બાળકીના રહસ્યમય મોતે ખોલી પોલ

Rajkot Dummy Coaching Scam: રાજકોટ જિલ્લાના જસદણમાં આવેલી આલ્ફા સંકૂલ હોસ્ટેલમાં ધોરણ 5 માં અભ્યાસ કરતી 10 વર્ષની વિદ્યાર્થીની આયુષી બલદાણીયાના રહસ્યમય અને કરૂણ મોતના મામલે એક અત્યંત ચોંકાવનારો ખુલાસો થયો છે. બાળકીના મોતના પગલે શરૂ થયેલી સઘન તપાસમાં આ સંકુલમાં ચાલતા ડમી શિક્ષણના એક બહુ મોટા કૌભાંડનો પર્દાફાશ થયો છે. નવોદય અને સૈનિક શાળામાં પ્રવેશ માટેની પરીક્ષાની તૈયારી કરાવતા આ આલ્ફા કોચિંગ ક્લાસમાં ગુજરાતના 31 શહેરોના 697 વિદ્યાર્થીઓ ડમી તરીકે ભણતા હોવાનો ઘટસ્ફોટ થયો છે. રાજકોટ જિલ્લા પ્રાથમિક શિક્ષણ અધિકારી (DPEO) દીક્ષિત પટેલ દ્વારા આ અંગેનો એક સત્તાવાર અને વિગતવાર રિપોર્ટ ગાંધીનગર રાજ્ય પ્રાથમિક શિક્ષણ નિયામકને સોંપવામાં આવ્યો છે, જેને પગલે સમગ્ર રાજ્યના શિક્ષણ વિભાગમાં દોડધામ મચી ગઈ છે.

બીમારીમાં સંચાલકોની ઘોર બેદરકારી
આ સમગ્ર વિવાદની શરૂઆત એક નિર્દોષ બાળકીના કરૂણ મોતથી થઈ હતી. ભાવનગરના મહુવા તાલુકાના મોટા જાદરા ગામના વતની રમેશભાઈ બલદાણિયાએ પોતાની પુત્રી આયુષીને ગત 27 એપ્રિલના રોજ જસદણની આલ્ફા સ્કૂલમાં અભ્યાસ માટે મોકલી હતી. જૂન મહિના દરમિયાન આયુષીને અછબડા અને તીવ્ર તાવની તકલીફ થઈ હતી. વાલીઓના આક્ષેપ મુજબ, બાળકી ગંભીર રીતે બીમાર હોવા છતાં સંચાલકોએ પરિવારને સમયસર કોઈ જાણ કરી ન હતી અને તેને જરૂરી તબીબી સારવાર પણ પૂરી પાડી ન હતી.

સાપરાધ મનુષ્યવધનો ગુનો દાખલ
ગત 24 જૂનના બુધવારે બપોરે બાળકીની સ્થિતિ અત્યંત નાજુક બનતા તેને તાત્કાલિક રાજકોટ સિવિલ હોસ્પિટલ ખસેડવામાં આવી હતી, જ્યાં ફરજ પરના તબીબોએ તેને મૃત જાહેર કરી હતી. મૃતક બાળકીના પિતાએ ગંભીર આક્ષેપ કર્યો હતો કે સ્કૂલના નિયમોના બહાને છેલ્લા 2 મહિનાથી બાળકીને પરિવાર સાથે ફોન પર કે રૂબરૂ વાત પણ કરવા દેવામાં આવી ન હતી. આ ગંભીર ઘટનાના પગલે જિલ્લા પોલીસ વડા (SP) સહિતના ઉચ્ચ અધિકારીઓએ આલ્ફા સ્કૂલની મુલાકાત લીધી હતી. જસદણ પોલીસે બાળકીની સારવારમાં ગંભીર બેદરકારી દાખવતા સ્કૂલના સંચાલક અને ટ્રસ્ટી જયસુખ શંખારવા તથા હિરેન શંખારવા વિરૂદ્ધ ભારતીય ન્યાય સંહિતા (BNS) ની કલમ 105 (સાપરાધ મનુષ્યવધ) અને 54 હેઠળ ગુનો નોંધી બંનેને કસ્ટડીમાં લીધા છે. હાલ સ્કૂલ અને હોસ્ટેલને 1 મહિના માટે બંધ કરી દેવામાં આવી છે.

