રમશે બાળક, ખીલશે બાળક

કેન્દ્રીય ગૃહમંત્રી અમિત શાહ દ્વારા પોતાના સંસદીય મતવિસ્તાર ગાંધીનગરમાં બાળકોના માનસિક અને શારીરિક વિકાસને પ્રોત્સાહન આપવા માટે એક અત્યંત સંવેદનશીલ પ્રોજેક્ટ હાથ ધરવામાં આવ્યો છે. “રમશે બાળક, ખીલશે બાળક” નામ હેઠળ ચાલતા આ અભિયાનમાં અમદાવાદના બોપલ ખાતે આવેલા આરોહી બંગલોઝ ખાતે એક વિશેષ રમકડાં સંગ્રહ (Toy Collection) કાર્યક્રમ યોજાયો હતો. આ કાર્યક્રમમાં રાજ્યના મુખ્યમંત્રી ભૂપેન્દ્ર પટેલે જાતે ઉપસ્થિત રહીને બાળકો અને વાલીઓ પાસેથી રમકડાં એકત્રિત કરવાનું સેવાનું દાયિત્વ સંભાળ્યું હતું.

મુખ્યમંત્રી ભૂપેન્દ્ર પટેલનું મહત્વનું નિવેદન
આ પ્રસંગે મીડિયા અને સ્થાનિક નાગરિકોને સંબોધતા મુખ્યમંત્રી ભૂપેન્દ્ર પટેલે જણાવ્યું હતું કે, "આ આપણા સાંસદ અને ગૃહમંત્રી અમિતભાઈ શાહનો ભારે સંવેદનાસભર કાર્યક્રમ છે અને તેનો ઉદ્દેશ્ય ખૂબ જ ઉમદા છે. સામાન્ય રીતે મધ્યમ કે ઉચ્ચ વર્ગના બાળકો જે રમકડાંથી રમી ચૂક્યા હોય છે અથવા જે રમકડાં ઘરમાં એમનેમ પડ્યા રહે છે, તેને એકઠા કરીને સરકારી આંગણવાડીઓ અને ગરીબ વસાહતોના બાળકો સુધી પહોંચાડવાના છે જેથી દરેક બાળક રમી શકે અને ખીલી શકે."

અમિત શાહનું અનોખું અભિયાન
મુખ્યમંત્રીએ બાળકોના માસૂમ મનની વાત કરતા એક રસપ્રદ કિસ્સો શેર કર્યો કે, "જ્યારે અમે કલેક્શન માટે નીકળ્યા ત્યારે એક બાળકને પૂછ્યું કે તારે રમકડું આપવું છે? તો તેણે ખુશીથી હા પાડી. પરંતુ જો કોઈ બાળક ના પાડે કે 'ના, મારે મારું રમકડું નથી આપવું', તો આપણે તેને આગ્રહ વગર પાછું આપી દેવું જોઈએ. બાળકોને સામાજિક પોઝિશન કે સ્ટેટસ સાથે કોઈ લેવાદેવા હોતો નથી, તેઓ માત્ર પોતાની પ્રિય વસ્તુ પ્રત્યે લાગણી ધરાવતા હોય છે." તેમણે ઉમેર્યું કે લોકો આવીને માત્ર નવા જ રમકડાં ખરીદીને આપે તે જરૂરી નથી, ઘરમાં બચેલા રમકડાં પણ આપી શકાય. આ કાર્યક્રમ સમગ્ર લોકસભામાં વેગવંતો બન્યો છે અને કોઈ પણ નાગરિક પોતાના વિસ્તારના ભાજપ કાર્યકર્તાને આ રમકડાં સોંપી શકે છે.