેલી ફી 40 ટકા માર્કસ મળે તો જ પરત કરવાનો નિયમ કરાતાં ઉમેદવારોનો રોષ વિરોધમાં પરિણમે તેવી શક્યતા છે. 

મહેસૂલ વિભાગે રેવન્યુ તલાટીની ભરતી પ્રક્રિયામાં બે મહત્વપૂર્ણ ફેરફાર કર્યા છે. પહેલો ફેરફાર લાયકાત સંબંધિત કરાયો છે. અગાઉ રેવન્યુ તલાટીની ભરતી માટે ધોરણ-12 પાસ લાયકાત જરૂરી હતી. હવેથી ઉમેદવારો માટે સ્નાતક (ગ્રેજ્યુએટ)ની ડિગ્રી ફરજિયાત કરવામાં આવી છે. બીજો ફેરફાર વય મર્યાદાને લઈને કરાયો છે. અગાઉ રેવન્યુ તલાટી ભરતી માટે ઉમેદવારોની મહત્તમ વય મર્યાદા 33 વર્ષ હતી. જે વધારીને 35 વર્ષ કરવામાં આવી છે.

તલાટી-કમ-મંત્રી એ પંચાયત વિભાગમાં આવે છે. તે મહેસૂલ વિભાગમાં નહીં પરંતુ પંચાયતના કર્મચારી કહેવાય છે. તેઓને પંચાયતને લગતા તથા રેવન્યુને લગતી કામગીરી કરવાની થાય છે. એપ્રિલ-2010માં રાજ્ય સરકાર દ્વારા તલાટી-કમ-મંત્રીની અલગ કેડર બનાવવામાં આવી છે. પંચાયત હસ્તકનું કામ પંચાયત મંત્રી કરે અને મહેસૂલ હસ્તકનું કામ મહેસૂલ તલાટી કરે તેવો નિર્ણય કરવામાં આવ્યો છે. જિલ્લાવાર તલાટી-કમ-મંત્રીની ભરતી પંચાયત પસંદગી મંડળ દ્વારા કરવામાં આવે છે.

2,389 રેવન્યુ તલાટીની ભરતી માટે બે પરીક્ષાનું આયોજન કરવામાં આવશે. જેમાં પ્રાથમિક કસોટી અને મુખ્ય પરીક્ષા રહેશે. આ પરીક્ષા માટે તમામ ઉમેદવારોએ ફી ભરવાની રહેશે. જેમાં પ્રાથમિક કસોટીમાં 40 ટકા કે તેથી વધુ માર્કસ લાવનારને ફી રિફંડ કરવામાં આવશે. ઉમેદવારોની ઉંમર મર્યાદા ઓછામાં ઓછી 18 વર્ષની જગ્યાએ 20 વર્ષ પણ કરવામાં આવી છે. 

રેવન્યુ તલાટીની ભરતીમાં પ્રિલિમિનરી પરીક્ષા 200 માર્કસની રહેશે. જે MCQ આધારિત લેવાશે. જ્યારે મુખ્ય પરીક્ષામાં 3 પેપર રહેશે. જેમાં અંગ્રેજી ભાષાનું 100, ગુજરાતી ભાષાનું 100 અને જનરલ સ્ટડીનું 150 માર્ક્સનું પેપર રહેશે. ગુજરાતી અને અંગ્રેજી ભાષાના પેપર ધોરણ 12 કક્ષાના આવશે. ગુજરાતી વિષયના પેપરમાં નિબંધ, ગદ્ય સમીક્ષા, સંક્ષેપીકરણ, વિચાર વિસ્તાર, પત્ર લેખન, અહેવાલ લેખન, ભાષાંતર અને ગુજરાતી વ્યાકરણ રહેશે. મુખ્ય પરીક્ષા કુલ 350 ગુણની રહેશે. 

ઉલ્લેખનીય છે કે, મદદનીશ ઈજનેરનો માસિક 49 હજાર પગાર હોય છે. તેની પરીક્ષા ગૌણ સેવા પસંદગી મંડળ દ્વારા લેવામાં આવે છે. તેમાં માત્ર MCQ આધારીત પરીક્ષા હોય છે.  જ્યારે રેવન્યૂ તલાટીનો 1900 નો ગ્રેડ પે અને પગાર 26 હજાર હોય છે. તેમ છતાં પ્રિલિમ અને મુખ્ય એમ બે પરીક્ષાનું આયોજન કરાયુ છે. તેથી રેવન્યૂ તલાટીની પરીક્ષાના નિયમોને લઈ અનેક સવાલ ઉઠાવી ઉમેદવારોમાં ઉગ્ર વિરોધ શરૂ થયો છે.