અન્ય શાળાઓમાં નામ અને હાજરી: ડમી વિદ્યાર્થીઓનું રાજ્યવ્યાપી કૌભાંડ
બાળકીના મોતના કેસમાં કાયદાકીય તપાસ આગળ વધતા જ આ સંકુલમાં ચાલતું ગેરકાયદેસર ડમી શિક્ષણનું મોટું નેટવર્ક સામે આવ્યું છે. તપાસ અહેવાલ મુજબ, આલ્ફા કોચિંગ ક્લાસમાં વર્ષ 2025-26 માં 250 અને વર્ષ 2026-27 માં 447 જેટલા બાળકો હોસ્ટેલમાં રહીને સ્પર્ધાત્મક પરીક્ષાઓની તૈયારી કરી રહ્યા છે. આ ક્લાસમાં જોડાવા માટે બાળકોને હોસ્ટેલમાં રાખવા જાણે ફરજિયાત કરવામાં આવ્યું હતું. સૌથી મોટો સવાલ એ ઊભો થયો છે કે આ તમામ 697 બાળકોના નામ ગુજરાતના જુદા-જુદા જિલ્લાઓની અન્ય સરકારી કે ખાનગી શાળાઓના ચોપડે બોલે છે, જ્યારે તેઓ પ્રત્યક્ષ રીતે જસદણમાં રહીને ભણે છે. જો આ બાળકો 1 થી 2 વર્ષ સુધી જસદણની હોસ્ટેલમાં રહેતા હોય, તો તેમની મૂળ શાળાના રજિસ્ટરમાં રોજની હાજરી કોણ પૂરી રહ્યું હતું અને કયા આર્થિક સેટિંગના આધારે આ ખેલ ચાલતો હતો તે શિક્ષણ વિભાગ માટે મોટો તપાસનો વિષય બન્યો છે. આ લિસ્ટ ગાંધીનગર મોકલાતા જ આલ્ફા જેવા અન્ય કોચિંગ ક્લાસિસ પર પણ કાયદાનો સકંજો કસાય તેવા એંધાણ વર્તાઈ રહ્યા છે.

કયા શહેરમાંથી કેટલા ડમી વિદ્યાર્થીઓ આલ્ફામાં ભણતા હતા?
જિલ્લા શિક્ષણ વિભાગ દ્વારા ગાંધીનગર શિક્ષણ નિયામક કચેરીને મોકલવામાં આવેલી સત્તાવાર યાદી અનુસાર, ગુજરાતના 31 શહેરોની શાળાઓમાં સરકારી ચોપડે નામ ધરાવતા અને આલ્ફામાં હોસ્ટેલમાં રહી ડમી તરીકે ભણતા બાળકોની આંકડાકીય વિગત નીચે મુજબ છે:
શહેર - 2024/25 -2026/27
અમદાવાદ - 06-28
અમરેલી -34-55
આણંદ - 01-04
અરવલ્લી - 08- 10
બનાસકાંઠા - 05-12
બરોડા - 01-04
ભરૂચ - 01- 01
ભાવનગર - 08- 19
બોટાદ - 04- 16
છોટાઉદયપુર - 01- 00
દાહોદ -06-21
દેવભુમી દ્વારકા -02-00
ગાંધીનગર - 01-01
ગીરસોમનાથ -21- 48
જામનગર -06-12
જૂનાગઢ - 19- 29
કચ્છ - 05-08
મહિસાગર - 17- 26
મહેસાણા - 03-02
મોરબી - 03-23
નર્મદા - 01- 01
પંચમહાલ - 04- 07
પાટણ - 16- 37
પોરબંદર - 01- 00
રાધનપુર - 01-00
રાજકોટ - 31- 47
સાંબરકાંઠા - 14- 14
સુરત -13-17
સુરેન્દ્રનગર - 16- 21
વલસાડ - 01- 00
ખેડા -00- 03
કુલ - 250- 447

સમગ્ર રાજ્યના વાલીઓમાં ભારે રોષ
આ કમનસીબ ઘટના અને ત્યારબાદ બહાર આવેલા શૈક્ષણિક કૌભાંડના કારણે સમગ્ર રાજ્યના વાલીઓમાં ભારે રોષ અને ભયનું વાતાવરણ જોવા મળી રહ્યું છે, જેના પગલે અનેક વાલીઓ પોતાના બાળકોને આ હોસ્ટેલમાંથી પરત પોતાના ઘરે લઈ ગયા છે. હવે જોવાનું એ રહેશે કે શિક્ષણ વિભાગ અને સરકાર આ ગેરકાયદેસર ડમી નેટવર્ક ચલાવનારા આલ્ફા સંકુલની માન્યતા રદ કરીને તેને કાયમી તાળા મારે છે કે નહીં.