Rajkot : પૂર્વ CM વિજય રૂપાણીના નિધનથી રાજકોટ સ્તબ્ધ, શુક્રવારે 600 થી વધુ શાળાઓ બંધ

અમદાવાદમાં સર્જાયેલી કાળમુખી પ્લેન દુર્ઘટનામાં ગુજરાતના પૂર્વ CM વિજય રૂપાણીના કરુણ નિધનના સમાચારથી રાજકોટ (Rajkot) શહેર સંપૂર્ણપણે શોકમાં ગરકાવ થઈ ગયું છે. આ દુઃખદ સમાચારના પગલે રાજકોટ (Rajkot)માં આવતીકાલે, શુક્રવારે, 600 થી વધુ ખાનગી શાળાઓ બંધ પાળી દિવંગત નેતાને શ્રદ્ધાંજલિ અર્પણ કરશે. ખાનગી શાળા સંચાલક મંડળે આ નિર્ણય જાહેર કરીને ગ્રાન્ટ-ઇન-એઇડ અને સરકારી શાળાઓને પણ આ શોકમાં જોડાવાની અપીલ કરી છે.

મૃતદેહની ઓળખ માટે DNA મેચિંગની કરુણ રાહ...

વિજય રૂપાણીના નિધન બાદનો સૌથી કાળજુ કંપાવનારો પ્રશ્ન તેમના પાર્થિવદેહને ઓળખવાનો છે. ભયાવહ દુર્ઘટનાના કારણે મૃતદેહોની ઓળખ કરવી અત્યંત મુશ્કેલ બની છે. પ્રાપ્ત માહિતી અનુસાર, પૂર્વ CM ના મૃતદેહની ઓળખ માટે DNA મેચિંગ જરૂરી બન્યું છે, અને આ પ્રક્રિયા માટે તેમના બહેનનું નમૂના લેવામાં આવ્યું છે. આ કરુણ પ્રક્રિયાને કારણે અંતિમવિધિ ત્રણ દિવસ બાદ યોજાવાની સંભાવના છે, કારણ કે દેહની ઓળખ થવી બાકી છે.

રાજકીય શૂન્યતા અને શોકમય માહોલ...

વિજય રૂપાણીના પુત્ર ઋષભ રૂપાણી આવતીકાલે અમદાવાદ પહોંચશે, જ્યાં તેઓ પિતાના નિધનની આઘાતજનક સ્થિતિનો સામનો કરશે. ગાંધીનગર સ્થિત રૂપાણીના નિવાસસ્થાને રાજકીય નેતાઓ, અધિકારીઓ અને પ્રજાજનો શોક અને સાંત્વના પાઠવવા માટે ઉમટી પડ્યા છે, જ્યાં અત્યંત શોકમય માહોલ છવાયેલો છે.

આ પણ વાંચો : Ahmedabad Plane Crash : ભાવિ માતા-પિતા અને ગર્ભમાંનું બાળક પણ ન બચ્યું, પરંતુ બાળ ગોપાલ...

ગુજરાતે આજે એક કાર્યદક્ષ અને લોકપ્રિય નેતા ગુમાવ્યા છે, જેના કારણે રાજ્યના રાજકારણમાં એક મોટી ખાલી જગ્યા સર્જાઈ છે. આ દુર્ઘટનાએ સમગ્ર ગુજરાતમાં શોકની ગહેરી લાગણી વ્યાપી દીધી છે અને પ્રજાજનોમાં દુઃખની લાગણી છવાઈ છે. આ એક એવી કરુણાંતિકા છે જેને શબ્દોમાં વર્ણવી અશક્ય છે.

આ પણ વાંચો : Ahmedabad Plane Crash : બ્લેક બોક્સ મળ્યું, ટેકનિકલ ખામીની આશંકા...!