ગુજરાતમાં તમામ રેશનિંગ દુકાનો આજથી બંધ, E-KYC મુદ્દે દુકાનદારો હડતાલ પર

ભારત સરકાર દ્વારા ગરીબી રેખા નીચે જીવતા નાગરિકોને મફતમાં રેશન મળતું હોય છે, જે રાષ્ટ્રીય ખાદ્ય સુરક્ષા અધિનિયમ (NFSA) હેઠળ આવે છે. આ યોજનાનો લાભ લેવા માટે E-KYC ફરજિયાત છે. રાજ્યમાં આજે 1 જૂનથી તમામ રેશનિંગ દુકાનો બંધ છે.

85% E-KYC પૂર્ણ છતાં દુકાનદારો હડતાલ પર

ભલે સરકારનો દાવો છે કે, 85 ટકાથી વધુ NFSA કાર્ડ ધારકોનું E-KYC પૂર્ણ થયું છે, છતાં રેશનિંગ દુકાનદારો આજથી હડતાલ પર ઉતરી ગયા છે. આ મુદ્દે આજે અમદાવાદમાં રાજ્યભરના દુકાનદારોની વિશેષ બેઠકનું આયોજન થયું છે અને હડતાલની લડતને આગળ ધપાવવાનું નક્કી કર્યું છે.

હડતાલનું મુખ્ય કારણ

ગુજરાત ફેરપ્રાઈઝ શોપ્સ એન્ડ કેરોસીન લાયસન્સ હોલ્ડર એસોસિએશન મુજબ, 14 મે પછીથી સરકાર એ તમામ ગ્રાહકોના રેશનનો જથ્થો રોકી દીધો છે જેમનું KYC થયેલું નથી. એસોસિએશનના પ્રમુખે જણાવ્યું કે, અધિકારીઓનું કાર્યઅભાવ, ખોટી કામગીરી અને માર્ગદર્શનના અભાવથી KYC પ્રક્રિયા વધુ મુશ્કેલ બની છે. જેના કારણે દુકાનદારો અને ગ્રાહકો વચ્ચે અણબનાવ અને મારામારી જેવી ઘટનાઓ પણ બની છે.

ઘરે બેઠા રેશનકાર્ડનું E-KYC કેવી રીતે કરશો?

તમે તમારું e-KYC ઘરે બેઠા સરળતાથી કરી શકો છો. જે માટે તમારી પાસે મોબાઈલ અને ઇન્ટરનેટ હોવું આવશ્યક છે. “મારું KYC” અને “આધાર ફેસ RD” એપ્લિકેશન ડાઉનલોડ કરો. આ એપ ખોલીને તમારું લોકેશન દાખલ કરો. તેમાં તમારો આધાર નંબર, કેપ્ચા અને પ્રાપ્ત થયેલ OTP દાખલ કરો. આ માહિતીની પુષ્ટિ કર્યા પછી "ફેસ e-KYC"નો વિકલ્પ પસંદ કરો. કેમેરા ઓન થશે અને તમારો ફોટો લઇને સબમિટ કરો. આમ, તમારી KYC પ્રક્રિયા પૂર્ણ થશે.