Operation Sindoor : જેટલી વારમાં લોકો નાસ્તા પાણી પતાવે છે એટલી જ વારમાં તમે દુશ્મનોને પતાવી દીધા...!

ભારતના સંરક્ષણ પ્રધાન રાજનાથ સિંહે શુક્રવારે ભૂજ એરફોર્સ સ્ટેશનની મુલાકાત લીધી હતી અને ઓપરેશન સિંદૂર (Operation Sindoor)ની સફળતા બદલ અહીંના વાયુ યોદ્ધાઓને અભિનંદન આપ્યા હતા. અહીં પોતાના ભાષણમાં પાકિસ્તાન પર કટાક્ષ કરતા સંરક્ષણ મંત્રીએ કહ્યું કે લોકોને નાસ્તો કરવામાં જેટલો સમય લાગે છે, તેટલા સમયમાં તમે દુશ્મનોનો નાશ કરી દીધો છે. રાજનાથ સિંહ અહીં વાયુ યોદ્ધાઓ સાથે વાતચીત કરી રહ્યા છે. ઉલ્લેખનીય છે કે, ભુજ એરબેઝ ભારતના એ કેન્દ્રોમાંનું એક હતું જેને ગયા અઠવાડિયે પાકિસ્તાની સેના દ્વારા નિશાન બનાવવાનો પ્રયાસ કરવામાં આવ્યો હતો. તાજેતરમાં જ પાકિસ્તાની આતંકવાદીઓ સામે ચલાવવામાં આવેલા 'ઓપરેશન સિંદૂર' (Operation Sindoor)માં ભારતીય વાયુસેનાએ પાકિસ્તાનને ઘૂંટણિયે લાવવામાં મહત્વપૂર્ણ ભૂમિકા ભજવી હતી. આજે સંરક્ષણ મંત્રી રાજનાથ સિંહ એરબેઝ પર વાયુ યોદ્ધાઓને સંબોધિત કરી રહ્યા છે, જેમાં વાયુસેના પ્રમુખ એર માર્શલ એ.પી. સિંહ પણ તેમની સાથે ઉપસ્થિત છે.

રાજનાથ સિંહનું પ્રેરક સંબોધન...

રાજનાથ સિંહે પહેલગામમાં શહીદ થયેલા તમામ નિર્દોષ નાગરિકોને અને 'ઓપરેશન સિંદૂર' (Operation Sindoor) દરમિયાન વીરગતિ પ્રાપ્ત થયેલા સૈનિકોને નમન કર્યા. સંરક્ષણ મંત્રીએ કહ્યું કે, "આપણા દેશની મજબૂત ભુજા, ભુજમાં, આપ સૌની વચ્ચે આવીને મને બહુ ગર્વ થઈ રહ્યો છે. આ ભુજ, 1965 માં પાકિસ્તાન વિરુદ્ધ આપણી જીતનું સાક્ષી રહ્યું છે. આ ભુજ, 1971 માં પાકિસ્તાન વિરુદ્ધ આપણી જીતનું સાક્ષી રહ્યું છે. અને આજે એકવાર ફરી, આ ભુજ, પાકિસ્તાન વિરુદ્ધ આપણી જીતનું સાક્ષી બન્યું છે. તેની માટીમાં દેશભક્તિની સુગંધ છે, અને અહીંના જવાનોમાં ભારતની સુરક્ષાનો અડિગ સંકલ્પ છે. હું આપ સૌ Air warriors સહિત, Armed forces અને BSF ના તમામ જાંબાઝોને સલામ કરું છું."

તેમણે ઉમેર્યું, "ગઈકાલે હું ભારતના ઉત્તરીય ભાગમાં જવાનોને મળ્યો. આજે હું ભારતના પશ્ચિમી ભાગમાં Air warriors અને જવાનોને મળી રહ્યો છું. બંને fronts પર high energy અને high josh જોઈને, હું ફરીથી આશ્વસ્ત થઈ ગયો છું, કે ભારતની સીમાઓ, આપ સૌની મજબૂત ભુજાઓમાં સંપૂર્ણપણે સુરક્ષિત છે."

'ઓપરેશન સિંદૂર'ની ગૌરવગાથા...

'ઓપરેશન સિંદૂર' (Operation Sindoor) દરમિયાન વાયુસેનાના પરાક્રમને બિરદાવતા રાજનાથ સિંહે કહ્યું, "‘ઓપરેશન સિંદૂર’ (Operation Sindoor) દરમિયાન આપે જે કંઈ કર્યું, તેણે સમગ્ર દેશને ગર્વથી ભરી દીધો છે. ભારતીય વાયુસેના માટે, માત્ર 23 મિનિટ પૂરતી હતી, પાકિસ્તાનની સરઝમીન પર પલળી રહેલા આતંકના અજગરને કચડવા માટે. હું એમ કહું તો ખોટું નહીં હોય, કે જેટલી વારમાં લોકો નાસ્તો-પાણી પતાવે છે, તેટલી વારમાં આપે દુશ્મનોનો નિકાલ કરી દીધો. આપે દુશ્મનની સીમાની અંદર જઈને જે missiles પાડ્યા, તેની ગુંજ આખી દુનિયાએ સાંભળી. અને વાસ્તવમાં તે ગુંજ, માત્ર missiles ની જ નહીં, તે ગુંજ આપના શૌર્ય અને ભારતના પરાક્રમની હતી."

પાકિસ્તાનને કડક ચેતવણી...

સંરક્ષણ મંત્રી રાજનાથ સિંહે આ પહેલાં ગુરુવારે જમ્મુ-કાશ્મીરના શ્રીનગરની પણ મુલાકાત લીધી હતી અને સેનાના જવાનોને સંબોધિત કર્યા હતા. રાજનાથ સિંહે શ્રીનગરથી પાકિસ્તાનને કડક ચેતવણી જાહેર કરી હતી. તેમણે કહ્યું હતું કે, "પાકિસ્તાનના જખ્મોનો ઇલાજ એ જ વાતમાં છે કે તે ભારત વિરોધી અને આતંકવાદી સંગઠનોને પનાહ આપવાનું બંધ કરે, પોતાની જમીનનો ઉપયોગ ભારત વિરુદ્ધ ન થવા દે."